Լավ տնտեսություն ունենալն է Արցախի հարցը կարգավորելու հիմքը. Արծվիկ Մինասյանը` կառավարության ծրագրի թերությունների մասին

ՀՅԴ ԳՄ անդամներն այսօր հրավիրված մամուլի ասուլիսում անդրադարձել են կառավարության ծրագրի դրույթներին ու բացթողումներին: Մինչ ասուլիսը նրանք հայտարարություն էին տարածել, որում ներկայացրել էին իրենց դիտարկումները: ՀՅԴ ԳՄ ներկայացուցիչ Իշխան Սաղաթելյանը ներկայացրեց իրենց հայտարարությունը` նշելով, որ ծրագիրը բավարար անդրադարձ չի կատարել ազգային անվտանգությանը, բացթողումներ կան տարբեր ոլորտներում: Մասնավորապես ասաց.

«Կառավարության ծրագրում բացակայում են կոնկրետ թիրախներ, հանրային կյանքի որակի բարելավումը բնութագրող նպատակադրումներ և ժամկետներ, գերիշխում են դեկլարատիվ բնույթի հայտարարություններ: Այս մասին հայտարարություն է տարածել ՀՅԴ Հայաստանի Գերագույն մարմինը՝ անդրադառնալով կառավարության ծրագրին և  կառուցվածքին»:

Իսկ Արծվիկ Մինասյանը, անդրադառնալով քաղաքականությանը, ասաց, որ անցյալ տարի ՀՅԴ-ն հրապարակել է սոցիալ-տնտեսական զարգացման դրույթները, որոնք հիմք են կառավարության ցանկացած ծրագրին տրվող գնահատականների համար:

«Ուզում եմ արձանագրել, որ այս հանձնախմբերի ստեղծման նպատակն է ունենալ հանրային կյանքի բոլոր ոլորտների վերաբերյալ տեսակետների ամբողջություն, մենք այս աշխատանքը դարձնելու ենք հրապարակային: Կարևորագույն խնդիր ենք համարել կառավարության կազմավորման սահմանադրականության հարցը, բազմաթիվ քննարկումներ են եղել: Ներկա կառավարությունը բոլոր մակարդակներում օրենքի, սահմանադրականության և իրավունքի հետ պրոբլեմ ունի կամ չեն ծանոթանում համապատասխան դրույթին, կամ պատշաճ իրավական մոտեցում չեն ցուցաբերում, որի արդյունքում տեսնում ենք տարակերպ մեկնաբանություններ, հաճախ նաև անտեսում են Սահմանադրության նորմերը»,- ասաց Մինասյանը:

Ըստ նրա` վարչապետը պարտավոր է հինգօրյա ժամկետում կառավարությանը ներկայացնել նախագահի թեկնածուներին, ինչը ևս չի արվել:

«Եթե որևէ մեկն իրենցից չզլանար, վերցներ ու կարդար պաշտոնյաների պարգևատրման կարգավորումների մասին համապատասխան օրենքի կարգավորումները, կտեսնեինք, որ այնտեղ բոլոր հարցերի պատասխանները տրված են, գործ ունենք ոչ միայն անփորձության, այլև օրենքը պարզագույն ձևով ծանոթանալու ոչ բավարար ցանկության հետ»,- ասաց Մինասյանը:

Նա քննադատեց նաև կադրային քաղաքականությունը` ընդգծելով, որ լուրջ բացթողումներ կան:

«Ծրագիրը զերծ է գաղափարական հենքից, եզրափակիչ մասում անտեսված են արտախորհրդարանական քաղաքական ուժերը, կարծեք թե երկրում գոյություն չունեն, կարծեք Հայաստանի քաղաքական դաշտը բաղկացած է հաղթող ուժից և խորհրդարանում ներկայացված ուժից»,- հավելեց նա:

Խոսելով տնտեսական  առաջընթացի վերաբերյալ կառավարության տեսլականի մասին` այն համարեց սխալ մոտեցում` ասելով.

«Ոչ թե Արցախյան հարցի լուծումն է բերելու տնտեսական առաջընթացի, այլ հակառակը, լավ տնտեսություն ունենալն է հիմքը, որպեսզի Արցախի հարցը կարգավորենք, մենք «զարգանալ չզիջելով» հայեցակարգի կրողն ենք, ժողովրդի կենսական շահերից է բխում: Ծրագրում որևէ տեղ չեք գտնի ազգային պետություն կառուցելու բանաձևը»: