Աշոցքը կդառնա դահուկավազքի և ձմեռային տուրիզմի կենտրոն

Հանրապետության հյուսիսային 3 մարզերում՝ Տավուշում, Լոռիում և Շիրակում աշնանը կմեկնարկի զբոսաշրջության զարգացման կառավարության նոր  ծրագիրը։ 13 միլիոն եվրո արժողությամբ ծրագրի ֆինանսավորող կողմը Եվրամիոությունն է։ Այս մասին երեկ    լրագրողների հետ ճեպազրույցի ընթացքում հայտարարել է Հայաստանում Եվրամիության դեսպան Պյոտր Սվիտալսկին։Աշոցքը հավակնում է դառնալ ձմեռային տուրիզմի և դահուկավազքի կենտրոն, որի շուրջ անհրաժեշտ ենթակառուցվածքներն են արդեն ստեղծվում։ Աշոցքի դահուկային կենտրոնի հարակից տարածքում հիմնվել է Հայաստանում առաջին Եվրոպական պուրակը:Դահուկավազքի կենտրոնն Աշոցքում բացվեց հունվարին։ Բնական թեքություններով այս տարածքում առաջին անգամ անցկացվեց նաև դահուկավազքի առաջնություն։ Դահուկորդների և այս տարածքում մարզվողների համար կառուցվեց նաև կեցավայր: Կենտրոնը հավակնում է դառնալ տարածաշրջանում մարզաձևը զարգացնելու կարևոր ենթակառուցվածք։ «Մենք ունենք մոտ 15 հոգու համար նախատեսված կեցության վայր, մենք ունենք նաև սննդի հնարավորություն սկզբի համար լրիվ բավարար է, իհարկե, պետք է մտածել զարգացնելու, մեծացնելու թե՛ աշխարհագրությունը, թե՛ ենթակառուցվածքները և թե՛ միջազգային ասպարեզ դուրս գալը»,- ասել է Հայաստանի դահուկային սպորտի ֆեդերացիայի փոխնախագահ Գագիկ Սարգսյանը:«Մենք շարունակում ենք աջակցել Աշոցքին, որպեսզի այն վերածվի մարզական տուրիզմի կենտրոնի, որ ավելի շատ զբոսաշրջիկներ գան   տարածաշրջան: Մասնավորապես՝ դահուկավազքի կենտրոնը, ձյունմաքրող մեքենան, դահուկուղին, մեր փոքրիկ լուման են Աշոցքում»,- նշել է Հայաստանում Եվրամիության դեսպան Պյոտր Սվիտալսկին:Երկարատև ու ցրտաշունչ ձմեռներով հայտնի Աշոցքում տարվա կեսից ավելին ձյունապատ է, ձյան շերտի հաստությունը հասնում է մինչև  երկու մետրի: Այն, ինչ բնությունը տվել է այս տարածաշրջանին, կարող է ծառայել համայնքի զարգացմանը: Հայաստանի դահուկային սպորտի ֆեդերացիան շուտով կբացի դահուկային սպորտի ակադեմիա: «Մենք ծրագիր ունենք՝ Հայաստանում ստեղծել դահուկային սպորտի և ձմեռային տուրիզմի ակադեմիա: Ակադեմիան ոչ ֆորմալ կրթություն է տալու, այսինքն՝ երկու ուղղություն է ունենալու․ մարզիչների, հրահանգիչների պատրաստում, ինչպես նաև տաղանդավոր ապագա մեր օլիմպիական դահուկորդների մարզում և մրցումների մասնակցություն: Նմանատիպ ակադեմիա Հայաստանում չկա»,- առաջիկա ծրագրերի մասին է խոսել Գագիկ Սարգսյանը։Տուրիզմի ակադեմիայի ստեղծումից առաջ դահուկավազքի կենտրոնի հարակից տարածքն է բարեկարգվում: Այն ևս Եվրամիության  ներդրումային ծրագրերից է: Բարեկարգումն էլ սկսվեց ծառատունկով: Մարզական համալիրի վերածվող տարածքում հիմնվեց Եվրոպական  պուրակ։ Տարվա կեսը ձմռան շնչով ապրող Աշոցքում քամիներն էլ են ուժեղ: Ամռան ամիսներին էլ Հայաստանի հյուսիսում քամիներն են շատ: Բնակլիմայական այս առանձնահատկությունն էլ  հաշվի առնելով՝ պուրակը կլինիկեչիներով ու արոսենիներով հարուստ: Տնկարաններում ու փակ պայմաններում աճեցված 4-5 տարեկան տնկիները Աշոցք էին տեղափոխվել  թաղարներով:Ծառատունկին մասնակցեցին նաև Աշոցքի բնակիչները: Այս համայնքում ծառապատ տարածքներ գրեթե չկան: Եվ պուրակը կարող է դառնալ  հանգիստը կազմակերպելու լավագույն վայր բոլորի համար: Ծառատեսակները մի քանի տարվա ընթացքում կունենան 4-5 մետր բարձրություն, իրարից մոտ 4 մետր հեռավորության տնկված շիվերը առանձնահատուկ խնամք չեն պահանջում, տարածքը խոնավ է, բնական պայմանները սկզբնական շրջանում ապահովում են ծառի վեգետացիան: Տարածաշրջանում տուրիզմի աշխուժացման այցեքարտեր կարող են դառնալ մաքուր օդը, ալպիական մարգագետինները, յուրահատուկ  դեղաբույսերն ու խստաշունչ ձմեռը։ Հենց այս ամենը տեսնելու և վայելելու համար էլ էկոտուրիզմի սիրահարները ենթակառուցվածքներ լինելու  դեպքում կնախընտրեն հանգիստը վայելել Հայաստանի հյուսիսային բնակավայր Աշոցքում: