Աշխատանք արքայական ընտանիքում. ինչ փորձությունների միջով են անցնում ապագա դայակները

Նա պետք է ինքնապաշտպանության հնարքներին տիրապետի, կարողանա առաջին օգնություն ցույց տալ, տեղյակ լինի հոգեբանության հիմունքներին և էքստրեմալ վարմանը տիրապետի: Այս բոլորը պահանջներ են, որ ներկայացվում են, ոչ թե հատուկ գործակալներին, այլ դայակին, ով ցանկանում է աշխատել անգլիացի միապետների ընտանիքում: Adme-ն առանձնացրել է արքայական ընտանիքի դայակին ներկայացվող մի քանի պահանջ:

Կրթությունը

Դայակ դառնալու համար բավարար չէ սիրել երեխաներին: Արքայական ընտանիքների զավակների դայակները լուրջ կրթություն են ստանում Norland College-ում, իսկ այնտեղ ամեն մեկը չի կարող սովորել: Դիմորդը պետք է առնվազն լավ կառուցվածք ունենա ու անբիծ կենսագրություն: Նա նաև պիտի հրաշալի տիրապետի անգլերենին:
Այստեղ ուսման ժամանակ աղջիկները ոչ միայն սովորում են, թե ինչպես պետք է խնամել երեխաներին, այլև սովորում են

• Հոգեբանություն
• Պատմություն
• Փիլիսոփայություն
• Սոցիոլոգիա
• Գրականություն

Նախնական պրակտիկա

Ուսման ընթացքում դայակները փորձ են ձեռք բերում ռոբոտ-երեխաների վրա: Որևէ դայակի արքայական ընտանիքի նորածնի չեն վստահի, եթե նա մինչ այդ չի փորձել հոգ տանել էլեկտրոնային երեխայի մասին: Ռոբոտացված նորածինները կարող են ապագա դայակին գիշերն արթնացնել և խնդրել կերակրել կամ պարզապես ուշադրություն պահանջել: Ուսանողուհին իրավունք չունի փոքրիկին մերժել:

Դայակը նաև թիկնապահ է

Դայակը պետք է կարողանա պաշտպանել իրեն և երեխային, այդ պատճառով աղջիկներն ինքնապաշտպանության կուրսեր են անցնում: Ընդ որում՝ մարտական հմտություններ դասավանդում են հետախուզության նախկին սպաները: 3-ամյա ուսուցման վերջին կուրսում ուսանողուհիներին սովորեցնում են նաև առաջին օգնություն ցուցաբերել:

Հրաշալի վարորդ

Թագավորական դայակը հրաշալի վարորդ է: Քանի որ դայակն ու երեխան պետք է 100 տոկոսանոց անվտանգության մեջ լինեն, դայակներին սովորեցնում են էքստրեմալ վարման հմտությունները: Դասընթացի ավարտին աղջիկները կարողանում են մեքենա վարել անգամ ամենադժվար իրավիճակներում:

Գլխավոր դայակը պալատում

Արքայազն Ուիլյամն ու նրա կինը՝ դքսուհի Քեյթը իրենց երեք զավակների համար մի խումբ դայակների չեն վարձել, բոլոր երեխաների համար պատասխանատուն նույն դայակն է՝ Մարիա Բորրալլոն:

Նա Norland College-ն ավարտել է 20 տարի առաջ, ապա Պալատում անցել իր պարտականությունների կատարմանը, երբ արքայազն Ջորջը 8 ամսական էր. Բորրալլոն այս ընտանիքին օգնում է մինչ օրս:

Թագավորական ընտանիքը դայակի կյանքում միակն է

Դայակը պետք է դառնա արքայական ընտանիքի մի մասնիկը: Նա երեխաներին ուղեկցում է ամենուր, անգամ տոների ու ճանապարհորդությունների ժամանակ:
Դայակը պետք է ապրի պալատում՝ իր խնամյալների կողքին: Եղիսաբեթ 2-րդի որդու՝ արքայազն Էնդրյուի դայակի հրապարակված նամակներից պարզ է դառնում, որ նրա աշխատանքային օրն ավարտվում էր 20:30-ին, մինչ այդ նա անգամ հեռախոսով զրուցելու իրավունք չուներ:
Կարգն այդպիսին էր, սակայն, 1960-ին, պահպանվել է այն մինչ օրս, թե ոչ՝ հայտնի չէ:

Դայակը կարողանում է գաղտնիքներ պահել

Արքայական ընտանիքների դայակները դուքսի և դքսուհու կյանքի մասին կարող են իմանալ միայն այն, ինչ նրանք հարկ կհամարեն հայտնել հանրությանը: Պալատների վերաբերյալ բամբասանքներ պիտի չլինեն: Դուք երբեք դայակին չեք գտնի սոցցանցերում, և ոչ մի ամսագրում նրա հարցազրույցը չեք տեսնի: Պալատի ցանկացած աշխատակից, այդ թվում՝ դայակը, աշխատանքի ընդունվելիս փաստաթուղթ է ստորագրում, որում պարտավորվում է լեզուն ատամների հետևում պահել:

Դայակը երբեք չի հարվածում երեխային

Երեխային հարվածելն արգելված է բոլոր դայակներին, ոչ միայն՝ էլիտար: Սակայն եթե Norland College-ի շրջանավարտը իր խնամքի տակ գտնվող փոքրիկի վրա ձեռք բարձրացնի, դա անմիջականորեն կազդի քոլեջի հեղինակության վրա: Դայակն իրավունք չունի անգամ կոպիտ քաշել երեխայի ձեռքից:

Դայակը չի փոխարինում ծնողներին

Անգամ այսպիսի բարձրակարգ դայակները հաշվի են առնում, որ երեխաների համար կարևորը ծնողներն են, այդ պատճառով չեն ձգտում փոխարինել նրանց ծնողներին:
Norland College-ում ապագա դայակներին խորհուրդ են տալիս ծնողներին ևս մասնակից դարձնել երեխաներին լողացնելիս կամ քնեցնելիս: