Ախտահանիչ նյութերի ու դիմակների դեֆիցիտ և գնաճ. ՏՄՊՊՀ-ն դիտարկում է արել

Տնտեսական մրցակցության պաշտպանության պետական հանձնաժողովը անցած մեկ շաբաթում 90 խոշոր դեղատներում դիտարկում է կատարել և արձանագրած արդյունքների հիման վրա այսօր՝ մարտի 3-ին, լրագրողների հետ հանդիպման ժամանակ հանձնաժողովի նախագահ Գեղամ Գևորգյանը հայտարարեց, որ ինչպես աշխարհում, այնպես էլ Հայաստանում կա դիմակների դեֆիցիտ, սակայն դեղատնային խոշոր ցանցերում գնի բարձրացում չի արձանագրվել:

«ՀՀ-ից դիմակների արտահանում է իրականացվել, դրանք մասնավոր ընկերություններ էին՝ գնել և արտահանել են, դրանք ներմուծող խոշոր ընկերություններ չեն, բայց արհեստական դեֆիցիտ գոյություն չունի»,- ասաց Գեղամ Գևորգյանը:

Գեղամ Գևորգյանը չբացառեց, որ փոքր դեղատներում, որոնց վերահսկողությունն իրենց տիրույթում չէ, կա գների բարձրացում՝ 200 կամ 300 դրամ, նույնիսկ՝ ուղարկում list.am-ով և Facebook-ով են հայտարարություն տալիս դիմակի վաճառքի մասին, բայց դրանք տնտեսվարող սուբյեկտներ չեն: Նրանց Գեղամ Գևորգյանը կոչ արեց դուրս չգալ սոցիալական պատասխանատվության շրջանակից:

Գեղամ Գևորգյանը նաև նշեց, որ դեֆիցիտով պայմանավորված՝ դիմակների գներն ամբողջ աշխարհում են բարձրացել, հետևաբար, եթե նոր խմբաքանակ հնարավոր լինի ձեռք բերել և ներմուծել Հայաստան՝ թանկ կարժենա։

Ինչ վերաբերում է ախտահանող գելերին, ապա վերջին օրերին նաև դրանց պահանջարկն է կտրուկ աճել: Քանի որ Հայաստանում հաստատված կորոնավիրուսի դեպքի մասին լուրը տարածվեց հանգստյան օրերին, հենց այդ ժամանակ ամբողջ ազգը գրոհեց՝ Ալկոգել գնելու, մարդիկ տոպրակներով ալկոգել էին առնում, իսկ ախտահանիչ նյութերի նման պահանջարկ Հայաստանում երբեք չի եղել:

«Այսօր առավոտից նոր խմբաքանակների մատակարարումներ են եղել, իսկ տեղական արտադրողը վերազինվում է` ավելի մեծ ծավալի արտադրություն սկսելու համար։ Հայաստանում ախտահանիչ նյութեր արտադրող 3 ընկերություն կա, նրանք մինչև հինգշաբթի անհրաժեշտ ծավալը կապահովեն: Այդ ընկերությունները գները չեն բարձրացրել ու չեն էլ բարձրացնելու»,- նշեց Գեղամ Գևորգյանը:

Նա նաև նշեց, որ ավելի թանկ արժեն ներկրված ախտահանիչ միջոցները, որոնք տեսնելով՝ քաղաքացիները մտածել են, թե գները բարձրացվել են: Իսկ ինչ վերաբերում է պարենային ապրանքներին, ապա հանձնաժողովի նախագահը վստահեցրեց, որ ավելորդ գնումների կարիք չկա:

«Շաքարի քանակը Հայաստանում այնքան է, որ մեկ տարի կբավականացնի, նույնը վերաբերում է նաև ալյուրին: Հետևաբար, մեծ ծավալի գնումներ անել պետք չէ»,- ընդգծեց Գևորգյանը: