Տոնական օրերին Շիրակի մարզում ծնվել է 51 երեխա

Շիրակի մարզում հունվարի մեկից յոթն ընկած ժամանակահատվածում  ծնվել  է 51 երեխա: Մարզի վեց ծննդատներից ստացված տվյալներով` նախորդ տարվա նույն ժամանակահատվածի համեմատ  ծնունդների թիվն ավելացել է։ Հունվարի առաջին օրերին  ծնվածները արդեն դուրս են գրվել ծննդատներից, իսկ մի քանիսը, ովքեր ենթարկվել են կեսարյան հատման կամ գինեկոլոգիական այլ  վիրահատությունների, գտնվում են մասնագետների հսկողության տակ:

Դեկտեմբերի 31-ին  կեսգիշերին   Գյումրիի մոր և մանկան ավստրիական հիվանդանոցի հերթապահ  անձնակազմը  առաջին ծնունդն է  ընդունել: Մանկական հիվանդանոցում տարեմուտից ժամեր անց լույս աշխարհ է եկել 2019 թվականի առաջին տղա երեխան: Փոքրիկի  հորը բժիշկները հեռախոսազանգով են տեղեկացրել: Փոքրիկի հայրը ծառայում է բանակում ու այդ պահին գտնվել է առաջապահ դիրքերում:

Մոր և մանկան ավստրիական հիվանդանոցում մեկ շաբաթվա ընթացքում ծնվել է 17 երեխա՝ 10 տղա և 7 աղջիկ: Ամանորի գիշերը ծնված փոքրիկներից բացի, խորհրդանշական ծնունդներ են եղել նաև հունվարի վեցին: Սուրբծննդյան օրը լույս աշխարհ է եկել 5 տղա: Մելիքն արդեն չորս օրական է, ծնվել է 3կգ 650 գրամ քաշով, ընտանիքի երկրորդ երեխան է: Քույրիկի և փոքրիկի տարիքային տարբերությունը 9 տարի է:

«Տղաս ծնվել է Հիսուսի ծննդյան օրը, շատ մեծ խորհուրդ ուներ իր ծնունդը,աղջիկ էին ասել, տղա  ունեցանք»,- իր ուրախությունն այսպես է բնութագրել գյումրեցի Տաթևիկ Ղուկասյանը։

«Աղջիկս Սուրբծննդյան օրն է ծնվել, տատիկի պատվին անվանակոչելու ենք Սրբուհի»,- ասել է ծննդկան Արփինե Մանուկյանը։

Սրբուհին ծնվել է Գյումրիի ծննդատանը՝ իր ծնունդով բալանսավորելով Գյումրիի ծննդատանը ծնված աղջիկների ու տղաների հարաբերակցությունը: Ծնվել է 5 տղա և 5 աղջիկ: Գյումրիի ծննդատան ինտենսիվ թերապիայի բաժանմունքում այժմ փոքրիկներ չկան, բոլոր ծննդաբերություններն անցել են հարթ, միայն մեկ կանխածին երեխա են ունեցել այս ընթացքում:

«Ծնվել է երեխա երրորդ կեսարյան հատումով, կանխածին երեխայի վիճակը հիմա նորմալ է, մամայի մոտ է, դեռ գտնվում են  մեզ մոտ, պաթոլոգիաներ չեն եղել, տասը ծննդից երեքը կեսարյան հատումով է եղել»,- տոնական օրերի վիճակագրությունն է ներկայացրել Գյումրիի ծննդատան տնօրեն Էդգար Սուքիասյանը։

Ախուրյանի մոր և մանկան առողջության կենտրոնում Նոր տարվա յոթնօրյակում ծնվել է 19 երեխա՝ 10 տղա և 9 աղջիկ:

«Ծնունդներ ենք ունեցել տարբեր տարածաշրջաններից՝ Արթիկից, Սպիտակի շրջանից, Գյումրիից, մեր տարածաշրջանի գյուղերից, ինչպես նաև ծնունդ ենք ունեցել Երևանից»,- ասել է Ախուրյանի մոր և մանկան առողջության կենտրոնի գինեկոլոգ Արմենուհի Պետրոսյանը։

Իսկ մարզի տարածաշրջանների ծննդաբերական բաժանմունքներից Մարալիկում Ամանորին ծնվել է 2, Արթիկում՝ 8 երեխա: Միակ տարածաշրջանը, որտեղ Նոր տարվա առաջին շաբաթում երեխաներ չեն ծնվել, Աշոցքն է: Հյուսիսային բնակավայրերում ընտանիքները պլանավորում են այնպես, որ ձմռանը չծնվեն իրենց երեխաները: