Ջրացատկ մարզաձևը Հայաստանում գոյություն ունի և ունի արժանի ներկայացուցիչներ

Խորհրդային միության տարիներին ջրացատկը Հայաստանում բավականին զարգացած է եղել, և հայ ջրացատկորդները բազում հաջողություններ են գրանցել ինչպես Խորհրդային միության տարածքում, այնպես էլ համաշխարհային արենայում։ Անկախ Հայաստանում պրոֆեսիոնալ լողավազանների փակվելուց հետո ջրային մարզաձևերն անուշադրության են մատնվել, բայց այսօր վստահ կարելի է ասել, որ ջրացատկը վերադառնում է Հայաստան։ Ջրացատկորդներ Լև Սարգսյանն ու Վլադիմիր Հարությունյանը Շոտլանդիայի Էդինբուրգ քաղաքում տեղի ունեցած ջրացատկի Եվրոպայի առաջնությունում 10 մետր սինքրոն աշտարակացատկ մրցաձևում վաստակել են 396.84 միավոր և դարձել են բրոնզե մեդալակիր՝ իրենցից առաջ թողնելով միայն Ռուսաստանի և Մեծ Բրիտանիայի թիմերին։ Նշենք, որ այս մեդալն անկախ Հայաստանի պատմության ջրացատկ մարզաձևում մեծահասակների պայքարում նվաճած առաջին մեդալն է։

Հայաստանի ջրացատկի հավաքականի գլխավոր մարզիչ Հրաչյա Չանդիրյանը նշում է, որ այս անգամ նրանք գիտակցում էին, որ շանսերը մեծ են․
«Անցած տարի աշխարհի առաջնությանը գրավեցինք 9-րդ տեղը, և դա համաշխարհային ջրացատկում սենսացիա համարվեց։ Չէին պատկերացնում, որ հայերը չունենալով ոչ մի պայման, կկարողանան գրավել 9-րդ տեղը. տարվա վարկանշային ցուցակում 8-րդ տեղն էինք զբաղեցնում։ Իսկ այս անգամ փորձեցինք մեր գլխից ավելի բարձր թռնել»։

Մարզիչը պատմում է, որ Հայաստանում սինքրոն ցատկի համար պարապելու պայմաններ չկան։ Միայն դահլիճային մարզումներ են անում, սինքրոնիզացնում ենք էլեմենտները, երևակայում պտույտները, միասին աշխատում վարժությունների վրա: Իսկ ջրում տղաները մարզվում են միայն մրցավայրերում, և ընդամենը երկու անգամ:

https://www.youtube.com/watch?v=zSXj6gZWJSw

Ջրացատկորդ Լև Սարգսյանն էլ նշում է, որ այս հաղթանակն առաջին հերթին ապացույցն է այն բանի, որ չնայած պայմաններին՝ կարելի է ձգտել ու հասնել լավագույն արդյունքի։

«Իրականում շատ մեծ աշխատանք ենք կատարել ես, Վլադիմիրն ու մեր մարզիչ Հրաչյա Չանդիրյանը։ Մենք շատ լավ գիտակցում ենք, թե ինչ սպորտով ենք զբաղվում և ինչպիսի պայմաններում ենք մարզվում։ Սինքրոն ջրացատկն էլ ֆուտբոլի նման թիմային սպորտ է, և մենք հասկանում էինք, որ պետք է անեինք հնարավոր ամեն ինչ, որպեսզի այդ մեդալը նվաճեինք ու ապացուցեինք, որ ջրացատկ մարզաձևը Հայաստանում գոյություն ունի և ունի արժանի ներկայացուցիչներ, ովքեր կարող են իրենց երկիրը արժանի ներկայացնել ոչ միայն եվրոպական ասպարեզում, այլև աշխարհում»,- ասել է ջրացատկորդը։

Տղաներն այժմ հանգստանում են և պատրաստվում հաջորդ տարվա կարևոր մրցաշարերին, մասնավորապես Աշխարհի առաջնությանը, որտեղ խաղարկվում են Օլիմպիական խաղերի ուղեգրերը։