Ես՝ որպես ՀՀ վարչապետ, վստահում եմ ԱԱԾ-ին. Փաշինյան

Վարչապետ Նիկոլ Փաշինյանը ելույթ է ունեցել Ազգային անվտանգության մարմինների ծառայողի օրվան նվիրված հանդիսավոր նիստին:

«Շնորհավորում եմ բոլորիս, որովհետև ԱԱԾ կողմից իրականացվող գործառույթները առնչվում են ՀՀ յուրաքանչյուր քաղաքացու ու նրա անվտանգության շահերին: Ես բազմիցս եմ ասել, որ անվտանգությունը մեր երկրում համարում եմ բոլոր առաջնահերթությունների առաջնահերթությունը: Մենք երկրի անվտանգությունը ապահովող մի քանի կառույց ունենք, որոնցից մեկը ԱԱԾ-ն է ու նախորդ 1,5 տարվա ընթացքում՝ որպես վարչապետ, կարող եմ արձանագրել, որ ԱԱԾ-ն կատարել է իր առջև դրված խնդիրը: Երբեմն հնչում են քննադատություններ, բայց ծառայության հսկայական մասը անտեսանելի է հանրության համար: Անվտանգությունը այն երևույթներից է, որի ներկայությունը սովորաբար չի նկատվում: Երբ որ անվտանգությունը կա, դրա համար շնորհակալությունը ոչ ոք ոչ մեկին չի ասում, որովհետև համարվում է, որ պետք է լինի, իսկ երբ անվտանգությունը թեկուզ մի փոքր կասկածի տակ են առնում, բնականաբար, բոլորը հանում են թրերը և հարձակվում անվտանգությունն ապահովող մարմինների ուղղությամբ»,- ասել է վարչապետը:

Նիկոլ Փաշինյանը, առիթը օգտագործելով, շնորհակալություն հայտնեց ծառայության աշխատակիցներին՝ իրենց կատարած ծառայության համար.

«Ցավոք, մեր երկիրը դեռ այնպիսի անվտանգային միջավայրում չէ, որպեսզի  մենք հնարավորություն ունենանք ընդհանրապես չնկատել անվտանգության հետ կապված հետ խնդիրները: Ցավոք, մենք գտնվում ենք մի տարածաշրջանում, որտեղ իրավիճակը բարդ է, պարբերաբար սրվում է, և մենք անվտանգության երկարաժամկետ մարտահրավերներ ենք ունենալու, ընդ որում, կապված նաև միջազգային, տարածաշրջանային իրավիճակին հետ՝ սկսած ահաբեկչության մարտահրավերից, մեր սահմանների անվտանգության մարտահրավերից և այլն: Այսօր ամենավերջին տվյալով Հայաստանն աշխարհի ամենաանվտանգ  երկրների ցանկում է: Հակամարտություն ունեցող 4 սահմանից 2 փակ սահման ունեցող երկիրը հանկարծ հայտնվում է այդ ցուցակում»:

Վարչապետի խոսքերով` որևէ մարմին չի կարող անթերի աշխատել` լինի պետական, թե մասնավոր.

«Մենք մեր երկրի պետական ինստիտուտների  աշխատանքի կատարելագործումը և որակի բարձրացումը համարում ենք առաջնահերթություն, և առաջ ենք շարժվելու:

Վարչապետը գտնում է, որ ժամանակն է խոսել  բազմաթիվ քննարկումների ու դիտարկումների մասին՝ թե ինչքանով է ինքը վստահում ԱԱԾ-ին:

«Ես՝ որպես ՀՀ վարչապետ, վստահում եմ ՀՀ Ազգային անվտանգության ծառայությանը: ԱԱԾ-ն երբեք չի անցել այն կարմիր գծերը, որոնք ընդհանրապես կարող են գոյություն ունենալ հանրային հարաբերություններում»,- հայտարարել է Նիկոլ Փաշինյանը։

Նիկոլ Փաշինյանը հիշեցրել է ԱԱԾ-ի միակ առաքելությունը` չլինել որևէ իշխանության գործունեության համատեքստում տեղավորվող ծառայություն, այն պետք է լինի ազգային ծառայություն՝ բոլոր իշխանությունների գործունեության ժամանակ:

«Ժամանակի ընթացքում ծառայությունը գուցե ավելի պակաս ջանք պետք է գործադրի կոռուպցիայի դեմ պայքարում, որովհետև դրա համար պետք է ձևավորվեն առավել էֆեկտիվ ինստիտուտներ` ԱԱԾ-ն  պետք է կենտրոնանա հակահետախուզության խնդիրների, ահաբեկչության դեմ պայքարի, սահմանադրական կարգի պահպանության և բռնության բացառման խնդիրների վրա»:

Վարչապետը հույս է հայտնել, որ անվտանգության հարցով զբաղվող մարմինները կկարողանան ստեղծել այնպիսի պայմաններ, որ որևէ մեկը չի կարողանա Հայաստանի ու Արցախի համար  էական սպառնալիք ստեղծել:

«Մեր անվտանգությունը ամուր և հուսալի ձեռքերում է և այն պիտի շարունակվի ի շահ Հայաստանի ու Արցախի»,- ասել է նա:

ԱԱԾ մի խումբ աշխատակիցներ այնուհետ պարգևատրվել են շնորհակալագրերով, մեդալներով ու պարգևներով: