Գյումրիում անցկացվել է սպորտային մարմնամարզության Հայաստանի պատանիների առաջնությունը

Գյումրիում  անցկացվել է սպորտային մարմնամարզության պատանիների Հայաստանի առաջնությունը։ Մեկ տարվա դադարից հետո անցկացված մրցաշարին  մասնակցել են 100 մարզիկ-մարզուհիներ։ 9-13 տարեկան տղաները  մրցել են վեց գործիքաձևերում՝ նժույգաթափեր, օղակներ, հենացատկ, զուգափայտեր, պտտաձող և ազատ վարժություններ, իսկ աղջիկները  պայքարել են  հենացատկ, տարբեր բարձրությունների զուգափայտ, հավասարակշռության գերան և ազատ վարժություններ գործիքաձևերում։

Մարզիչները գնահատում են մարմնամարզիկների պոտենցիալը և շեշտում, որ  նրանցից լավագույնները  մի քանի տարի հետո կհամալրեն  ազգային հավաքականի շարքերը։ Հայաստանի  սպորտային մարմնամարզության ազգային հավաքականը  միջազգային վարկանիշային աղյուսակում համարվում է աշխարհի լավագույն թիմերից մեկը։

«Շատ կան լավ ու որակյալ երեխաներ, ինձ թվում է՝ էլ ավելի լավ արդյունքներ կունենանք էս սպորտաձևում, մեր նոր աճող սերնդի հետ կապված մեծ սպասելիքներ ունենք։ Եթե լինեն նոր մարզադահլիճներ, ավելի նորացված մարզագույք, ապա արդյունքները կլինեն ավելի լավը»,- նշում է սպորտային մարմնամարզության Եվրոպայի չեմպիոն Հարություն Մերդինյանը։

«Մենք ունենք  բարձրակարգ մարզիկներ, դա ցույց տվեց երկու ամիս առաջ անցկացված Եվրոպայի առաջնությունը, որտեղ մենք մասնակցեցինք հինգ  մարզիկներով և ունեցանք հինգ եզրափակչի մասնակից, դա շատ-շատ մեծ հաջողություն է մեզ համար, երբ, օրինակ, Ֆրանսիան եզրափակչում ունեցավ ընդամենը մեկ մասնակից»,- նշում է սպորտային մարմնամարզության ՀՀ Ազգային հավաքականի գլխավոր մարզիչ Հակոբ Սերոբյանը։

«Առաջնայինը ես կուզենայի, որ մեր մարզադպրոցները Եվրոպայի ստանդարտներին համապատասխանեին։ Ինձ թվում է՝ մարզիկին դա է պետք, որ իր գործիքը թարմ լինի, լավը լինի, էն գործիքներից լինի, որոնցով դու մրցումներին ես մասնակցում, որովհետև դու պարապում ես մի ուրիշ գործիքի վրա, գնում ես էնտեղ և ուրիշ գործիքի վրա ես  վարժությունները կատարում, դա ազդում է արդյունքների վրա»,- SHANTNEWS.am-ի հետ զրույցում նշել է Սպորտային մարմնամարզության Եվրոպայի չեմպիոն Արթուր Դավթյանը։

Եվրոպայի չեմպիոն Արթուր Դավթյանը պատրաստվում է արդեն երրորդ անգամ Հայաստանը ներկայացնել Օլիմպիական խաղերին։ Մեկ տարով օլիմպիադայի խաղերի  հետաձգումը, ասում է՝ իր օգտին է եղել, ունեցած վնասվածքն է բուժել, հիմա էլ աշխատում է նախորդ Օլիմպիական խաղերում թույլ տված սխալների շտկման  ուղղությամբ։

«Էն սխալները, ինչ որ  նախորդ Օլիմպիական խաղերին արել եմ, հիմա աշխատում եմ դրանց  ուղղման վրա։ Իմ երկրորդ ցատկը մի քիչ էդքան էլ լավ չեմ կարողանում  կատարել, մի քիչ խնդիրներ կան, աշխատում ենք դրա վրա առաջնայինը․․․ Հիմա ինձ դա է պետք, որ իմ երկիրը կարողանամ լավագույնս ներկայացնել Օլիմպիական խաղերին ու մեդալներ նվաճեմ»,- նշել է Արթուր Դավթյանը։