Ես չեմ ուզում, որ ՇՊՀ-ն պատրաստի խոպան գնացող մասնագետներ. Լուսինե Ֆլջյան

Շիրակի պետական համալսարանի ռեկտորի թափուր պաշտոնի առայժմ միակ հայտնի հավակնորդը Լուսինե Ֆլջյանն է: Նա այսօր հանդիպում է ունեցել համալսարանի դասախոսական կազմի և ուսանողների հետ ու ներկայացրել բուհի զարգացման իր ծրագիրը: Լուսինե Ֆլջյանն այս բուհի շրջանավարտն է, 8 տարի դասավանդել  է Գյումրիի մանկավարաժական ինստիտուտի օտար լեզուների ամբիոնում, ապա՝ 5 տարի որպես դեկան ղեկավարել է Երևանի Բրյուսովի անվան լեզվաբանական ինստիտուտի օտար լեզուների ամբիոնը, ապա՝ աշխատել գիտական և միջազգային կապերի գծով պրոռեկտոր: Լուսինե Ֆլջյանն աշխատել է նաև Կրթության և գիտության նախարարությունում՝ որպես բարձրագույն և հետբուհական կրթության համակարգման բաժնի պետ:

Հանդիպման ընթացքում ռեկտորի հավանական թեկնածուն ներկայացրել է բուհի զարգացման իր ծրագիրը, խոսել առկա խնդիրների լուծման  իր մոտեցումների մասին ու կարևորել հատկապես թիմային աշխատանքի սկզբունքը:

«Եթե ես դառնամ այս բուհի ռեկտոր, մենք փակելու ենք բոլոր հին էջերը և մեր համալսարանի կենսագրությունը սկսելու ենք մաքուր էջից և հավատացեք, այդ մաքուր էջը բացելու ընթացքում մենք ժամանակ չենք ունենա միջանձնային ոչ մի խնդրի, որովհետև մենք կունենանք հստակ նպատակներ մեր առջև դրված և դրան կհասնենք մեր միասնական աշխատանքի շնորհիվ»,- իր ելույթում նշել է Լուսինե Ֆլջյանը:

Ռեկտորի թեկնածուն անդրադարձել է նաև բուհում նոր կրթական ծրագրերի ներդրման անհրաժեշտութայնն ու տեխնիկապես հագեցվածության խնդրին, խոսել է դասախոսների աշխատավարձերի բարձրացման անհրաժեշտությունից և խոստացել ընտրվելու դեպքում  կանոնակարգել այդ հարցերը: Լուսինե Ֆլջյանի կարծիքով՝ հոգնած, նյարդայնացած, ցածր աշխատավարձ ստացող դասախոսից որակյալ ուսուցում պահանջել հնարավոր չէ, դասախոսները պետք է արժանավայել պայմաններում աշխատելու հնարավորություն ունենան: Իսկ ուսանողներին անդրադառնալիս նա նշել է, որ բուհում պետք է սովորեն իսկապես գիտակ ուսանողները, ՇՊՀ դիպլոմը պետք է ոչ թե ամեն մեկին հասանելի և արժեզրկված լինի, այլ արժեքավոր մի փաստաթուղթ լինի, որին ձգտեն շատերը:

«Ես ամեն ինչ անելու եմ, որ Շիրակի պետական համալսարանը չպատրաստի խոպան գնացող մասնագետներ, ես ուզում եմ, որ մեր ուսանողները կայանան մեր երկրում և մեր քաղաքում, զգան, որ իրենք են այս համալսարանի տերը և իրենք էլ, որպես մասնագետներ, պահանջված են աշխատաշուկայում»,- նշել է Լուսինե Ֆլջյանը:

Բազմաթիվ կրթական ծրագրերի  հեղինակ ու միջազգային հայտնի համալսարաններում դասախոսություններ ունեցած թեկնածուն վստահ է, որ Շիրակի պետական համալսարանը արդյունավետ կառավարման շնորհիվ կկարողանա դուրս բերել ներկայիս վիճակից ու դարձնել տարածաշրջանում հայտնի կրթօջախներից մեկը: