Գյումրիի և Ախուրյանի հրշեջ փրկարարական ջոկատների նոր շենքերի կառուցումն ավարտական փուլում է

Գյումրիում և Ախուրյանում  ավարտին են մոտենում հրշեջ փրկարարական ջոկատների նոր շենքերի կառուցման աշխատանքները: Փրկարարական ծառայության համար ժամանակակից պահանջներին համապատասխան նոր շենքերի շինարարությունը սկսվեց 2020-ի ամռանը։ Մեկ տարի անց երկու շենքերն էլ շահագործման կհանձնվեն։ Նոր  կայանների կառուցումն ու Գյումրիում  հրշեջ փրկարարական ջոկատի տեղակայման վայրի փոփոխությունը դեպքերի արագ արձագանքումն ապահովելու պայման է։ Ծրագիրն իրականացվում է Հայաստանում ԱՄՆ դեսպանության ֆինանսավորմամբ։

Հրշեջ փրկարարական Գյումրիի ջոկատի նոր շենքը կառուցվում է Անի և Մուշ թաղամասերի միջանկյալ հատվածում: Տարածքի ընտրությունը կատարվել է՝  հաշվի առնելով երկու թաղամասերի խիտ բնակեցված լինելը, ինչպես նաև 3-5 կմ շառավղում գտնվող շրջակա գյուղերի սպասարկումը կդառնա ավելի արդյունավետ:

Գյումրիի հրշեջ փրկարարական ջոկատը մոտ երեք տարի է՝ ժամանակավոր տեղակայված է Հայաստանի էլեկտրացանցերին պատկանող տարածքում: Անհրաժեշտություն է նաև Գյումրիում ունենալ երկրորդ ջոկատը։

«Միանշանակ Գյումրիին անհրաժեշտ է երկրորդ  հրշեջ փրկարարական ջոկատը, էդ ուղղությամբ աշխատանքներ են մեր կողմից տարվում, զեկուցել ենք մեր վերադասին։ Երբ որ երկու ջոկատները սկսեն գործել, քաղաքը  բաժանելու ենք սեկտորների, ամեն մեկն ունենալու է իրեն սպասարկման տարածքը»,- ասել է ԱԻՆ Շիրակի մարզային փրկարարական վարչության պետի տեղակալ Կարեն Եղշատյանը։

Նորակառույց շենքում փրկարարների համար ստեղծվում են վարժանքների և ծառայության համար բոլոր պայմանները: Հրշեջ և փրկարարական ավտոմեքենաները վերջապես կունենան համապատասխան ստանդարտներով ավտոտնակ։ Շենքն ամբողջությամբ արտաքինից նաև ջերմամեկուսացվում է:

Հրշեջ փրկարարական ջոկատի տարածքում կառուցվում է ջրավազան, որը նախատեսված է ռեզերվային  ջրերի կուտակման համար: Մինչ այժմ այսպիսի ենթակառուցվածք մարզի հրշեջ կայանները չեն ունեցել:

Իսկ Ախուրյանի հրշեջ փրկարարական ջոկատի նոր շենքը կառուցվում է հին շենքի տեղում: Կայանը տեխնիկական միջոցներով, հրշեջ ավտոմեքենաներով ապահովված է, բայց  կայանման ու ձմեռային սպասարկման համար բավարար պայմաններ չունեին։

«Ավտոտնակ ունեինք, բայց փոքր էր, հիմա չափերով մեծացրել են, ավելի լուսավոր ու ավելի հարմարավետ է դարձել, նաև կունենանք մշտական լոկալ ջեռուցման համակարգ»,- նշել է ԱԻՆ Շիրակի մարզային փրկարարական վարչության Ախուրյանի ՀՓՋ պետ Հրաչ Սերոբյանը։

Ախուրյանի և Գյումրիի հրշեջ փրկարարական ջոկատներից բացի, նախատեսվում է նաև Աշոցքի փրկարարական ջոկատի համար ևս նոր շենք կառուցել։

«Աշոցքի ՀՓՋ շենքը գտնվում է վթարային վիճակում, հողն այնտեղ նստում է։ Աշխատանքներն էս տարի  նախատեսվում է սկսել, նոր տարածքում կառուցվելու է Աշոցքի փրկարարական ջոկատի նոր շենք»,- ասել է Կարեն Եղշատյանը։

Գյումրիի և Ախուրյանի նորակառույց շենքերը շահագործման կհանձնվեն հուլիսին։ Այսպիսով, Շիրակի մարզային փրկարարական վարչության տարածքային 5 կառույցներից 4-ի շենքային նոր պայմաններով ապահովումը լուծված կհամարվի, կմնա միայն Ամասիայի ջոկատի խնդիրը լուծել։ Քննարկվում է նոր շենքի կառուցման հարցը։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։