Գյումրիի 55 փողոցներում ընթացիկ նորոգումներ կկատարվեն

Գյումրիում ընթացիկ նորոգման, այսինքն՝ փոսալցման ծրագրում այս տարի 55 փողոց է ընդգրկված: 120 մլն դրամով քաղաքապետարանը երթևեկելի վիճակի է բերելու կենտրոնական ու երկրորդային փողոցներ: Այս շարքում կան այնպիսիք, որոնք ընդգրկված են հիմնանորոգման ծրագրերում:

Վերակառուցման և զարգացման եվրոպական բանկի ու համայնքային զարգացման հիմնադրամի վերանորոգման ծրագրերում մի շարք փողոցներ ու հրապարակներ են ընդգրկված, բայց շինաշխատանքների մեկնարկի ժամկետներն են անորոշ: Դրա համար էլ մինչ հիմնանորոգումները ընթացիկ սպասարկման աշխատանքներով են փողոցները երթևեկելի վիճակի բերվում:

Հատուկ տեխնիկան Հաղթանակի պողոտայի այն հատվածներն է փորում, որտեղ փոսեր էին գոյացել: Քաղաքի ամենաբանուկ փողոցի ամբողջ երկայնքով հիմա փորված փոսեր են, ինչն այսօր դարձել է վարորդների դժգոհության առիթ: Շրջանցում են փոսերը, երբեմն էլ չի ստացվում չհայտնվել փոսերում:

Դժգոհությունը ժամանակավոր է, շահագործման ժամկետ ունեն նաև Հաղթանակի պողոտայում փոսալցման աշխատանքները: Դրանք արվում են մինչև տարեվերջ հիմնանորոգելու պայմանով: Հաղթանակի պողոտան ընդգրկված է համայնքային զարգացման հիմնադրամի հիմնանորոգման ծրագրերում: Քանի դեռ ժամկետներն անորոշ են, փոսալցման աշխատանքները չեն չեղարկել:

«Եթե հիմնանորոգման ժամանակ խճային հիմք նախատեսված չէ, անպայման փոսային նորոգում է կատարվելու: Դրա հետ մեկտեղ վերին շերտ է կատարվելու: Տարբերություն չկա՝ հիմա՞ ենք կատարել, թե՞ հետո: Ավելի լավ է հիմա փոսային նորոգում կատարվի, որ ճանապարհի երթևեկելի մասն էլ բարվոք լինի»,- SHANTNEWS.am-ին ասել է «Մերձմոսկովյան» ԲԲԸ աշխղեկ Արթուր Մարդոյանը:

Պարզվում է՝ հիմա էլ հիմնանորոգումից առաջ են փոսալցումներ կատարվելու. շինարարները նման մասնագիտական բացատրություն տվեցին: Հիմնանորոգման ժամանակ գումարները փողոցաշինական ծրագիրն է տրամադրում, փոսալցումը տեղական բյուջեից է կատարվում: Նույնը նաև կայարանամերձ հրապարակի դեպքում է: Վերակառուցման և զարգացման բանկի այս տարվա ծրագրերում է հրապարակի հիմնանորոգումը: Այս տարվա մրցութային փաթեթները 3 մասի են բաժանել: Կայարանամերձ հրապարակը երրորդ մասով է, որի համար դեռ մրցույթ չի կայացել: Մինչ մրցույթն ու շինաշխատանքները փոսալցման աշխատանքներն արդեն ավարտել են:

«Կայարանամերձ հրապարակը ընդգրկված է ՎԶԵԲ ծրագրում, բայց մենք ընթացիկ նորոգել ենք, քանի որ քանդված տեղեր կային: Դրա համար անհրաժեշտություն առաջացավ կատարել փոսային նորոգում մինչև աշխատանքները սկսելը: ՎԶԵԲ ծրագրի առաջին փուլի մրցույթը կայացել է, հաղթել է «Մերձմոսկովյան» ԲԲԸ-ն: Երկրորդ փուլի մրցույթը նույնպես կայացել է: Ժամկետները չեմ կարող ասել: Առաջին փուլի պայմանագիրը կնքված է, երկրորդ փուլից տեղեկություն չունեմ՝ կնքվա՞ծ է պայմանագիր, թե՞ ոչ»,- SHANTNEWS.am-ին ասել է Գյումրիի քաղաքապետարանի բնակկոմունալ և շրջակա միջավայրի պահպանության բաժնի գլխավոր մասնագետ Աշոտ Գալստյանը:

Վերակառուցման և զարգացման եվրոպական բանկի փողոցաշինական մեծ ծրագրում ընդգրկված մյուս փողոցները սպասում են: Մեծ մասի համար մրցույթները կայացել են, կապալառու ընկերությունները հայտնի են, նրանց հետ պայմանագիր կնքվել է, բայց մեկնարկի ժամկետները դեռ հստակ չեն:

Եվս մեկ փողոց էլ, չնայած մասնակի, հիմնանորոգվել է: Խոսքը Խրիմյան Հայրիկ փողոցի մասին է, որի մի հատվածը, որը տանում է դեպի ավտոմաքսատուն, հիմնանորոգվել է, մյուս՝ Հայուհու հրապարակին միացնող մասը փոսային է եղել:

Ընդհանուր առմամբ, այս տարի Գյումրիում 55 փողոցում են ընթացիկ նորոգումներ լինելու: Քաղաքային բյուջեին այդ աշխատանքները կարժենան 120 մլն դրամ: Մեծ մասում ավարտել են: Գյումրիի հիմնանորոգված և հիմնանորոգման սպասող փողոցների կողքին 20 հազար քառակուսի մետր մակերեսով ճանապարհ դեռ փոսային նորոգումներով է շահագործվում: