Շիրակի մարզի թեկնածուները մեկ օր շուտ ամփոփել են քարոզարշավի արդյունքները

Արտահերթ ընտրությունների նախընտրական պայքարը մեկ օրից ավարտվում է: Քաղաքական ուժերի Շիրակի մարզի կուսակցական շտաբներում, քարոզարշավի ընթացքի կարճ ժամկետով պայմանավորված, շատ բաց տեղերի ու առանձնահատկությունների մասին այսօր են խոսում, հաշվի առնելով այն, որ վաղը՝ դեկտեմբերի 7-ին քարոզչական բնույթի բոլոր հանդիպումներն ու հավաքները չեղյալ են հայտարարվել: Տասնօրյա ընտրապայքարի արդյունքներն են ամփոփել «Բարգավաճ Հայաստան», «Սասնա ծռեր», «Քրիստոնեա-ժողովրդական վերածնունդ» կուսակցությունների և «Իմ քայլը» դաշինքի թեկնածուներն ու կուսակիցները։

Շիրակի մարզում արտահերթ խորհրդարանական ընտրություններին «Իմ քայլը» դաշինքը մասնակցում է 15 թեկնածուներով: Կուսակցության շտաբի անդամները նշում են, որ այս ընթացքում պահպանել են թիմային մոտեցումը այսինքն՝ հանուն կուսակցության քարոզչությունը, բայց 15 թեկնածուներն իրենց հերթին առանձին թիմերով աշխատանքն են ընտրել: Ներքին պայքարն անխուսափելի է, ինչպես մեկ ու կես տարի առաջվա ընտրություններում:

«Իմ քայլը» դաշինքի տարածքային ցուցակում մարզային իշխանության ներկայացուցիչներ են, իսկ սա քարոզարշավի ընթացքում տեղիք տվեց քննադատությունների: Արդյոք կիրառվել են վարչական ռեսուրս կամ դրա օրինակներ են արդյոք, երբ տարածքային կառավարման պաշտոնյա թեկնածուներին համայնքների ղեկավարները հատուկ միջոցառումների դիմավորման արարողակարգն են կիրառում, ինչը մյուս քաղաքական ուժերի թեկնածուների դեպքում չի արվում :

«Մենք պայքարել ենք վարչական ռեսուրսի օգտագործման դեմ և չի կարող էնպես լինել,որ մենք օգտագործենք էն գործիքակազմը,որի դեմ տարիներ շարունակ պայքարել ենք»,- նշել է «Քաղաքացիական պայմանագիր»  կուսակցության անդամ Սերգեյ Տոնոյանը:

Հեղափոխությունից հետո շարժումից քաղաքական կուսակցության վերածված «Քրիստոնեա-ժողովրդական վերածնունդ» կուսակցությունը առաջնորդվում է «Ընդդիմութանը՝ ոչ, այլընտրանքին՝ այո» կարգախոսով։ Շիրակի մարզում հինգ ռեյտինգային թեկնածու ունեին, մնացել են երեքը, նրանցից երկուսը ինքնաբացարկ են ներկայացրել։

«Նախորդ ընտրությունները ամբողջությամբ գծագրվում էր գործող ռեժիմի կողմից, այսինքն՝ ընտրությունները դեռ չվերջացած, արդեն իսկ հաշվարկած էր, թե ով քանի քվե ու քանի մանդատ է ստանալու խորհրդարանում, այժմ մենք էդ խնդիրը չունենք և խորհրդարան անցնելու ինտրիգ է առաջացել»,- նախորդ ու ներկա ընտրությունների տարբերության մասին է խոսել «Քրիստոնեա-ժողովրդական վերածնունդ» կուսակցության Շիրակի մարզային պատասխանատու Վարդան Սրտաշյանը:

«Սասնա ծռեր» կուսակցությունն ունի 11 թեկնածու: Հանդիպումները անհատական չեն, թիմով են շրջում համայնքներում: Իսկ ժողովրդի վերաբերմունքը, ասում են, միանշանակ չէ նրանց հանդեպ, երբեմն ագրեսիա են ցուցաբերում։

«Շատ դեպքերում մարդկանց ապատեղեկատվություն է մատուցվել, լինում են տեղեր, որ մարդիկ սկզբից ուրիշ ձևով են մեզ ընդունում, այնուհետև բացառապես ուրիշ ձևով են մեզ ճանապարհում»,- ընտրողների վերաբերմունքի մասին է խոսել «Սասնա ծռեր» համահայկական կուսակցության թեկնածու Արտաշես Հարթենյանը:

Գրեթե անփոփոխ կազմով, կարգախոսով ու ծրագրերով ընտրություններին մասնակցող ԲՀԿ  կուսակցության թեկնածուները նախկին բազմամարդ հավաքներից այս քարոզարշավի կարճ ժամկետում հրաժարվել են: Իսկ իրենց ծրագրերն ու թեկնածուներին հանրայնացնելու համար օգտագործել են սոցիալական հարթակը, ինպես նաև հեռուստատեսային բանավեճերը:

Ընտրապայքարում եղած 11 քաղաքական ուժերը միասին Շիրակի մարզում ունեն 114 թեկնածու, նախորդ ընտրությունների համեմատ սա ավելին է: Մեծ մասը երիտասարդ ու նոր դեմքեր են, որոնք քաղաքական գործընթացներին մասնակցում են նոր գաղափարներով ու նոր ձևաչափերով: