ԱԺ-ում տեղի ունեցած աշխատանքային հանդիպման առանցքում մարդու իրավունքների պաշտպանության խնդիրներն էին

ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանի նախաձեռնությամբ ՀՀ և ԱՀ Մարդու իրավունքների պաշտպանների մասնակցությամբ սեպտեմբերի 9-ին կայացել է աշխատանքային քննարկում:

Օրակարգում էին 2020 թ. սեպտեմբերի 27-ից Արցախի Հանրապետության դեմ Ադրբեջանի սանձազերծած պատերազմի ընթացքում և հետպատերազմյան շրջանում Արցախում մարդու իրավունքների վիճակին և ՀՀ ու ԱՀ Մարդու իրավունքների պաշտպանների, ՀՀ ԱԺ համապատասխան հանձնաժողովի, Սփյուռքի և միջազգային կառույցների համագործակցությանը վերաբերող հարցերը:

Անցնելով օրակարգային հարցերին՝ Արցախի Մարդու իրավունքների պաշտպան Գեղամ Ստեփանյանը կարծիք է հայտնել, որ նման քննարկումները հնարավորություն են տալիս ավելի ընդգրկուն ներկայացնելու ոլորտի խնդիրները հատկապես հետպատերազմյան շրջանում: Վերջինս բարձրաձայնել է Արցախում կապի և հաղորդակցության խնդիրը՝ արձանագրելով, որ թեպետ Արցախի պատկան մարմինները և կապի օպերատորները միջոցներ են ձեռնարկում, այդուհանդերձ խնդիրը չի լուծվում: Կան սահմանամերձ բնակավայրեր, որտեղ կապը բացակայում է:

«Կասկած չկա, որ Ադրբեջանն է դա իրականացնում խլացուցիչների միջոցով»,- ասել է նա:

Գեղամ Ստեփանյանը խնդրի լուծման տեսանկյունից կարևորել է հատկապես ՀՀ մասնավոր ընկերությունների ներգրավումը:

ԱՀ ՄԻ պաշտպանը խոսել է նաև ջրի հարցի մասին:

«Եթե ադրբեջանական գործոնը Ստեփանակերտի պարագայում այդքան արտահայտված չէ, ապա համայնքների դեպքում պատկերն այլ է»,- ընդգծել է զեկուցողը:

Գեղամ Ստեփանյանը խոսել է նաև տեղահանված անձանց իրավունքների պաշտպանության և աշխատանքային խնդիրների մասին: Նրա դիտարկմամբ՝ այս փուլում պետք է իրականացվեն թիրախային կարճաժամկետ ծրագրեր, վիճակը կայունանալուց հետո՝ զարգացման ծրագրեր:

ՀՀ ՄԻ պաշտպան Արման Թաթոյանի խոսքով՝ ակնհայտ է, որ թե՛ Հայաստանում, թե՛ Արցախում խնդիրները նույնաբնույթ են: Թաթոյանն անդրադարձել է կյանքի իրավունքի խնդիրներին, սեփականության իրավունքի զանգվածային խախտումների դեպքերին, ազատ տեղաշարժի սահմանափակումներին, ջրի և սանիտացիայի հասանելիության իրավունքի պաշտպանությանը:

Խոսելով քաղաքացիների սոցիալ-տնտեսական խնդիրներից՝ ՀՀ ՄԻՊ-ը բարձրաձայնել է սահմանամերձ համայնքների բնակիչների խնդիրը. վերջիններս վարկեր են վերցրել, անասուններ գնել, սակայն ադրբեջանցիները գողացել են: Այդ մարդիկ այդուհանդերձ շարունակում են մարել այդ վարկերը:

Արման Թաթոյանը վստահեցնում է՝ եթե մենք մարդու իրավունքների պաշտպանության ամուր երաշխիքներ չներդնենք, Ադրբեջանը շարունակելու է իր անօրինությունները: Նա համոզված է՝ պետք է բոլոր խողովակներով, այդ թվում՝ խորհրդարանական դիվանագիտության ձևաչափով ներկայացվեն Ադրբեջանի վայրագությունները:

Հանդիպման ավարտին սերտ համագործակցության և խնդիրները համակողմանի քննարկելու պայմանավորվածություններ են ձեռք բերվել: