Որքան կտևի վարչապետի 4-րդ ասուլիսը. ինչ են հուշում Փաշինյանի երեք մեծ ասուլիսները

Այսօր՝ ժամը 10:30-ին, Ազգային պատկերասրահում տեղի կունենա վարչապետ Նիկոլ Փաշինյանի ասուլիսը: Սա վարչապետի թվով 4-րդ ասուլիսն է պաշտոնավարման մեկ տարվա ընթացքում:

SHANTNEWS.am-ը ներկայացնում է վարչապետի նախորդ 3 ասուլիսներին քննարկված թեմաներն ու հարցերը:

Վարչապետի պաշտոնում առաջին ասուլիսը

Նիկոլ Փաշինյանի առաջին ասուլիսը, որին հավատարմագրված էին հայաստանյան մեդիադաշտի գրեթե բոլոր ներկայացուցիչները, տեղի է ունեցել 2018-ի հուլիսի 20-ին, կառավարության նիստերի դահլիճում:

Այդ ասուլիսը տևել է մոտ 2․5 ժամ, հնչել են հարցեր տարբեր ոլորտներից: Փաշինյանն իր առաջին ասուլիսի ժամանակ խոսել է իր անունից հանդես եկած ռուս պրանկերների մասին: Նա նշել է,  որ ընդհանուր առմամբ, բացի հումորից, այդտեղ տեսնում է նաև որոշակի քաղաքականություն ճշտելու ձգտում, փորձում են ճշտել՝ ԵՄ-ն որքանով է աջակցել Հայաստանում հեղափոխական գործընթացներին:

Անդրադառնալով հեղափոխությունից հետո ԵՄ-ի հետ հաղորդակցությանը՝ Փաշինյանն ասել է.

«Բրյուսել կատարած իմ այցի ընթացքում ես իմ բոլոր հանդիպումներում հստակ արձանագրել եմ հետևյալը՝ ժողովրդավարությունը մեզ համար ոչ թե արտաքին քաղաքական կողմնորոշում է, այլ մեր համոզմունքն է, հավատամքն է։ Վերջերս տեղի ունեցած քաղաքական իրադարձությունները ցույց տվեցին, որ դա մեր ժողովրդի քաղաքական արժեքների համախումբն է»,- ասել է վարչապետը:

Վարչապետն անդրադարձել է քաղբանտարկյալների խնդրին և շեշտել , որ իր համար խայտառակություն կլինի, որ Հայաստանում քաղբանտարկյալներ լինեն: Փաշինյանը նաև բացատրել է իր կառավարության վարած տնտեսական քաղաքականությունը և որպես առանցքային նպատակ նշել կոռուպցիայի դեմ պայքարն ու անկախ դատական համակարգի ստեղծումը։

Ասուլիսն ամբողջությամբ՝ ստորև․

Երկրորդ ասուլիս՝ եռագույն փողկապով

Նիկոլ Փաշինյանի երկրորդ ասուլիսը տեղի է ունեցել 2018-ի նոյեմբերի 20-ին: Ասուլիսին ներկա են եղել ավելի քան 50 լրատվամիջոցների ներկայացուցիչներ, այն տևել է մոտ 3․5 ժամ: Այդ ժամանակ վարչապետի արդեն պաշտոնակատար Նիկոլ Փաշինյանն արտահերթ խորհրդարանական ընտրությունների նախապատրաստական փուլում էր, և լրագրողներին էլ մեծ մասամբ հուզում էին առաջիկայում սպասվող ընտրությունները: Բացի այդ, լրագրողները հետաքրքրվել են նաև ՀԱՊԿ-ի հանդեպ վարչապետի դիրքորոշմամբ: Ի պատասխան՝ Փաշինյանն ասել է, որ ԵԱՏՄ-ում կան մեծ հնարավորություններ, որոնք պետք է օգտագործվեն:

Այդ ժամանակահատվածում ՀԱՊԿ քարտուղարի ընտրության հարցով լարվել էին հարաբերությունները Փաշինյանի ու Բելառուսի նախագահ Ալեքսանդր Լուկաշենկոյի միջև: Փաշինյանը հարաբերությունների լարվածության ֆոնին նաև ասել է, որ ՀԱՊԿ գլխավոր քարտուղարի պաշտոնն այս համատեքստում երկրորդական ու երրորդական հարց է:

Նիկոլ Փաշինյանն ասուլիսի ընթացքում նաև արձանագրել է, որ նախկին յուրացումներից ու չարաշահումներից 10.5 մլրդ դրամ է վերականգնվել:

Ասուլիսն ամբողջությամբ՝ ստորև․

Երրորդ ասուլիսը՝ Մատենադարանում

Լրատվամիջոցների հետ վարչապետ Նիկոլ Փաշինյանի երրորդ հանդիպումը տեղի ունեցավ երկու ամիս առաջ՝ մարտի 19-ին, Մատենադարանում: Այս ասուլիսն իր տևողությամբ ամենաերկարն է եղել՝ մոտ 4․5 ժամ տևողությամբ:

Սկզբում վարչապետը բացման խոսքում նշել է, որ երկրում ներդրումային հետաքրքրությունների որոշակի աճ կա.

«Այս պահի դրությամբ կառավարության հետ քննարկվում է առնվազն 89 ներդրումային ծրագիր՝ շուրջ 2․7 մլրդ ԱՄՆ դոլարի ներդրումային ծավալով: Այդ ծրագրերից 42-ը՝ 774 մլն ԱՄՆ դոլարի ծավալով, ըստ էության, գտնվում են իրականացման տարբեր փուլերում»,- ասել է Նիկոլ Փաշինյանը:

Ասուլիսի ընթացքում Փաշինյանը նաև անդրադարձել է Ղարաբաղյան հակամարտության կարգավորման ներկա փուլին, իր ընտանիքին ուղղված քննադատություններին, պարգևավճարների հետ կապված սկանդալներին, տնտեսական հեղափոխությանն ու այլ թեմաների: