Ովքեր են ամենաշատ բացակայած, ամենաշատ դեմ քվեարկած ու մյուս «ամենա…» պատգամավորները. հրապարակվել են հերթական մոնիթորինգի արդյունքները

«ԱԺ Մոնիթորինգ» ծրագիրն ամփոփել է 7-րդ գումարման Ազգային ժողովի 3-րդ նստաշրջանի գործունեության դիտարկման արդյունքները: Ամփոփումը կազմվել է լրագրողական դիտարկումների, փորձագիտական վերլուծությունների և parliamentmonitoring.am կայքի վիճակագրական ծրագրի տվյալների համադրմամբ: Եվ այսպես՝  ովքե՞ր են այս անգամ խորհրդարանական ամենա-ամենաները:

Մոնիթորինգի տվյալների հերթական ներկայացմանը հրավիրված էին նաև խորհրդարանական խմբակցությունների մեկական պատգամավորներ: Մինչ «Լուսավոր Հայաստանի» ներկայացուցիչը կգար ու տվյալների ներկայացումը կսկսվեր, արդեն ներկա մյուս երկու խմբակցությունների պատգամավորներից մեկը՝ «իմքայլական» Համազասպ Դանիելյանը, կեսլուրջ-կեսկատակ քննարկում էր, թե ինչ նոր «ամենաներ» կարելի է ավելացնել  մոնիթորինգի ցանկում, օրինակ, «ամենաանտեղի խոսացող»  կամ «ամենանեղացկոտ պատգամավոր»:

«Լուսավոր Հայաստանի» ներկայացուցիչը աշխատանքային զբաղվածության պատճառով այդպես էլ չեկավ: Մոնիթորինգ ծրագրի ղեկավարը սկսեց այն տվյալներից, որտեղ ամենամեծ փոփոխություններն են գրանցվել: 7-րդ գումարման 3-րդ նստաշրջանում ընդունված օրենքների 30 տոկոսը հեղինակել է խորհրդարանը, 70 տոկոսը՝ կառավարությունը: Սա բացառիկ ցուցանիշ է: Բացառիկությունը հասկանալու համար պետք է համեմատել այն նախորդ խորհրդարանների ցուցանիշների հետ: Նախորդների ժամանակ անգամ 5%-95% հարաբերակցություն է եղել:

Կա տպավորություն, թե հիմա սա կառավարության և խորհրդարանում մեծամասնություն կազմող  քաղաքական ուժի որոշակի պայմանավորվածության արդյունք է: Սակայն մեկ այլ ցուցանիշ կա, որը չի կարող լինել որևէ պայմանավորվածության արդյունք: Այս խորհրդարանում խոսացող պատգամավորներն են շատ: 132-ից ընդամենը 20-նն է պասիվ ու չի մասնակցում քննարկումների: Իսկ նախկինում խորհրդարաններ են եղել , որտեղ լռել են պատգամավորների կեսից ավելին, օրինակ 105-ից 65-ը:

Մյուս էական տարբերությունը  նախորդ խորհրդարանների և այս դեպքում նաև նույն խորհրդարանի նախորդ նստաշրջանի  հետ է: Էականորեն ավելացել է ընդդիմադիր խմբակցությունների հեղինակած և ընդունված օրինագծերի թիվը: Սա նաև ընդդիմադիր պատգամավոր Սերգեյ Բագրատյանը արձանագրեց, նշելով, որ նախորդ խորհրդարանում ընդհանրապես իմաստ չկար ընդդիմության կողմից նախագիծ առաջարկելը, քանի որ ի սկզբանե պարզ էր, որ այն մերժվելու է:

Ընդդիմադիր պատգամավորը, իհարկե, նաև դիտողություններ էլ ուներ: Հիշեցրեց, որ ընդդիմադիրների կողմից առաջարկված օրինագծերի ընդունումից բացի մերժումներն էլ են շատ եղել:

Ի վերջո, հերթը հասավ ամենաներին: Սկսենք ամենաշատը «կողմ» քվեարկածից: Այստեղ առաջինը Կարինե Պողոսյանն է ԲՀԿ-ից: Կողմ կոճակը սեղմել է 189 անգամ, իսկ «դեմ» ամենաշատը քվեարկել է Հայկ Սարգսյանը՝ «Իմ քայլից»: «Դեմ» կոճակը սեղմել է 30 անգամ:

Ամենաշատը հարց տվել ու ելույթ է ունեցել Միքայել Մելքումյանը, իսկ ո՞վ է ամենաշատը բացակայել: Էական տարբերությունը նախորդ խորհրդարանների համեմատ նաև այստեղ է: Առաջ ամենաշատ բացակայողները գործարարներն էին, հիմա՝ ամենաշատ գործուղումների մեկնողները: Ամենաշատ բացակայողների առաջին տեղում վաղուց արդեն Գագիկ Ծառուկյանը չէ: ԲՀԿ-ի ղեկավարը բացակայողների նույնիսկ առաջին հնգյակում չկա: Իսկ առաջատարն այսուհետև Արուսյակ Ջուլհակյանն է՝ «Իմ քայլից»:

Խնդիր կա այս հանգամանքը որոշակիորեն հաշվի առնելու, որպեսզի չստեղծվի տպավորություն, թե շատ բացակայողը քիչ արդյունավետ է աշխատում, այնպես, ինչպես շատ խոսելը միշտ չէ, որ բացարձակ դրական ցուցիչ է: