Գյումրիի բուհերում պլանային տեղերը չեն լրացվել

Ամփոփվել են բուհերի ընդունելության քննությունների արդյունքները:

Հիշեցնենք, որ այս տարի, համաճարակով պայմանավորված, դիմորդները միայն մեկ միասնական քննություն են հանձնել մասնագիտական առարկայից: Համաձայն քննությունների արդյունքների՝ ցածր են եղել «Հայոց լեզու» և «Մաթեմատիկա» առարկաների միջին գնահատականները: Ըստ այդմ՝ առանձին մասնագիտություններ հայտագրած դիմորդներն անբավարար գնահատականներ են ստացել և չեն կարողացել ընդունվել: Թեժ մրցակցություն է ծավալվել մայրաքաղաքի բուհերում, որտեղ անգամ 17 միավորը չի բավականացրել ընդունվելու համար: Գյումրիի բուհերում այս տարի ընդունված դիմորդների քանակն ավելին է, քան նախորդ տարի, բայց էլի հատկացված պլանային տեղերը չեն լրացել:

Մեկ քննությունն առավելություն դիտարկվեց ոչ այնքան դիմորդների, որքան բուհերի համար: Օրինակ՝ տնտեսագիտական համալսարանի Գյումրիի մասնաճյուղը: Այստեղ անվճար ու վճարովի տեղերի համար նախորդ տարիներին պարտադիր էր 3 քննություն հանձնելը: Այս տարի մեկ քննությունը ավելացրել է դիմորդների, հետևաբար և ընդունվողների թիվը:

«Եթե նախկինում 3 քննությունից դուրս գալով չէին ընտրում մեր բուհը, որովհետև չէին ուզում 3 քննություն հանձնել, չէին ուզում անգլերեն լեզու հանձնել, հիմա հնարավորություն է ստեղծվել մեկ միասնական քննությամբ ընտրություն կատարել որակի միջև: Մենք ընդունելություն կազմակերպել ենք 3 մասնագիտությունների գծով: Ունեցել ենք 103 դիմորդ, 88-ը ընդունվել է, 15-ը անբավարար գնահատական է ստացել»,- SHANTNEWS-ին  ասել է ՀՊՏՀ Գյումրիի մասնաճյուղի ընդունող հանձնաժողովի պատասխանատու քարտուղար Ղարիբ Հարությունյանը:

103 դիմորդ են ունեցել, ընդունվել է 88-ը: Սա վերջին երեք ուսումնական տարիների ընթացքում ընդունելության ամենաբարձ ցուցանիշն է տնտեսագիտական համալսարանի Գյումրիի մասնաճյուղում: Մրցույթ, որպես այդպիսին, ոչ մի բաժնում չի եղել, տեղերն ավելի շատ են, քան դիմորդների թիվը: Միակ քննության գնահատականը կարևոր ու որոշիչ է եղել անվճար տեղերը լրացնելու հարցում:

Ազգային պոլիտեխնիկական համալսարանի Գյումրիի մասնաճյուղում անգամ անվճար տեղեր են թափուր մնացել: Երկու մասնագիտությունների դեպքում էլ ընդամենը 2-ական ուսանող է ընդունվել: Այդուհանդերձ, այս տարի ընդունվածների թիվն այս բուհում էլ ավելին է նախորդ տարիներից: Պոլիտեխնիկական համալսարանում այս տարի անվճար տեղերի քանակն ավելացել է: Կառավարությունը խթանում է կրթությունը տեղեկատվական տեխնոլոգիաներ բաժիններում:

«Վերջին տարիների ընթացքում առաջին անգամ առողջ խմբեր ենք ձևավորել: 18, 19, 20 հոգանոց խմբեր են: Ընդունվել է 76 դիմորդ՝ այս պահի դրությամբ: Նրանցից 46-ը պետպատվերի համակարգում է»,- SHANTNEWS-ին ասել է ՀԱՊՀ Գյումրիի մասնաճյուղի տնօրեն Աշոտ Պապոյանը:

Տեղեկատվական տեխնոլոգիաներ բաժնում դիմորդներն ամենաշատն են եղել, նաև ամենաշատ անբավարար գնահատական ստացածներն են այս բաժինը հայտագրածները: Անցողիկ շեմը չհաղթահարածների թիվը փոքր չէ նաև Շիրակի պետական համալսարանում: 448 դիմորդից 328-ն է ընդունվել: Կան բաժիններ, որտեղ մեկական դիմորդ է ընդունվել: Դրանք բնագիտական հոսքի մասնագիտություններն են, որտեղ վերջին տարիներին դիմորդների թվի նվազում է տեղի ունենում:

«Մեկական ընդունվողներ ունենք Մաթեմատիկա, Ֆիզիկա, Դեղագործական քիմիա, Շուկայագիտություն բաժիններում: Լրագրության բաժնում 10 դիմորդ ունեինք: Նրանցից 6-ն անբավարար գնահատական է ստացել: 3 օր առաջ հանրապետական ընդունող հանձնաժողովի նիստում քննարկվում էին քննությունների արդյունքները: Իրավիճակն այսպիսին էր, որ դժգոհ էին հայոց լեզու և մաթեմատիկա առարկաների միջին գնահատականներից: Ինձ թվում էր, որ այս տարվա արդյունքները պետք է լավը լինեին: Համենայնդեպս, 3 ամիս մեր բոլոր դիմորդները կենտրոնացել էին մեկ առարկայի վրա, բայց արդյունքները սպասվածի նման չէին»,- SHANTNEWS-ին ասել է ՇՊՀ ռեկտորի ժամանակավոր պաշտոնակատար Երվանդ Սերոբյանը:

Փոխարենը՝ այս տարի մրցակցությունը մեծ է եղել ֆիզիկական պատրաստություն բաժնում: Այստեղ դրական գնահատական ստացած 23 դիմորդ մրցույթից դուրս է մնացել ու չի ընդունվել: Դրական ստացած, բայց չընդունված դիմորդների համար այսօրվանից մեկնարկել է ընդունելության երկրորդ փուլը: Բուհերում թափուր տեղերի մրցույթին կարող են մասնակցել այն դիմորդները, որոնք տվյալ մասնագիտության համար մասնագիտական համարվող առարկայից են քննություն հանձնել, դրական գնահատական են ստացել և չեն ընդունվել: