Որո՞նք են ԱԺ համամասնական ցուցակների անակնկալ անունները

Եվ այսպես, ԱԺ արտահերթ ընտրությունների համամասնական ցուցակները հայտնի են: Հայտնի ու նոր-նոր հայտնի դառնալու փորձեր անող քաղաքական ուժերի ցուցակներում մարդիկ էլ են հայտնի ու անհայտ կամ հայտնի դառնալու բացահայտ ու անհայտ հավակնություններով:

Ամեն ինչ կախված է քաղաքական ուժի ներկայիս վարկանիշից և ցուցակում թեկնածուի ընթացիկ դիրքից: Ցուցակներում հետաքրքիր է ոչ միայն թեկնածուների այդ  դիրքը, այլ ոմանց դեպքում՝ ներկուսակցական ու միջկուսակցական դիրքային տեղաշարժը:

Սկսենք «Իմ քայլը» դաշինքի ցուցակից, որն ամենամեծն է, ճիշտ այնպես, ինչպես ամենամեծն են հիմա քաղտեխնոլոգներն ու քաղաքագետները գնահատում այս քաղաքական ուժի հնարավորությունները:

Ցուցակի առաջին հատվածում ամեն ինչ պարզ է, հետաքրքիր է դառնում հետոն: Եթե հիմք ընդունենք ընտրությունների արդյունքների մասին առավել շատ հնչող տոկոսային կանխատեսումները, ապա «Իմ քայլը» դաշինքի ցուցակի անցողիկ տեղերի առնվազն 50 տոկոսը   հասարակության լայն շերտերին անհայտ անուններ են: Հայտնիներն էլ միայն ՔՊ-ականներ չեն:

«Իմ քայլը» դաշինքի նախընտրական ցուցակի «լավ» դիրքերում են, օրինակ՝ ՀՀԿ խմբակցության նախկին անդամներ Ֆելիքս Ցոլակյանն ու Շիրակ Թորոսյանը, նաև հայտնի մարզիկի ոչ պակաս հայտնի որդին՝ ըմբշամարտի աշխարհի չեմպիոն Արսեն Ջուլֆալակյանը:

«Իմ քայլը» դաշինքի ցուցակում է նաև ոստիկանության գնդապետ Արմեն Խաչատրյանը: Վերջինս, ի դեպ, արդեն նաև ՔՊ կուսակցության անդամ է:

Ընդհանուր առմամբ՝ «Իմ քայլը» դաշինքի 183 հոգանոց ցուցակում 125-ը ՔՊ-ականներ են, 3-ը՝ «Առաքելություն» կուսակցությունից, իսկ 55-ը՝ անկուսակցական:

ԲՀԿ-ի ցուցակում ներսուդուրս տեղաշարժեր կարծես չկան: Ցուցակը գլխավորողի անունը վաղուց էր հայտարարվել:

Տասնյակում էլ արդեն հին ԱԺ-ից հայտնի ու առավել ակտիվ ԲՀԿ-ականներն են: Ցուցակում չկան «Ծառուկյան» դաշինքում միավորված  մյուս քաղաքական ուժերի որոշ ներկայացուցիչներ, օրինակ՝ ՀՀՇ-ական Արարատ Զուրաբյանը: Ամեն ինչ այստեղ կանխատեսելի էր:

Ամենաինտրիգայինն ու անկանխատեսելին հավակնում էր լինել Հանրապետականների ցուցակը:

Երբ պարզ դարձավ, որ հանրապետականները մտնելու են ընտրապայքար, պարզ  էր նաև, որ պետք է գործի դրվի նոր ռազմավարություն ու ցուցակում առավել շատ տեղեր զբաղեցնեն հեղափոխության օրերին առավել քիչ քարկոծված կամ ընդհանրապես անբիծ մնացած անունները:

Այս տրամաբանությամբ էլ ցուցակն առաջնորդեցին Վիգեն Սարգսյանն ու Արփինե Հովհաննիսյանը:

Ցուցակի երրորդ համարի անունը հասարակական ընկալումներում ամենաանսպասելին էր: Սկզբում ՀՀՇ-ական, այնուհետ՝ 2008-ից 2012 թվականներին ՀԱԿ անդամ  Դավիթ Շահնազարյանը, հիմա որպես անկուսակցական, ՀՀԿ-ի ցուցակի երրորդ տեղում է:

Անկուսակցական է նաև Մենուա Հարությունյանը, որը ցուցակի 9-րդ համարն է, կուսակցության նոր անուններից մեկը:

Իսկ հարևանությամբ Արտաշես Գեղամյանն է՝ ՀՀԿ խմբակցության «Ազգային Միաբանությունը» ներկայացնող հնաբնակը:

Հներից էլի անուններ կան՝ Շուշան Պետրոսյան, Հերմինե Նաղդալյան՝ 16 ու 20 համարներն են, միայն թե հիմա ու նախորդ ընտրություններին այս համարները տարբեր բաներ են նշանակում:

Քաղաքական ուժեր կան, որոնց հավակնությունները վերջին շրջանի քաղաքական իրադարձություններից հետո ավելի բարձր վարկանիշ ձեռք բերած մեկ-երկու անձերի անուններով են պայմանավորված, օրինակ՝ նորաստեղծ «Մենք» դաշինքի պարագայում` Արամ Սարգսյանի ու Արտակ Զեյնալյանի:

«Լուսավոր Հայաստան»-ի դեպքում՝  Էդմոն Մարուքյանի ու Մանե Թանդիլյանի:

ՀՅԴ ու «Օրինաց երկիր» կուսակցությունների համամասնական ցուցակներում հայտնի դեմքերի անունները հաջորդում են մեկը մյուսին պարզ տրամաբանությամբ՝ ըստ ներկուսակցական վարկանիշի:

Նույնը երևի ընտրապայքար մտած մյուս, բայց դեռ ոչ այնքան հայտնի քաղաքական ուժերի պարագայում է: Պարզապես այստեղ թեկնածուների հեղինակության չափն ու վարկանիշը հայտնի է միայն ներկուսակցական շրջանակներում:

Այդպիսի կուսակցություններից է, օրինակ՝ «Ազգային առաջընթաց»-ը: Կուսակցությունն իր մասին հետևյալն է գրել.

«Մեր շարքերում չկան հայտնի դեմքեր, բայց կարծում ենք, որ հայտնի լինելով պայմանավորված չեն պատգամավորի համար անհրաժեշտ հատկությունները»:

Ի դեպ, այս կուսակցությունը միակն է, որի համամասնական ցուցակը կին է գլխավորում ու որի առաջին տասնյակի 6 անունները ոչ թե Երևանից են, այլ մարզերից: