Եթե հնարավորություն լիներ, կառավարության ամբողջ ծրագիրը կջնջեի, ձեր ասածը կգրեի ու դրանով կառաջնորդվեի. վարչապետը՝ ՏՏ ոլորտի մասին

«Իմ քայլը» խմբակցության պատգամավոր Էդգար Առաքելյանի խոսքը հարուստ էր վարչապետի ներկայացրած կառավարության ծրագրի գովասանքով, իր խոսքում նա մասնավորապես նշեց. «Շնորհակալություն «Իմ քայլը» խմբակցության պատգամավորներին պարզերես անելու համար»:

Նրա հարցը վերաբերում էր ՏՏ ոլորտը գերակա ուղղություն հայտարարելու կառավարության տեսլականին: Նրա համոզմամբ՝ ոլորտը յուրահատուկ բանալի է բազմաթիվ կենսական խնդիրների լուծման համար, որոնք նշված են կառավարության ծրագրում՝ արտահանման ավելացում, շրջափակման հաղթահարում, աշխատատեղերի ավելացում, արտասահմանյան ներդրումների ավելացում …

«Իմ խնդիրն առաջնահերթությունների հետ է կապված. ոլորտի զարգացման խնդիրներից մեկը կադրերի պակասն է, եկեք չխաբվենք այն զարգացման տեմպերին, որ վերջին տարիներին ունեցել ենք, դրանք կարող են բազմապատիկ ավելին լինել, եթե ունենանք ծրագրավորողներ, ինժեներներ, և երբ որ նայում ենք, թե ինչ է առաջարկում կրթական համակարգը, տեսնում ենք, որ ունենք մեկ բուհ, որն ավարտելուց հետո շրջանավարտը չի կարողանում աշխատանք գտնի, նորից պետք է սովորի, և միջին մասնագիտական հատվածը թերի է»,- ներկայացրեց որպես ծրագրավորող վերապատրաստված պատգամավորը:

Վարչապետը հաստատեց վերջինիս կողմից ոլորտին տրված բնորոշումները՝ շեշտելով, որ այդ ոլորտի հետ կապված շատ հույսեր կան: Ըստ ցուցանիշի՝  2018թ. ոլորտը 14 տոկոսի աճ է ունեցել, դա վատ չէ, բայց պոտենցիալն ավելի մեծ է:

«Սա այն ոլորտն է, որտեղ մարդկանց աշխատավարձերի, սոցիալական իրավիճակի բարելավման, եկամուտների աճի չափելի հեռանկար կա, որտեղ ոչ թե աշխատատեղի, այլ աշխատողի պրոբլեմ կա, և մեր խնդիրը պետք է լինի կադրերի պատրաստումը: Ուղերձը պետք է հղենք, որ երաշխավորված է, որ որակական որոշակի չափանիշի համապատասխանող մասնագետը ոլորտում արագ կգտնի աշխատանք, սկզբում կարող է լինել նույնիսկ ցածր ու միջին, բայց վստահաբար կաճի ու հմտությունների զարգացմանը զուգահեռ, աշխատավարձը կտեղափոխվի բարձր աշխատավարձի սեգմենտ, մենք կառավարության ծրագրի շրջանակներում քննարկում ենք, որ վերապատրաստման կենտրոններ գործեն»,- ասաց վարչապետը:

Դրանք հնարավորություն կտան այլ մասնագետների վերապատրաստվել որպես ծրագրավորողներ և լրացնել աշխատաշուկայի պահանջարկը: Պատգամավորը հավելեց, որ համաձայն է վարչապետի խոսքերի հետ և կարծում է, որ պետք է արագ մեթոդներ կիրառել:

«Եթե լիներ հնարավորություն, կառավարության ամբողջ ծրագիրը կջնջեի, ձեր ասածը կգրեի ու դրանով կառաջնորդվեի, ոչ թե որովհետև մյուսները կարևոր չեն, այլ դրա հետևից մյուսներն էլ կզարգանան: Մենք խոսում ենք պաշտոնյաների վարքագծի փոփոխության մասին, ձեր ասածը, եթե անենք, մնացածը՝ անասնապահությունը, մակրոտնտեսական ցուցանիշները, ՀՆԱ-ի հարաբերակցություն և այլն, ամեն ինչը կլուծվի, դրա համար ստեղծում ենք նախարարությունը, այդ կոնկրետ ուղղությունը լուծենք, մնացածը կկարգավորվի»,- համոզված է վարչապետը: