Դավոս այցին ընդառաջ վարչապետ Փաշինյանը հոդված է հրապարակել ֆորումի կայքում

«Դավոսի համաշխարհային համաժողովի կայքում լույս է տեսել իմ հոդվածը: Ինքս՝ մեկնում եմ կիրակի»,- ֆեյսբուքյան այս գրառումով վարչապետ Նիկոլ Փաշինյանը տեղեկացնում է, որ մեկնելու է Դավոս՝ Համաշխարհային տնտեսական համաժողովին (ֆորումին) մասնակցելու։ Գրառմանը կից Նիկոլ Փաշինյանը զետեղել է իր հոդվածը։

https://www.facebook.com/nikol.pashinyan/posts/2237656979888018

«Փոփոխությունները, որոնք տեղի ունեցան Հայաստանում անցած տարի, իրոք պատմական էին իրենց բնույթով ու ծավալով։ Մեր երկրում թավշյա հեղափոխությունն առաջնորդեց ժողովրդավարության հաղթանակին»,- գրում է վարչապետ Փաշինյանն ու ներկայացնում տեղի ունեցած փոփոխությունները։

Նա հիշեցնում է, որ այդ ամենին մասնակցում էին ոչ միայն հանրության բոլոր շերտերը, այլև աշխարհասփյուռ հայությունը։ Եվ իշխանության փոփոխությունը, հիշեցնում է Փաշինյանը, եղավ առանց բռնության, առանց որևէ զոհի։ Իսկ իրերի վիճակն արձանագրվեց խորհրդարանական ընտրություններով, ու Ազգային ժողով անցած կուսակցությունները վայելում են ժողովրդական հեղինակություն։

Փաշինյանը հիշեցնում է, որ Հայաստանում այս ներքին փոփոխություններն արտաքին հարաբերություններում որևէ տեկտոնական փոփոխության չեն հանգեցրել, ու պաշտոնական Երևանը գործընկերների առաջ շարունակում է կրել իր պարտավորությունները։ Ավելին, ըստ Փաշինյանի, ժողովրդավարական Հայաստանն ավելի մեծ ներդրում կարող է ունենալ իր անդամակցած ռազմաքաղաքական ու տնտեսական միություններում։

Վարչապետն իր հոդվածում հիշեցնում է, որ Հայաստանում այս փոփոխությունների նախադրյալներից մեկն այն էր, որ հանրությունն ուներ ազատության ու արդարության պահանջի զգացում դեռ 1988 թվականի ցույցերից, իսկ գործող իշխանությունները Հայաստանը տանում էին դեպի լճացում, և անհրաժեշտ էր արդիականացնել պետական ապարատը, իսկ միակ լուծումը ժողովրդավարությունն էր։

«Մենք չենք տեսել ժողովրդավարությանը որևէ այլընտրանք»,- գրում է Փաշինյանը։

Ստանալով ժողովրդի վստահությունը, ըստ Փաշինյանի, Հայաստանի իշխանությունը բարեփոխումների լայնածավալ օրակարգ ներդրեց։ Հիմա այդ օրակարգի առաջնահերթություններն են կոռուպցիայի դեմ պայքարը, մենաշնորհների բացառումը, բոլորի համար հավասար պայմանների ստեղծումը, աղքատության վերացումը, անկախ դատական համակարգի ստեղծումը։

Քաղաքական այս փոփոխություններից հետո Հայաստանի իշխանությունները, ըստ Փաշինյանի, ձեռնամուխ են եղել բարեփոխել նաև տնտեսությունը։ Վարչապետը թվարկում է այն աշխատանքները, որոնք կատարվում են Հայաստանը ներդրումների համար ավելի գրավիչ դարձնելու համար, ու ներկայացնում է նաև առանձին ոլորտներ, որտեղ մրցունակ է Հայաստանը՝ ՏՏ, կրթություն, զբոսաշրջություն, ջրային տնտեսություն և այլն։

Փաշինյանը հիշեցնում է, որ Հայաստանը ԵԱՏՄ անդամ է, ու կարող է կամրջող դեր խաղալ ԵՄ անդամ պետությունների համար։ Ավելին, սա հնարավորություն է տալիս եվրոպացիներին ներդրումներ անել ու մտնել եվրասիական շուկա։ Իսկ ԵՄ-ի հետ համաձայնագրի կնքումից հետո Հայաստանը քաղաքականապես ու տնտեսապես կապեր է ստեղծում Եվրոպայի հետ։ Այս ամենի հիման վրա Հայաստանը, ըստ Փաշինյանի, շարունակելու է առաջընթացը տեխնոլոգիական ու արդյունաբերական տնտեսության կայացման ուղղությամբ։

«Մենք վճռական ենք տրամադրված առաջ շարժվել այս ուղով՝ հասնելու համար վերջնական նպատակին՝ կայուն, ժողովրդավարական, տնտեսապես զարգացող Հայաստանին՝ հիմնված օրենքի գերակայության ու հաշվետվողական կառավարման վրա։ Մենք ձախողման իրավունք չունենք։ Մենք պարտավոր ենք արդարացնել մեր ժողովրդի վստահությունը ու պաշտպանել ժողովրդավարությունը»,- իր հոդվածը եզրափակում է Փաշինյանը։