Գյումրիի դպրոցները նախորդ տարվա համեմատ ավելի շատ առաջին դասարանցիներ են ընդունել

Նոր ուսումնական տարին կմեկնարկի սեպտեմբերի 15-ին՝ հակահամաճարակային կանոնների պահպանմամբ: Սա այն է , ինչ հայտնի է դասերի վերսկսման մասին: Կրթության, գիտության, մշակույթի և սպորտի նախարարությունն առայժմ մանրամասներ չի ներկայացրել, թե ինչպիսի խմբերի են բաժանվելու դասարանները և նոր ուսումնական տարվա մեկնարկի երկշաբաթյա հետաձգումը ինչպիսի ծրագրային փոփոխություն է ենթադրում: Մեկ բան հաստատ է, որ երկարաձգվել է առաջին դասարանցիների ընդունելությունը: Մինչև սեպտեմբերի 15-ը օնլայն հայտերն ընդունվում են: Սա հնարավորինս հավասար մրցակցային պայմաններ ստեղծեց դպրոցների միջև: Արդյունքում  աշակերտների թվով փոքր դպրոցներում, նախորդ տարվա համեմատ, ավելի շատ առաջին դասարանցիներ են ընդունել:

Այս տարի առաջին անգամ սահմանափակում դրվեց , թե որ դպրոցը քանի առաջին դասարանցի է ընդունելու: Ամեն դպրոցի համար այդ թիվը տարբեր է՝ կախված լիցենզավորումից: Իսկ լիցենզիա դպրոցները ստանում են ելնելով շենքային պայմաններից: Գյումրիի թիվ 10 դպրոցը շենքային լավ հնարավորություններ ունի,  այս տարի մինչև 120 առաջին դասարանցի ընդունելու իրավունք է ստացել: Հայտագրվածները մեկ երրորդն են կազմում, բայց սա էլ դպրոցի համար վերջին տարիների համար  լավ ցուցանիշ է համարվում։

«Նախորդ տարիներին ձևավորել  ենք մեկական առաջին դասարաններ,իսկ այս տարի կունենանք երկուսը: Անգամ երկրորդ դասվարի մրցույթ ենք հայտարարել, որովհետև չունենք մասնագետ: Ներկա պահին ունենք 39 հայտագրում: Սա վերջնական թիվը չէ, մենք կանխատեսում ենք, որ մինչև 50 առաջին դասարանցի կունենանք»,-shantnews-ին ասել է Գյումրիի թիվ 10 հիմնական դպրոցի տնօրեն Լիանա Վարդանյանը:

Թիվ 23 միջնակարգ դպրոցում 5 առաջին դասարան են ձևավորելու: Վերջին տարիներին այս թիվը գրեթե չի փոխվում: Դպրոցը թաղամասում միակն է: 1250 աշակերտ ունի : Մեծ թիվն առավելություն է ֆինանսավորման համար, բայց այս ուսումնական տարում մտահոգության առարկա է նաև: Ինչպես են կազմակերպելու ուսումնական պրոցեսը համավարակի պայմաններում:

«Եթե  դասարանները խմբերին են բաժանվելու, ապա մենք միահերթ աշխատել չեն կարողանա: Երկու հերթով շատ լավ կկազմակերպենք կրթական պրոցեսը: Երևի դիմակը, ախտահանող միջոցները, դպրոցում սանիտարական նորմերը պահպանելը , ջերմաչափումը կլինեն պարտադիր: Դասարանները խմբերի բաժանելու դեպքում պետք է նաև դասաբաշխումը ճիշտ կատարվի, որպեսզի նախ ուսուցիչներին ծանրաբեռնվածություն չլինի »,-shantnews-ին ասել է Գյումրիի թիվ 23 միջնակարգ դպրոցի տնօրեն Հակոբ Գևորգյանը:

Աշակերտների թվով փոքր դպրոցներում դասարանները խմբերի բաժանելը շատ ավելի հեշտ է լինելու: Աշակերտների խտությունը մեծ չէ: Բայց դեռ հստակեցված չէ, թե մեկ դասասենյակում քանի աշակերտի ներկայությունն է թույլատրելի լինելու:

Դպրոցներում դեռ դասաբաշխում չեն կատարել:Որոշված չէ, թե առարկայի դասավանդումը նույն դասարանում մեկ , թե երկու մանկավարժի միջև է բաշխվելու:

«Եթե այդ տարբերակով են անցկացնելու դասերը, կնշանակի, որ ուսուցիչը պետք է 2 կամ 3 անգամ յուրաքանչյուր դասարան մտնի: Հետևաբար նրան 2 կամ 3 անգամ ավել պետք է վարձատրվի: Սա իր հետ բերում է ֆինանսական ծախսեր: Այդ ծախսերը լինելու է, թե ոչ, փակվելու է, թե ոչ, պետության կողմից է լինելու, թե լինելու է հաստատության ուսերին: Այս ամենը դեռ պարզաբանված չէ»,-shantnews-ին ասել է Լիանա Վարդանյանը:

Ուսուցիչները դեռ արձակուրդում են: Փոքր- ինչ երկար ամառային արձակուրդների շրջանը դպրոցներն օգտագործել են վերանորոգման աշխատանքների համար:Պատուհանների, դռների ու մարզադահլիճների նորոգումներ են կատարում: Այդ աշխատանքներն ավարտին հասցնելուն ուսումնական տարվա ուշ մեկնարկն  օգնելու է: