Գյումրիում առկա 2826 տնակներում 9000-ից ավելի մարդ է ապրում

Վերջապես Գյումրիում տնակների փաստացի թիվ է հայտարարվում՝ 2826: Սա քաղաքապետարանի կատարած վերջին փաստագրման տվյալներն են: 30 տարի անց հաջողվել է ստանալ տնակների ճշգրիտ պատկերը և անձնագրային բաժանմունքներում դադարեցնել տնակային հասցեներում նոր հաշվառումները: Փաստագրման արդյունքները որոշ ճշտումներից հետո կներկայացվեն կառավարություն: Նոր փաստագրումը հնարավոր է դառնա կարևոր փաստաթուղթ՝ բնակարանային որևէ ծրագիր կազմելու համար:

Գյումրիում տնակները ժամանակավորից վերածվել են հիմնական բնակության տարածքի: Ոմանք տուն ստանալուց հետո կարող էին քանդել, բայց փոխարենը պահել են որպես վարձու տարածքներ: Վարձակալությամբ տնակ տալու երևույթը ավելի է խորացել քաղաքում: Երվանդ Մկրտչյանի ընտանիքը 4 տարի է՝ վարձով է տնակում ապրում: Հայրական տնից դուրս է եկել, երկու եղբոր ընտանիք փոքր տան մեջ չէին տեղավորվում: Ասում է՝ ի վիճակի չի եղել քարաշեն բնակարանի համար ամսական 30.000 դրամ բնակվարձ տալ, ինքն էլ 10.000 դրամ վարձով տնակն է ընտրել:

Տնակ վարձակալելը ձեռնտու է շատ ընտանքիների, այն էժան է քարաշենից գրեթե 4 անգամ: Հիմա Գյումրիում շատ ընտանիքներ են տնակների վարձակալներ, նույնիսկ հաշվառում ունեն վարձով տնակում: Սա միակ անթույլատրելի գործարքը չէ տնակային հասցեներում: Ժամակավոր կացարանը Գյումրիում դարձել է նաև վերավաճառքի գույք: Սա էլ նպաստել է հարևան գյուղերից ընտանիքների՝ Գյումրի բնակության տեղափոխվելուն: Գյումրիի քաղաքապետարանի բնակտնտեսության, համատիրությունների համակարգման բաժնի առաջատար մասնագետ Արման Շաբոյան ասում է, որ նոր փաստագրմամբ՝ պարզվել է, որ Գյումրիում մոտ 200 ընտանիքներ հարևան գյուղերից են եկել ու տնակներում հաստատվել, 400 ընտանիք էլ ժամանակին բնակարան է ստացել, դրանք վաճառել է ու դարձյալ տնակ տեղափոխվել:

«Գյումրին առանց տնակների» հիմնադրամի տնօրեն Մհեր Խաչատրյանը վստահեցնում է, որ ովքեր կարողացել են, մաղարիչով մի քանի անգամ են նույնիսկ տուն ստացել, իսկ ովքեր որ լռակյաց, արժանապատիվ կյանքով էին ապրում ու սուսուփուս սպասում էին բնակարանի իրենց հերթին, այդպես էլ տուն չստացան ու մնացին հերթից դուրս:

Նոր փաստագրմամբ՝ ի հայտ են եկել տնակային հասցեով հաշվառված քարե և կիսաքարե կառույցներ: Դրանց թիվը հասնում է 700-ի: Մի մասը կապիտալ շինություն է: Իսկ թե դրանք ինչ կարգով, ում թույլտվությամբ են ստացել տնակային հաշվառում, քաղաքապետարանին չի էլ հետաքրքրում: Խնդիրն այն է, որ այդ կառույցները հատակագծով կանաչ գոտիներում են գտնվում, դրա համար էլ չեն սեփականաշնորհվում, որ հասցեափոխություն լինի:

Յուրաքանչյուր տնակ հիմա անձնագիր ունի, որտեղ ներառված են տնակի համարակալումը, բնակիչների անձնագրային տվյալները, տնակում հայտնվելու պատճառները և այլն։ Նոր տնակներ որևէ տարածքում տեղադրելու երևույթը՝ վստահեցնում են, որ այս փաստագրումից հետո բացառվելու է: Վերահսկող մեխանիզմներն են շատ, ինչը, ըստ «Գյումրին առանց տնակների» հիմնադրամի տնօրեն Մհեր Խաչատրյանի, եթե արվեր տարիներ առաջ, ապա տնակները քաղաքում սնկերի նման չէին աճի: Իսկ բացթողումները իշխանությունների անվերահսկողության հետևանք են: Մարզպետարանի քաղաքաշինության վարչության բնակարանային քաղաքականության, բնակարանային և ենթակառուցվածքների բաժնի պետ Տիգրան Հարությունյանի խոսքերով՝ սխալը եկավ այնտեղից, երբ բնակարան հատկացնող կառույցները չստանձնեցին տնակները քանդելու խնդիրը: Այն մնաց Գյումրիի քաղաքապետարանի պատասխանատվության տիրույթում, ինչը չարվեց:

Գյումրիում մոտ 450 տնակ փակ է ավելի քան 10 տարի։ Տերերի մասին տեղեկություններ չկան, թեև դրանք ճշտելու և իմանալու տարբերակներ եղել են, իսկ իրականացնելու համար, պարզվում է՝ կառավարության որոշում չի եղել: Հիմա էլ Շիրակի մարզպետարան ներկայացված տնակների ցուցակից 291 տնակի բնակիչների անուններ քաղաքապետարանը չի ներկայացրել: Տնակները փակ են, բնակիչների անուններն՝ անհայտ: Նոր փաստագրմամբ՝ Գյումրիում առկա 2826 տնակներում 9000-ից ավելի մարդ է ապրում: Ոստիկանությունով հնարավոր է հաշվառվածների իրական թիվը բացահայտել, իսկ կադաստրով՝ հստակեցնել, թե տնակների բնակիչներից դեռ քանիսն այլ տեղ անշարժ գույք ունեն: