Գյումրիի Բուլվարային թաղամասի գլխավոր փողոցի մի հատվածը հիմնանորոգման նախագծից դուրս է մնացել․բնակիչները պահանջում են վերանայել շինփաստաթուղթը

ՎԶԵԲ-ի փողոցաշինական ծրագրի Տրանշ 3-ով, ոչ ամբողջական, հիմնանորոգվում է Արագած՝ նախկին  Բուլվարային թաղամաս հասնող գլխավոր ճանապարհը։ Փողոցի երկարությունը մոտ 650 մետր է, բայց կապիտալ նորոգման նախագիծ ընդգրկվել է  միայն սկզբնամասը՝ մոտ 500 մետրը։ Թաղամասի  բարձրահարկ շենքեր ու տնակային ավան տանող հատվածը հիմնանորոգման ծրագրից դուրս է մնացել։  Բուլվարայինը Գյումրիում միակ թաղամասն է, որտեղ 88-ից հետո պահպանվում են 9 հարկանի բնակելիները։ Հիմա շենքերի և տնակային ավանի բնակիչները պահանջում են փողոցի շարունակությունը ևս ընդգրկել շինարարության ծավալներում։

9 հարկանիներում և տնակային ավանում 100 ընտանիք է բնակվում, նրանց ընտանիքի անդամների ամենօրյա անցուդարձը նույն փողոցով է, որտեղ ինչպես բնակիչներն են ասում, ոտք դնելու մաքուր տեղ չկա։ Անձրևներից հետո ցեխի հաստ շերտն ու ջրափոսերը քայլելու տեղ չեն թողնում։

«Արդեն 25 տարի է՝ երկու զույգ կոշիկով կհասնինք կենտրոն, որ ընդեղից փոխվենք ու էրթանք մեր գործերին»,- ասում էր բնակիչներից մեկը։

Ռետինե կրկնակոշիկներով պտույտը մինչև քանդված փողոցի վերջն է, որից հետո կարելի է փոխել դրանք, հագնել քաղաքի կենտրոն հասնելու կոկիկ կոշիկները և հանգիստ նստել տրանսպորտ ։ Քաղաքային  տրանսպորտի վարորդներն էլ են հրաժարվել հասնել թաղամասի վերջնամաս։

Փողոցաշինական աշխատանքները միայն Դուդկո փողոցի սկզբնամասում են։Նորոգումները, փաստորեն, չեն հասնելու վերջնամաս, ուր ավելի քայքայված վիճակ է։

«Մեր բնակիչներիս պահանջն է, որ էս ճանապարհը, որը սարքվում է, գոնե մոտեցվի հասցվի վերջնամասի շենքերին։ Էդ պրոյեկտ կազմողներ թող մի քիչ տարածք ավելացնեն՝ մի 100-150 մետրի չափով, որ ասֆալտապատ մասը հասնի նաև դիմացի շենքեր»,- պահանջում էին բնակիչները։

Շինընկերությունն աշխատանքները սկսել է նախագծով հաստատված ծավալով, որում փողոցի մոտ 150 մետրը չի ընդգրկվել կապիտալ ասֆալատապատման ծրագրում։

«Ես արդեն իմ ղեկավարությանն ասել եմ, որ բնակիչները բողոքում են, բայց իրենք էս հարցին լուծում տալ չեն կարող, մենք կառուցողն ենք, էդ նախագիծը մեր համար սուրբ գիրք է, մենք էդ գրքի վրա երդում ենք կերել, էդ էլ պիտի սարքենք»,- ասում է «Մերձմոսկովյան» ՓԲԸ աշխղեկ Գալուստ Բախչինյանը։

Շինարարի համար կարևոր «սուրբ» փաստաթուղթը՝ նախագիծը կազմվել է դեռ նախորդ տարի և հաստատվել պատվիրատուի կողմից, որից հետո է միայն հայտարարվել շինարարի մրցույթ։ Վերջնական հաստատված նախագծով ընդամենը երկու շաբաթ է, որ սկսվել են աշխատանքները։ Ավարտի ժամկետը 3 ամիս է։

Շինարարը նախագծից շեղվել չի կարող, իսկ նախագիծ փոխել, պատվիրատուն՝ տվյալ դեպքում քաղաքապետարանը, այս պահին նպատակահարմար չի համարում։ Այն, որ շինարարության ընթացքում հնարավոր է նախագծային փոփոխություններ կատարել, այդ մասին բնակիչները հայտնել են իրենց բողոքներում՝ հաշվի առնելով նախորդ տարիների նախադեպերը։ Բուլվարային թաղամասի բնակիչները բողոք դիմումներ են ուղարկել կառավարությանը, համապատասխան գերատեսչություններին և սպասում են պատասխանի։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։