Արտահերթ ընտրությունների օրը Շիրակի մարզի 4 ընտրատարածքներում կբացվեն 220 ընտրատեղամասեր․ ընտրողների նախնական թիվը 227484 է 

Հունիսի 20-ի արտահերթ խորհրդարանական ընտրությունների նախապատրաստական աշխատանքներն են սկսել  տարածքային  ընտրական հանձնաժողովները։ Շիրակի մարզը բաժանված է 4 ընտրատարածքների, ըստ այդմ՝ դարձյալ կգործեն չորս տարածքային ընտրական հանձնաժողովներ՝ թիվ 30, 31, 32 և 33։ Աշոցք, Ախուրյան, Ամասիա  խոշորացված համայնքներն ու Գյումրի քաղաքն  ընդգրկված են թիվ 30, 31 և 32 ընտրատարածքներում, իսկ Արթիկի և Անիի տարածաշրջանների  բնակավայրերն ընդգրկված են թիվ 33-ում։ Մարզը կունենա 220 ընտրատեղամաս։ Ընդհանուր ընտրողների թիվը՝ ըստ հրապարակված նախնական ընտրացուցակների,  227․484 է:

Տեխնիկական սարքերը սպասարկող մասնագետների համար արդեն մեկնարկել են դասընթացները, գործնականում  են ներկայացվում այն գործողությունները, որոնք ընտրատեղամասերում իրականացնելու են  կենտրոնական ընտրական հանձնաժողովից նշանակված մասնագետները։ Ծրագրային նորամուծություն է կատարվել, որն այս արտահերթ խորհրդարանական ընտրություններին առաջին անգամ է կիրառվելու։

«Սարքի մեջ ֆունկցիա է ավելացվել, որը ստուգում է սարքի վիճակը՝ սարքին է, թե ոչ։ Այս ֆունկցիայի օգնությամբ խուսափում ենք սխալից, իսկ սխալն էլ այն է, որ ռիսկ կա, որ ընտրության օրը առավոտ էդ զրոյական  թուղթը, որը շատ կարևոր է ընտրությունը սկսելու համար, հնարավոր է չտպվի, ու մենք չիմանանք՝ մինչ այդ ընտրող եղել է, թե ոչ, իսկ նոր ֆունկցիայով վերահսկողությունն ավելի է բարձրացել»,- նշում է տեխնիկական սարքավորումների սպասարկման մասնագետ-դասընթացավար Դավիթ Հակոբյանը։

Հաջորդ փոփոխությունը մատնահետքով նույնականացումը  հակահամաճարակային կանոնների պահպանման անհրաժեշտությունից ելնելով է կատարվել: Սպասարկող մասնագետները, բացի բուն գործառույթներից, ընտրության օրը զբաղվելու են սարքերի ախտահանումով։

«Ամեն ընտրողից հետո պետք է մատնահետքերի տեղը աշխատակիցն անձեռոցիկով մաքրի, մատնահետքերի դաշտն անպայման  անհրաժեշտ է ախտահանել»,- նշել է դասընթացավար Ալեքսան Կիրակոսյանը:

Ախտահանիչ անձեռոցիկներով յուրաքանչյուր ընտրողից հետո սարքի սենսորային հատվածը չախտահանելը կհամարվի ընտրակարգի խախտում: Արդեն տեխնիկական սարքեր են մուտքագրվել ընտրությունների մասնակիցների տվյալների բազան, իսկ նախնական ցուցակները մայիսի 31-ից փակցվել են ընտրատեղամասերի  պատուհաններին: Այս ընթացքում  հաստատվել են տեղամասային հանձնաժողովների նախագահների ու քարտուղարների կազմերը:

Թիվ 31 ընտրատարածքը միակն է, որ ամբողջությամբ ընդգրկում է Գյումրիի  կենտրոնական թաղամասերը և ունի 58 ընտրատեղամաս, որից  երեքի  տեղակայման վայրերը փոխվել են։ Փոփոխության մասին ընտրողներին հանձնաժողովը կտեղեկացնի ծանուցագրերի միջոցով։ Գյումրիից տեղամասեր ունի նաև թիվ 32 տարածքայինը։

«Թիվ 32 տարածքային հանձնաժողովը  իր մեջ ընդգրկում է 24 քաղաքային և 20 գյուղական համայնքներ, ընդգրկված են հիմնականում Ազատանի, Ախուրյանի, ինչպես նաև Գյումրիի մի մասը»,- նշել է  թիվ 32 տարածքային  հանձնաժողովի նորանշանակ նախագահ Ներսես Մարգարյանը։

Ընտրողների նախնական թվերի  ու տեղամասային հանձնաժողովների ձևավորման աշխատանքները  թիվ 30 տարածքային հանձնաժողովում ընթանում էին դիտորդների ներկայությամբ։ Գերմանիայից են ժամանել՝ երկարաժամկետ դիտորդական առաքելությամբ։ Այս ընտրատարածքն ընդգրկում է Աշոցք, Սարապատ, Ամասիա, Արփի և Մարմաշեն խոշորացված համայնքները և ունեն 63 տեղամաս։

«Մեզ համար ամենակարևորն է, թե ինչպես են իրականացվում նախընտրական ժամանակաշրջանում նախապատրաստական աշխատանքները։ Ազնվորեն ասեմ՝ մեզ ընտրությունների արդյունքները չեն հետաքրքրում, մեզ համար կարևոր է հասկանալ, թե  ընտրություններն ինչպես են ընթացել։ Հայաստանում 12-րդ անգամ ենք առաքելություն իրականացնում, ոչ մի անգամ մենք չենք համեմատել ընտրությունները, քանի որ ամեն անգամ թե՛ քաղաքական ընդհանուր պատկերը, թե՛ Ընտրական օրենսգիրքն է փոխվում, ընտրությունները տարբերվում են մեկը մյուսից, և դրանք համեմատելը սխալ է»,- ասել է երկարաժամկետ դիտորդ  Ինգո Բուետնեն։

Դիտորդներին հետաքրքրում էր նաև, թե ինչպես են ընտրություններին մասնակցելու հաշմանդամություն կամ տեղաշարժման խնդիրներ ունեցող քաղաքացիները, իսկ  ընտրատեղամասերի գերակշիռ մասը ապահովված չեն անհրաժեշտ պայմաններով։

Այս ընտրություններին  հանված է գրչի կիրառությունը, քվեաթերթիկներում  չկա բոլորին դեմ եմ նշումը, չի կիրառվելու նաև շրջիկ քվեատուփ: Տեղամասային ընտրական հանձնաժողովների ձևավորումից հետո հանձնաժողովներին կտրամադրվի տեղամասերի  կահավորման նոր ուղեցույց, որն այս անգամ հարմարեցված է լինելու հակահամաճարակային կանոնների  պահանջներին:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։