Ինչպե՞ս և ու՞մ հետ է բանակցում Կարմիր Խաչը, որ ադրբեջանցիները բացում են ճանապարհը. զրույց ԿԽՄԿ-ի ներկայացուցչի հետ

Դեկտեմբերի 19-ից մինչև հունվարի 7-ն ընկած ժամանակահատվածում Կարմիր խաչի միջազգային կոմիտեի միջնորդությամբ շրջափակված Արցախից հիմնականում կատարվել են բժշկական օգնության կարիք ունեցող անձանց տեղափոխում Հայաստան: Ընդհանուր առմամբ տեղափոխվել են 15 բուժառու` իրենց ուղեկցող անձանց հետ միասին, այդ թվում` երկու օտարերկրյա քաղաքացիներ, որոնք նույնպես կարիք են ունեցել անհապաղ բժշական օգնության. այս մասին «Հորիզոն»-ի հետ զրույցում ասել է Կարմիր խաչի միջազգային կոմիտեի հայաստանյան գրասենյակի հաղորդակցման և կանխարգելման ծրագրերի ղեկավար Զառա Ամատունին։

«Ինչպես նաև դեկտեմբերի 24-ին և 25-ին որոշակի քանակությամբ դեղորայք է տեղափոխվել Կարմիր խաչի միջազգային կոմիտեի միջնորդությամբ Հայաստանի կառավարության կողմից, որը հասցվել է հիմնականում տեղի բուժհաստատություններին։ Դեկտեմբերի 24-ին մեր կազմակերպության մեքենաներից մեկը տեղափոխել է դեղորայք, իսկ դեկտեմբերի 25-ին մեր կազմակերպության բեռնատարով շուրջ 10 տոննա մարդասիրական օգնություն է տրամադրել ՀՀ կառավարությունը, որը մենք տեղափոխել ենք Լաչինի ճանապարհով, որը ներառել է սննդային պարագաներ, մանկական սնունդ և դեղորայք»,- նշել է Ամատունին:

Հարցին, թե ինչպե՞ս և ու՞մ հետ է բանակցում Կարմիր Խաչը, որ կարճաժամկետ բացվում է ճանապարհը, Զառա Ամատունին պատասխանել է, թե իրենց կազմակերպությունը արդեն երեսուն տարուց ավելի է ունի ներկայություն տարածաշրջանում` իր գրասենյակներով Երևանում, Բաքվում և Լեռնային Ղարաբաղում, ինչը թույլ է տալիս նաև ֆիզիկապես գտնվել տարածաշրջանի այս երեք վայրերում՝ իրականացնելով իր մարդասիրական միջնորդությունը՝ յուրաքանչյուր վայրում համապատասխան կառույցների համապատասխան որոշում կայացնողների հետ վարելով երկխոսություն.

«Մեր կազմակերպության միջնորդական ծառայությունները առաջարկել ենք այս ստեղծված իրավիճակի առաջին իսկ օրվանից առ այսօր: Մնալով շատ սերտ կոնտակտի մեջ պատկան մարմինների հետ, շարունակում ենք հետևել զարգացող իրավիճակին, պատրաստակամությունը մեր հայտնել և պատրաստ լինել մարդասիրական առաջնային խնդիրների հասցեագրման հարցում ունենալ դեր: Սա մենք անում ենք` վարելով մեր երկխոսությունը բոլոր ներգրաված կողմերի` և՛ իրենց համապատասխան մարմինների, և՛ իշխանությունների հետ»,-ասել է Կարմիր խաչի միջազգային կոմիտեի հայաստանյան գրասենյակի հաղորդակցման և կանխարգելման ծրագրերի ղեկավարը: