Գողացված տրակտորը Թուրքիայից վերադարձրել են Հայաստան

Թուրքիայից Հայաստան է վերադարձվել նախորդ տարվա աշնանը գողացված «Բելառուս» մակնիշի տրակտորը: Դեպքը տեղի էր ունեցել հայ-թուրքական սահմանի մոտ գտնվող հատուկ պահպանվող տարածքում, որտեղ գտնվում է Ախուրյանի տարածաշրջանի Հայկավան գյուղի խոտհարքների հիմնական մասը: Գողացված տրակտորը Հայկավան գյուղի սեփականությունն է:

Հայկավանցի Գոռ Կարապետյանը գյուղի ինժեներ-մեխանիզատորն է, գյուղապետարանին պատկանող գյուղտեխնիկան խոտհունձի սեզոնին ինքն է աշխատեցնում։ Իսկ խոտհարքների մեծ մասն էլ հայ-թուրքական սահմանի հատուկ պահպանվող տարածքում է, հատուկ թույլտվությամբ ու անցաթղթով են մտնում դաշտերը: Անցած տարի` սեպտեմբերի 30-ին, խոտհունձի ժամանակ տրակտորը անսարք վիճակում թողել էր դաշտում ու վերադարձել գյուղ: Հաջորդ օրը եկել, տեսել է, որ բազմաֆունկցիոնալ տրակտորը դաշտում չէ:

«Տրակտորը, որտեղ որ կանգնեցրել էի, չէր երևում, խոդի էին տվել, ըդպես կասիլկեն հետևից գռքաշ կապած խոտերի հակերի միջով անցել էին Թուրքիայի սահմանը»,- պատմում է Գոռ Կարապետյանը։

Իսկ սահմանապահներին մեխանիզատորը տեղյակ էր պահել, որ անսարք տրակտորը թողել է դաշտում, որ վաղն առավոտյան միայն կվերադառնա ու կնորոգի գյուղտեխնիկան: Բայց թե ինչպես է լինում, որ սահմանը հսկողների տեսադաշտից տրակտորն ու խոտի մամլիչն անհետանում և հայտնվում են սահմանից այն կողմ, այդպես էլ պատասխան չեն տալիս, ավելին` սահմանապահները կարծում են, թե կատակ է անում:

«750-800 մետր մեր տարածք էին մտել, այդտեղից շարժվելով 300-400 մետր դեպի ուղեկալի կողմը, հենց այդտեղ` ճանապարհի կողքին կանգնած տրակտորը վերցրել ու գնացել էին»- նկարագրում է մեխանիզատորը։

Հետո Գոռ Կարապետյանին սահմանապահները խոստացել են տեխնիկան գտնել ու վերադարձնել`ասելով, թե թուրք ոստիկաններին տեղյակ են պահել: Անհետանալուց 5 ամիս անց տրակտորը վերադարձրել են համայնք: Սահմանապահները պատմել են, որ տրակտորը հայտնաբերվել է ինչ-որ ամայի տարածքում։

«Տարել, դեզի մեջն են պահել, դարմանն աղցե, սալոմն աղցե, լցե վրեն ու փակել են լրիվ»,- խոտի մանրացրած կտորները շարժիչից հեռացնելով ենթադրում է տրակտորիստը։

Գողոնը թաքցնելու համար նաև արտաքինից էին փոխել: Այն ամբողջությամբ ներկել են կապույտ, իսկ անիվները` սպիտակ, բայց ներսից ամեն ինչ թալանված վիճակում է ու շահագործել հնարավոր չէ:

Մեխանիզատորի աչքով մանրակրկիտ զննությունն անելուց հետո համոզված ասում է, որ դիտավորյալ են տեխնիկան հասցրել այս վիճակին: Շարժիչն էլ է ամբողջությամբ վնասված, որը էժան չէ`2000 դոլար արժե: Տրակտորը 1989 թվականի արտադրության է, բայց եղել է գերազանց վիճակում:

Այս տրակտորը Թուրքիայի տարածքում երկար թաքցնել չէր լինի, ասում է փորձառու մեխանիզատորը, քանի որ Թուրքիան չունի «Բելառուս» մակնիշի տրակտորներ: Վնասված ու թալանված տրակտորը թեև համայնքապատկան է, բայց վերանորոգման ծախսերը Գոռ Կարապետյանն է հոգալու:

Մեկ ամսից գյուղում սկսվելու են հողի մշակման աշխատանքները, իսկ վարող, հնձող, հակավորող տրակտորը միայն հայկավանցիներին չէ, որ պետք է գալու: Գյուղտեխնիկան հասնում է նաև հարևան համայնքներին: