Վերսկսվել է ՀԽՍՀ խնայբանկում ներդրած դրամական ավանդների փոխհատուցման ծրագիրը

Հունվարից վերսկսվել է ՀԽՍՀ խնայբանկում ներդրած ավանդների փոխհատուցումը: Այս տարի իրենց խնայողությունները ստանալու իրավունք ունեն 1933 և 1934 թվականներին ծնված քաղաքացիները, որոնք մինչև 1993 թվականի հունիսի 10-ը ներառյալ ավանդներ են ունեցել նախկին «Խնայբանկ»-ի մասնաճյուղերում: Փոխհատուցման իրավունքից կարող են օգտվել նաև այն տարեցներն, ովքեր երկրից բացակայելու կամ փաստաթղթային անհամապատասխանությունների պատճառով նախորդ տարիներին չեն հասցրել օգտվել արտոնությունից: 

Տիկին Սեդան 45 տարի աշխատել է Լենինականի տեքստիլ կոմբինատում որպես գործող բանվորուհի: Լավ աշխատանքի համար շքանշան էլ է ստացել: Պատմում էր՝ աշխատում էին  երեք հերթով ու բարձր աշխատավարձ էին ստանում: Կարողացել է ընտանիքին լավ պահել, հետն էլ խնայողություններ անել: Ասում է՝ գումարը նեղ օրվա համար էր որպես ավանդ պահում բանկում:

Երիտասարդ տարիքում կատարած խնայողություններից «Խնայբանկ»-ում մնացել էր 4 հազար ռուբլի: 85-ամյա կինը վերջապես այն տնօրինելու հնարավորություն է ստացել: Հերթը հասել է 1934 թվականին ծնվածներին, փաստաթղթերը հարազատներն արդեն ներկայացրել են սոցծառայություն:

Փոխհատուցումը, այս տարի 1934 թվականի ծնվածներից բացի, կարող են ստանալ նաև 1933 թվականին ծնված քաղաքացիները: Անձնական փաստաթղթերի ու «Խնայբանկ»-ի գրքույկների հետ միասին պարտադիր է նաև հայխնայբանկի իրավահաջորդ բանկից տեղեկանքը: Այն կարևոր է նաև այն դեպքում, երբ չի պահպանվել ավանդային գրքույկը:

Տեղեկանքը նաև հիմնավոր փաստաթուղթ է հանդիսանում մահացած ամուսնու կամ կնոջ ավանդային խնայողությունը փոխհատուցելու համար, այս դեպքում կվճարվի գումարի միայն 50 տոկոսը: Իսկ այն քաղաքացիներն, ովքեր արդեն ընդգրկվել են վճարման ցուցակներում, բայց մահվան պատճառով չեն հասցնում ստանալ, այս դեպքում գումարը ոչ մասնակի, այլ ամբողջությամբ տրվում է օրինական ժառանգներին:

«Եթե քաղաքացին հաշվառվել է, ցուցակում ընդգրկվել, բայց չի հասցրել գումարը ստանալ ու մահացել է, դա պահպանվում է արխիվում այնքան ժամանակ, մինչև նշված գումարի նկատմամբ ձեռք կբերվի համապատասխան իրավունք և նոտարական կարգով վավերացումից հետո օրինական ժառանգը կարող է ստանալ չվճարված գումարը»,- պարզաբանել է սոցիալական աջակցության  Գյումրի 2  բաժնի պետ Էդվարդ Բաղրամյանը:

Նախորդ տարվանից զոհված ազատամարտիկների ժառանգներին ևս խնայբանկերում ունեցած ավանդային խնայողությունները ստանալու իրավունք տրվեց: Զոհված ազատամարտիկներից բացի՝ արտահերթ կարող են ստանալ նաև մարտական գործողություններին մասնակցած և համապատասխան փաստաթուղթ ունեցող այն անձինք, ովքեր ունեն Պաշտպանության նախարարության համապատասխան գրքույկները:

Փոխհատուցման արտոնությունից օգտվող 1933 և 1934 թվականների ծնվածների հստակ ցուցակներ սոցիալական ծառայություները չունեն, սպասում են քաղաքացիների դիմումներին։ Տարեվերջին է պարզ դառնում նրանց վերջնական թիվը։

Օրինակ՝ նախորդ տարի 1932 թվականին ծնվածներից փոխհատուցում Գյումրիում ստացել է 46-ը։ Իսկ գումարի վճարման հաշվարկի բանաձևում փոփոխություններ չկան: Պետությունը 1000 խորհրդային ռուբլու դիմաց փոխհատուցում է 84 հազար դրամ, որից հետո գումարն աստիճանաբար նվազում է: