Երբ պետությունը սկսի կատարել հիմնադրամի գործառույթները, մենք մեր անելիքներն այլ տեղ կփնտրենք. Աննա Հակոբյան

«Հեռանկար» հաղորդաշարի վարող Արամ Աբրահամյանի հետ վարչապետի տիկին Աննա Հակոբյանը խոսել է նաև իր հիմնադրամների գործունեության մասին:

«Ես երկու հիմնադրամ ունեմ, որոնց հոգաբարձուների խորհրդի նախագահն եմ: Իմ ամբողջ ջանքը ներդնում եմ այդ հիմնադրամների միջոցով պետությանն օգտակար լինելու մեջ»,-ասել է նա՝ ընդգծելով, որ երկու հիմնադրամն էլ ծավալուն աշխատանքային դաշտ ունեն և 2019 թվականին իսկապես բազմակողմանի աշխատանքներ են տարել. յուրաքանչյուրն՝ իր մասով:

Աննա Հակոբյանը հիշեցրել է, որ «Ժպիտների քաղաք» հիմնադրամի միջոցներով 200-ից ավելի երեխաներ ստացել են անվճար բուժօգնություն, սնունդ, հիվանդանոցում գտնվելու ընթացքում նրանց ընտանիքի անդամներն օգտվել են հոգեբանի ծառայությունից, որովհետև այն հիվանդության պարագայում, որ իրենք են հաղթահարում, դա շատ կարևոր է իրենց և ընտանիքի համար: Բժշկական անձնակազմն է վերապատրաստվել, բազմաթիվ ծրագրեր են կատարվել:

«Իմ քայլը» հիմնադրամի աշխատանքներն ավելի լայն շրջանակներ ունեն:

«Բոլորովին վերջերս ունեցանք դրամահավաք-երեկո, որի ժամանակ մանրամասն հաշվետվություն ներկայացրեցինք արված աշխատանքների վերաբերյալ: Շուտով հաշվետվությունը լրատվամիջոցների և հանրության համար հասանելի կլինի տեսահոլովակի տեսքով»,-նշել է նա:

Աննա Հակոբյանը հիշեցրել է, որ հեղափոխությունից հետո հիմնադրամների գործունեությունը դադարեցվել էր, շատ լուրջ խնդիրներ էին ի հայտ եկել, որոնք անհրաժեշտ էր արագ լուծել

«Իմ քայլը» տվեց «Լույս» հիմնադրամի խոստացած կրթաթոշակները: Այժմ ընթացքի մեջ է մեր կրթաթոշակային ծրագիրը»:

Վարչապետի տիկինը նշել է, որ մեկ տարվա ընթացքում շուրջ 700 մլն աշխատավարձ է տրվել Ֆիլհարմոնիկ նվագախմբին ու բազմաթիվ այլ ստեղծագործական խմբերի:

«Մեր ծրագրերը դեռ առջևում են: Ճգնաժամային իրավիճակում պետք է լուծումներ տրվեին և արվեց, բայց դա շարունակական է լինելու: Ես արդեն նշել եմ, որ այս երկու հիմնադրամները լուծում են այն խնդիրները, որոնց մասին պետությունը դեռևս չի մտածել, կամ հերթը դրան չի հասել»,-ասել է Հակոբյանը՝ նշելով, որ իրենք առաջարկում են լուծումներ և այն պահին, երբ պետությունը դաշտը կվերցնի իր հովանավորության տակ և կֆինանսավորի, իրենք դուրս կգանք այդտեղից և այլ տեղ իրենց անելիքները կփնտրեն:

Ինչ վերաբերում է հիմնադրամի հովանավորներին և արդյո՞ք նրանք անշահախնդիր են, Աննա Հակոբյանն ասել է, որ գուցե ինչ որ ակնկալիքներ կան պետությունից, որովհետև սովորույթի ուժը մեծ է, բայց շատ ժամանակ է անցել և բոլորի կասկածներն այդ առումով փարատվել են, բոլորի շահախնդիր մոտեցումները հօդս են ցնդել և չեն արդարացել: Բոլորը հասկացել են, որ այս հիմնադրամներին նվիրատվություններ անելու համար պարզապես պետք է արժևորել այդ ծրագիրը և ցանկանալ մասնակցություն ունենալ:

«Ես չեմ բացում և չեմ կարդում, թե ով է մեզ նվիրատվություն անում: Ինձ համար դա կարևոր չէ, ինձ համար դա ոչինչ չի փոխում»,-եզրափակել է Աննա Հակոբյանը:

 

Նշենք, որ «Շանթ» հեռուստաընկերության «Հորիզոն» լրատվական թողարկման շրջանակում երեկ երեկոյան հեռարձակվել է ՀՀ վարչապետի տիկին Աննա Հակոբյանի հետ հարցազրույցից մի հատված: Ամբողջական հարցազրույցը կլինի հունվարի 1-ին՝ SHANTNEWS-ով: