Դիպլոմ արտադրողի կարգավիճակից հարկավոր է անցնել իսկական մասնագետներ մատակարարելուն․ Լևոն Բարսեղյան

Հայաստանի պետական 18 բուհերի հոգաբարձուների խորհուրդների նախագահները երեկ հանդիպում  են ունեցել Կրթության և գիտության նախարար Արայիկ Հարությունյանի հետ։ Հանդիումը եղել է ոչ պաշտոնական, իսկ քննարկումներն անցել են թեյի սեղանի շուրջ։ Հոգաբարձուների խորհրդի նախագահների և նախարարի հանդիպմանը հրավիրված է եղել նաև Շիրակի պետական համալսարանի հոգաբարձուների խորհրդի նախագահ Լևոն Բարսեղյանը, ում գնահատմամբ՝  նմանատիպ հանդիպումները  բարձրագույն ուսումնական հաստատությունների միջև, շատ կարևոր են։

«Աննախադեպ հանդիպում էր, ոչ ոք նման բան չէր հիշում, առաջին անգամ իրար երես տեսանք, շատերս իրար ճանաչում էինք։ Քննարկեցինք բուհական կրթության խնդիրները և բուհական բարեփոխումների հարցերը», – ասել է Բարսեղյանը։

Հանդիպմանը քննարկվել են նաև առանձին բուհերի վերաբերող խնդիրներ, մասնակիցները շեշտել են, որ ռեկտորների հանդիպումներ ու քննարկումներ հաճախ են կազմակերպվում, իսկ հոգաբարձուների խորհուրդների նախագահները միշտ մնացել են ստվերում։

«Որոշեցինք առաջարկել, որ հոգաբարձուների խորհուրդների համաժողովի նման մի բան անցկացվի, որին կմասնակցեն բոլոր պետական 18 և միջպետական երեք բուհերի  հոգաբարձուների խորհուրդների անդամները, որի ընթացքում կլինի նաև փորձի փոխանակում»,- ասել է ՇՊՀ հոգաբարձուների խորհրդի նախագահը։

Լևոն Բարսեղյանը նաև նշել է,որ հեղափոխությունից հետո այս ոլորտում արմատական փոփոխություններ են կատարվել, և բուհերի կառավարման նախկին սկզբունքը այլևս կիրառելի չէ։

«Դուք պատկերացնում եք, Հայաստանի թիվ մեկ պաշտոնյաները՝ նախագահը, վարչապետը կամ ԱԺ նախագահը, որոնք եղել են բուհերի հոգաբարձուների խորհուրդների նախագահներ, հանդիպեին ու քննարկեին բուհերի խնդիրները՝ մանրամասնությամբ, կամ մեզ նման զբաղվեին փաստաթղթերով, սկսեին ուսումնասիրել, նման բան չի եղել, հիմա այլ է», – փոխանցել է նա։

Հոգաբարձուների խորհուրդների նախագահների հանդիպմանը քննարկված  խնդիրներից մեկը եղել է համընդհանուր բոլորի համար։ Ներկաները կարծիք են հայտնել, որ պետք է վերականգնել բուհերի և արտադրական ընկերությունների միջև կապը, ու մասնագետներ պատրաստել միայն նրանց պահանջներին համապատասխան։

«Բուհական կրթության և տնտեսության կապը լուրջ խոտանվածություն կամ խաթարվածություն ունի, դիպլոմ արտադրող իրավիճակից հարկավոր է անցնել արդյունաբերությանը, տնտեսությանը իսկական մասնագետներ մատակարարելու վիճակին։ Իներցիոն բուհական կրթությունը արմատական բարեփոխման կարիք ունի, սա մտահոգություն էր, որը բոլորի մոտ կար»,- ասել է Լևոն Բարսեղյանը։

Նախարար Արայիկ Հարությունյանի հետ հանդիպումն ավարտվել է երեկոյան ժամը 22-ին։