Փաստաբանը հակադարձեց Իշխանյանին, Իշխանյանը՝ փաստաբանին

Shantnews.am-ն արդեն հայտնել է, որ անդրադառնալով սպասվող համաներմանը՝ Հայաստանի Հելսինկյան կոմիտեի նախագահ Ավետիք Իշխանյանն ասել է, որ բոլորի համար դեռ անհայտ է, թե ովքեր են համաներում ստանալու: Ըստ Իշխանյանի՝ համաներումը պետք է տարածվի նաև ցմահ ազատազրկվածների վրա, մասնավորապես՝ նրանց, ում դեպքում մահապատիժը 2003 թվականին փոխվել է ցմահ ազատազրկմամբ, և նրանց վրա, ովքեր ցմահ ազատազրկման են դատապարտվել մինչև 21 տարեկանը: Նույն ասուլիսին մասնակցող փաստաբան Լուսինե Սահակյանն ասել է, որ այլ կարծիք ունի ցմահների՝ համաներումից օգտվելու հարցում: Պետք է հասկանալ, որ, ըստ տրամաբանության, ցմահ ազատազրկման պետք է դատապարտվեր այն անձը, որին դատարանը համարել է այնքան վտանգավոր, որ նա պետք է հասարակությունից ցմահ մեկուսացվի: Համաներման ակտով կարող են հասարակություն վերադառնալ նաև նրանք, ովքեր վտանգավոր են հասարակության համար:

Փաստաբանի ասածին Հայաստանի Հելսինկյան կոմիտեի նախագահը դարձյալ հակադարձել է՝ բերելով իր հիմնավորումներն այն մասին, թե ինչու է կարծում, որ համաներումը պետք է տարածվի նաև ցմահ ազատազրկվածների վրա.

«Հայաստանը եվրոպական երկրների մակարդակով՝ ցմահների քանակով առաջիններից մեկն է: Սա մեկ, երկրորդ՝ արդյոք բոլոր ցմահ դատապարտվածները, ինչպես մեր հասարակության որոշակի շերտն է պատկերացնում, այդպիսի սարսափելի հանցագործություններ կատարողներ են, արդյո՞ք ցմահ ազատազրկումը չի եղել պատվերով», -ասել է Ավետիք Իշխանյանը՝ որպես օրինակ բերելով Սողոմոն Քոչարյանի դեպքը:

Իշխանյանը դարձյալ հիշեցրել է, որ մահվան դատապարտվածների պատիժը 2003 թվականին ցմահ դատապարտմամբ է  փոխարինվել:  Ըստ Իշխանյանի՝ եթե գործեր հստակ իրավական մեխանիզմ, ապա նրանք վաղուց պետք է ազատված լինեին:

«15 տարի փոխված ցմահն արդեն անցած կլիներ և նրանք ազատված կլինեին: Հիմա, երբ անարդարություն է տեղի ունեցել, մեկ օր մնալն էլ քրեակատարողական հիմնարկում նրանց համար սարսափելի է: Մեր բազմաթիվ փորձերը նախագահի այդ հրամանագիրն անօրինական ճանաչելու՝ անարդյունք էին, որովհետև դատավորները խոսելուց հասկանում էին, որ էդպես է, բայց որևէ քայլ չէին ձեռնարկում: Հիմա անցել է 15 տարի, նորից դատական քաշքշուկներով ինչ կլինի, չգիտեմ, ուստի, կարծում եմ, որ համաներումով այդ հարցը պետք է լուծվի », -ասել է Իշխանյանը:

Հայաստանի Հելսինկյան կոմիտեի նախագահը մանրամասնել է նաև, թե ինչու է հատուկ շեշտում , որ համաներումը պետք է տարածվի նաև մինչև 21 տարեկանը ցմահ ազատազրկման դատապարտվածների  վրա։

«Հույսն այն էր, որ նոր Քրեական օրենսգիրքը կընդունվի և ցմահի շեմը կբարձրացվի մինչև 21 տարեկան: Բայց դա ձգձգվեց, նախորդ իշխանությունը դեմ էր՝ ասում էին մենք պատերազմական իրավիճակում ենք և չենք կարող շեմը բարձրացնել: 2011 թվականից մինչև հիմա ցմահ մի հոգի է դատապարտվել, երբ որ առաջ շատ էին դատապարտվում: Սա ևս մեկ փաստարկ է, թե ինչու պետք է անդրադառնալ ցմահներին: Չեն գործում ցմահների համար հատկապես նոր երևան եկած հանգամանքները,  չի գործոմ վաղաժամկետ ազատ արձակման մեխանիզմն ընդհանրապես: Միշտ մի պատճառ են  գտնում՝ հեռախոս գտնել և այլն, որ որևէ բան չանեն», – ասել է Իշխանյանը: