Այսօր Ուսուցչի օրն է. ի՞նչ գիտենք տոնի մասին

Այսօր նշվում է Ուսուցչի տոնը, 1994 թվականից այն նշում են աշխարհի 100 երկրներում:

Այս օրը արժևորվում և գնահատվում են այն բոլոր ուսուցիչները, որոնք իրենց ներդրումն են ունենում կրթության զարգացման ոլորտում:

Տոնի պատմական նախադրյալն է հանդիսացել Փարիզում 1966թ. հոկտեմբերի 5-ին Փարիզում տեղի ունեցած միջկառավարական հանձնաժողովը, որը վերաբերում էր ուսուցիչների կարգավիճակին, որի արդյունքում ՅՈՒՆԵՍԿՕ-ի Աշխատանքի միջազգային կազմակերպության կողմից ընդունվել է ուսուցիչների կարգավիճակին վերաբերող փաստաթուղթ:

Կրթության նախարարության մամուլի խոսնակ Լուսինե Մարգարյանը SHANTNEWS.AM-ի հետ զրույցում նշեց, որ ուսուցչի տոնի հետ կապված միջոցառումներն այս տարի Շառլ Ազնավուրի հիշատակը հարգելու հետ կապված հետաձգվել են:

«Ինչպես գիտենք, յուրաքանչյուր տարի այս օրը Կրթության նախարարության կողմից անցկացվում է «Լավագույն ուսուցիչ» և «Լավագույն տնօրեն» մրցույթը և, կարծում եմ, որ սա լավագույն օրն է այդ մրցույթն անցկացնելու համար: Այս տարի հայտնի պատճառներով տոնական միջոցառումները կհետաձգվեն, գուցե, ուսուցիչները դպրոցներում տոնեն, սակայն նախարարությունը այս օրը պաշտոնական ոչինչ չի ձեռնարկելու, հավանաբար միայն շնորհավորական ուղերձ կտարածենք»,- նշեց նա:

Տոնը Հայաստանում ավելի մեծ հանդիսությամբ սկսել են նշել խորհրդային տարիներին: Ինչպես նշում էր աշխարհահռչակ փիլիսոփա Կոնֆուցիոսը՝ ուսուցչի խնդիրն է բացահայտել աշակերտի զարգացման նոր հեռանկարները:

Ստորև Ձեզ ենք ներկայացնում մի քանի հետաքրքիր փաստեր աշխարհի տարբեր վայրերում ուսուցիչների կողմից կիրառվող ուսուցման մեթոդների մասին:

1. Իտալիայում աշակերտները սովորում են 13 տարի և պարտադիր 2 անգամ դպրոց են փոխում, որպեսզի  հնարավորինս շատ ուսուցիչների հետ հաղորդակցվեն:

2. Ֆրանսիայում գործում է 20 բալային գնահատման համակարգ, որը օգնում է ուսուցչին ավելի օբյեկտիվ գնահատել աշակերտի խնդիրները:

3. Ճապոնիայում ուսումնական տարին սկվում է ապրիլից, քանի որ, ըստ նրանց, սա լավագույն ժամանակն է նոր փուլ սկսելու համար:

4. Չինաստանում ուսուցիչները և աշակերտները հանգստանում են տարեկան ընդամենը մեկ ամիս, քանի որ կարծում են՝ քանի դեռ ապրում են պիտի սովորեն:

5. Մեծ Բրիտանիայում կան այնպիսի դպրոցներ, որտեղ աշակերտներն ապրում են ուսուցիչների հետ միասին:

6. Ֆինլանդիայում ուսուցիչները այնքան ժամանակ գնահատական չեն նշանակում աշակերտին, մինչև զգան, որ աշակերտը դրան պատրաստ է, բացի այդ, նրանք ստանում են աշխարհում ամենաբարձր աշխատավարձը:

7. ԱՄՆ- ում ուսուցիչներն աշխատում են յուրաքանչյուր աշակերտին անհատապես տեղեկացնել իր գնահատականի մասին, որպեսզի դասարանում իրարանցում չառաջանա: