Գյումրիի «Թռչունյան տուն» գիշերօթիկի երեխաների մի մասը տեղափոխվել է այլ հաստատություններ, մյուսները վերադարձել են ընտանիք

Հունվարի 11-ից «Թռչունյան տուն» երեխաների խնամքի գիշերօթիկ հաստատությունը համարվում է լուծարված: Պատճառը դեռ նախորդ տարվա հունիսից բարերարների ֆինանսավորման դադարեցումն էր, ինչի պատճառով հաստատությունը կուտակել էր շուրջ 20 միլիոն դրամ պարտք ու հայտնվել անելանելի վիճակում: Ոչ միայն գիշերօթիկի, նաև նույն շենքում գործող Հրանտ Դինքի անվան հանրակրթական դպրոցի հետագա գործունեությունը շարունակելու համար Մայր Աթոռն այդպես էլ  նոր բարերարներ չգտավ: Այս 10 օրվա ընթացքում «Թռչունյան տան» երեխաների մի մասն արդեն վերադարձել է ընտանիք, մյուսները՝ տեղափոխվել այլ հաստատություններ:

«Թռչունյան տունը» խնամքի մյուս կենտրոններից տարբերվում էր ոչ միայն գործառույթով, այլև կարգավիճակով․ այն պետության ենթակայության տակ գտնվող կառույց չէր: Բայց Աշխատանքի և սոցիալական հարցերի նախարարությունը դեռ ամիսներ առաջ հայտարարեց, որ իրավիճակից ելնելով՝ պետությունը պատրաստ է ստանձնել երեխաների խնամքը:

Հունվարի 10-ին արդեն նախարարության ու Մայր Աթոռի ներկայացուցիչները տեղում հայտարարեցին «Թռչունյան տան» փակման մասին: Որոշվեց գիշերօթիկի երեխաների մի մասին վերադարձնել ընտանիք, իսկ մյուսներին՝ տեղափոխել այլ հաստատություններ: «Ներկայացվել է 108 երեխայի տվյալ, որոնց մի մասը եղել են ուղղակի դպրոց հաճախող, իսկ մյուս մասը՝ խնամք ստացող:

Հիմա մենք էդ տարանջատումն ենք իրականացնում, որ հստակ իմանանք, թե որ երեխաներն են ուղղակի դպրոց հաճախել և վերադարձել իրենց տներ, իսկ որ երեխաները՝ մնացել, գիշերել այստեղ։ Ինձ թվում է, որ գիշերող երեխաները տեղափոխվել են «Նանսեն»»,- նշում է Շիրակի մարզպետարանի ընտանիքի, կանանց և երեխաների իրավունքների պաշտպանության բաժնի պետ Լիլիթ Գորգինյանը։

«Թռչունյան տնից» Նանսենի անվան թիվ 2 գիշերօթիկ հաստատություն են տեղափոխվել ռիսկային խմբի երեխաները, որոնց տուն վերադարձն առայժմ անհնար է: Այս պահին խնամվող 68 երեխա կա Նանսենի անվան խնամքի կենտրոնում, այստեղ են բերվել ոչ միայն «Թռչունյան տան», այլև լուծարված մյուս՝ թիվ 1 գիշերօթիկի սաները:

«Մեզ մոտ տեղափոխվել են «Թռչունյան տան» ռիսկային խմբի երեխաները՝ թվով 21, և մեկ չափահաս աղջիկ: 21 երեխաներ են, բայց ոչ 21 ընտանիք, որովհետև ունենք բազմազավակ ընտանիքներ, ունենք երեխաներ մեկ ընտանիքից՝ երեք երեխա, ևս երեք երեխա, ևս երեք և մեկ ընտանիքից վեց երեխա»,-ասում է Գյումրիի Նանսենի անվան երեխաների խնամքի և պաշտպանության թիվ 2 գիշերօթիկ հաստատության տնօրեն Անահիտ Կարապետյանը։

Տեղափոխված 21 երեխաներն էլ դպրոցական են, որոնք սովորում էին «Թռչունյան տան» հանրակրթական դպրոցում: Այժմ հաճախում են թիվ 23 միջնակարգ դպրոց: Երեխաների տեղափոխությամբ խնամքի կենտրոնի ֆինանսավորումը չի փոխվել, բայց փոխվել է աշխատանքային գրաֆիկը: Հաստատությունն աշխատում է շաբաթվա բոլոր օրերին:

Երեխաների տեղափոխությունները կատարվել են ծնողների կամ խնամակալների դիմումների հիման վրա, բայց նրանց թվում կան երեխաներ, որոնց ծնողները դեռևս մարզպետարան չեն ներկայացել: «Թռչունյան տնից» ընտանիք վերադարձած երեխաներին ցուցաբերվել է բնաիրային ու ֆինանսական աջակցություն, սա սկզբնական փուլի համար, դեռ ընտանիքների կարիքների ուսումնասիրություն չի արվել։

«Մինչ այս պահը դեռևս մասնագիտական կարիքների գնահատում չունենք, ուղղակի երեխաների տեղափոխումն ենք կազմակերպել, այսօրվանից նոր կսկսվի մասնագիտական գնահատումը»,- նշել է Լիլիթ Գորգինյանը։

Արդեն ընտանիքում ապրող երեխաներից մի քանիսն էլ հաճախում են  խնամքի ցերեկային կենտրոններ: Սոցիալապես առավել խոցելի ընտանիքների երեխաներից երեքը հաճախում են «Դեպի առաջ» երեխաների զարգացման կենտրոն:

«Գյումրիում գիշերօթիկ հաստատությունների և «Թռչունյան տուն» մանկատան փակումից հետո հատկապես շատ-շատ են դիմումները՝ կենտրոնում ընդգրկվելու նպատակով: Լավագույն տարբերակն այդ երեխաներին ցերեկային կենտրոններ ընդգրկելն է: Միայն նախորդ շաբաթ «Թռչունյան տուն» մանկատնից ընդգրկել ենք երեք երեխաների ՝ 10, 11 և 12 տարեկան տղաների»,-նշել է «Դեպի առաջ» երեխաների զարգացման կենտրոնի կոորդինատոր Աիդա Խաչատրյանը:

«Թռչունյան տան» նախկին սաներն առավելություն են ստացել, ցերեկային կենտրոն գալիս են ամեն օր, դասապատրաստումից բացի, տրվում է սնունդ ու սոցիալական աջակցություն: Իսկ Գյումրիի՝ առայժմ գործող միակ խնամքի հաստատությունում՝ Նանսենի անվան թիվ 2 գիշերօթիկում, երեխաները կմնան մինչև հունիսի 25-ը, դրանից հետո խնամվող բոլոր՝ 86 երեխաները ևս կվերադառնան ընտանիք, իսկ թե ռիսկային խմբում հայտնված երեխաների խնամքի կազմակերպումն ի՞նչ կարգով է լինելու, դեռ հստակեցումների փուլում է: