Գյումրիի կենտրոնական փողոցները վերածվել են շինհրապարակների

Գյումրիի կենտրոնական գրեթե բոլոր փողոցները շինհրապարակի են վերածվել: Վարկային և մի փոքր մասն էլ դրամաշնորհային ծրագրով, որի արժեքը դեռ 2015-ից էր հայտնի, կազմում է 23.8 մլն եվրո, մեծ ծավալի  շինարարություն է սկսված Երևանյան խճուղի, Վազգեն Սարգսյան, Տիգրան Մեծ, Գերցեն, Գարեգին Նժդեհ փողոցներում, Շառլ Ազնավուրի  հրապարակում, իսկ Մուշ թաղամասը Անի թաղամասին կապող փողոցների ու մյուս հրապարակների շինաշխատանքները կմեկնարկեն ավելի ուշ: Երեք շինկազմակերպություն է աշխատում, տասնյակից ավելի միավոր տեխնիկայով:

Քանդման աշխատանքները նախ սկսեցին մայթեզրերից ու հասան փողոցներ: Հիմա մայթն ու փողոցը գրեթե իրարից չեն էլ տարբերվում: Տրանսպորտային միջոցները որտե՞ղ ու ինչպե՞ս են կանգառ անում: Ուղևորներն ու վարորդները նայում են իրենց հարմարությանը: Կանգառում սպասելը համենայնդեպս անհնար է: Շինարարը դարձյալ ներողամտություն է հայցում, քաղաքացիներն էլ  ըմբռնումով են մոտենում, միայն թե վերջապես նորոգվեն փողոցները:

Շինարարներն էլ իրենց հերթին բողոքելու պատճառներ ունեն: Փողոցները նեղ են, աշխատանքների ընթացքում երթևեկությունը չի դադարեցվում, ինչն էլ խանգարում է բանվորների ու բեռնատար մեքենաների աշխատանքին: Գերբեռնված փողոցներում անցուդարձի հսկողությունն ու երթևեկության կանոնակարգումը եղել է նախնական պայմանավորվածություն, որ պետք է իրականացնեն ճանապարհային ոստիկանները: Գյումրիում ոստիկանական տվյալ ստորաբաժանումը տեղեկացնում է, որ այդքան ռեսուրս չունի, եղած մի քանի մեքենաներն էլ իրականացնում են շրջիկ ծառայություն:

Հիմնանորոգվող փողոցներում կենցաղային կոյուղատար համակարգի փոխարինման հարցը կմնա անլուծելի, այդպիսի աշխատանքներ ծրագրում ներառված չեն: Մոտ 70 տարվա կոյուղատար խողովակները կոմունալ բաժինն ու ջրմուղն էլ գիտեն, որ շատ վատ վիճակում են: Կոյուղատարը կարգի բերելու գործը այդ հատվածներում կոմունալ բաժինն է անելու, հետո հանձնելու է ճանապարհաշինարարին: Բոլոր կոմունիկացիաները լինելու են ստորգետնյա: Հեռահաղորդակցության օպերատորներն ու էլցանցը մի քանի օրից կսկսեն մալուխների մոնտաժման աշխատանքները: Որոշ հատվածներում տեղադրվելու են նոր հենասյուներ:

Նոր կառուցվող փողոցները վերջապես նաև անձրևաջրատար համակարգ կունենան: Իսկ նախկինում ունեցածները, որոնք տարիներ առաջ շինարարները ասֆալտի տակ են թողել, կվերականգնեն: Սա շինարարության որակից բացի երաշխիք է ասֆլատապատման երկարակեցության: