Նավթի գնի գահավիժումը դադար է վերցրել

Մի քանի կտրուկ անցումներից հետո նավթի գինն այսօր կայունացել է։ «Brent» տեսակի նավթը, որ գնով գրեթե հավասար է ադրբեջանական «Azeri LT CIF», այսօր 2,2 տոկոս աճ է գրանցել (պայմանավորվածությունները կնքվել են հաջորդ տարվա հունվարի մատակարարումների համար)։

Այս տեսակի նավթը վերականգնել է դիրքերն ու նորից բարձրացել բարելի համար 60 դոլար գնին։ Սա հատկապես ադրբեջանական կողմի համար վտանգից հետո խորը արտաշնչելու առիթ է, քանի որ նավթի կտրուկ անկման շարունակությունը լուրջ ֆինանսական խնդիրներ կարող էր առաջացնել հարևան երկրում։

Նավթի գնին այսօր առավոտյան արձագանքել է ԱՄՆ նախագահը։

«Ինչ լավ է, որ նավթի գները նվազում են: Շնորհակալությո՛ւն Ձեզ, նախագա՛հ Թրամփ: Գումարեք սա տնտեսության մասին մյուս դրական նորություններին, օրինակ նրան, որ հարկերը ևս էականորեն նվազել են»,- իր թվիթերյան էջում գրել է Դոնալդ Թրամփը:

ԱՄՆ նախագահի ակնարկը տեղին է, քանի որ սեպտեմբերից նավթի գնի նվազումն ուժգնացավ նաև նրա այն հայտարարությունից հետո, ըստ որի՝ նավթի արդյունահանման սահմանափակումների անհրաժեշտություն չկա, իսկ նավթի գինը ուռճացված է։

Մյուս պատճառն էլ այն էր, որ նավթ արդյունահանող պետությունների կազմակերպության (OPEC) նոյեմբերի 13-ի զեկույցում նշվել էր, որ Իրանի ու Վենեսուելայի վրա սահմանված պատժամիջոցներից հետո մյուս պետություններն այնքան են ոգևորվել, որ արդյունահանել են չափից ավելի շատ նավթ, արդյունքում շուկայում նավթի առաջարկը գերազանցել է պահանջարկը, գները սկսել են նվազել։

Առաջացած գերարտադրության ու շուկային անհրաժեշտ քանակից ավելի շատ նավթ մատակարարելու արդյունքում նավթի բոլոր տեսակների գները նման մասշտաբի կորուստներ են ունեցել։ Նավթի շուկայի մյուս խաղացողներին այս ամենը գուցե շատ չմտահոգի, սակայն Ադրբեջանի համար նավթի գինը կենսական նշանակություն ունի, քանի որ նավթը պետական գանձարանը լցնելու հիմնական միջոցներից է։

Դրա ազդեցությունը բյուջեի վրա այնքան մեծ է, որ ամեն հաջորդ տարվա բյուջեն գրելիս ադրբեջանցիները դրա մեջ կանխատեսում են նաև նավթի գինը։ 2019 թվականի համար Ադրբեջանի բյուջեն կանխատեսել է նավթի 60 դոլար միջին գինը, մինչդեռ նախորդ շաբաթ ադրբեջանական նավթի գինը նվազել էր մինչև գրեթե 61 դոլար։

Այս համընդհանուր էժանացմանը կարող է վերջ դնել դեկտեմբերի 6-ին Նավթ արդյունահանող երկրների կազմակերպության (OPEC) ժողովը, որի ժամանակ այդ երկրները կարող են համաձայնության գալ ու արդյունահանումը որոշակի սահմանների մեջ պահել՝ գինը կայուն պահելու համար։