Բրյուսելում կողմերն ի՞նչ պայմանավորվածության են եկել․ ռազմաքաղաքական հարցերով փորձագետ

Բրյուսելում օգոստոսի 31-ին նույն ձևաչափով արդեն 4-րդ հանդիպումն անցկացվեց։ Հիշեցնենք, որ առաջին հանդիպումը տեղի էր ունեցել 2021 թվականի դեկտեմբերի 14-ին, երկրորդը՝ 2022 թվականի ապրիլի 6-ին, իսկ երրորդը՝ 2022 թվականի մայիսի 23-ին։ Փաշինյան-Միշել- Ալիև կողմերի 4-րդ հանդիպումից հետո բավականին կոնստրուկտիվ տպավորություն են թողել և՛ հայկական կողմի, և՛ Եվրամիության կողմի տարածած հաղորդագրությունները․ այս մասին «Հորիզոնին» տված հարցազրույցում նշեց ռազմաքաղաքական հարցերով փորձագետ Արմինե Մարգարյանը։

«Ինչո՞ւ, քանի որ հստակ նշվում են ժամկետներ։ Սովորաբար նման հանդիպումներից հետո, երբ կողմերը չեն խուսափում նշել ժամկետներ, նշանակում է, որ առնվազն կիսով չափ կարողացել են գալ խնդրահարույց հարցերի շուրջ պայմանավորվածությունների։ Ինչպես տեսնում ենք, օրակարգում եղել են հումանիտար խնդիրներ, և Շառլ Միշելի տարածած հաղորդագրության մեջ առանձնակի ընդգծված է մեր գերիների վերադարձի խնդիրը, իհարկե չի օգտագործվում ռազմագերի բառը, բայց այնուամենայնիվ, ընդգծվում է գերիների խնդիրը։ Եվ ընդգծվում է նաև անհետ կորած անձանց ճակատագրերը պարզելու գործընթացի անհրաժեշտությունը»,- ասաց ռազմաքաղաքական հարցերով փորձագետը։

Ըստ նրա՝ եռակողմ ձևաչափով հանդիպման 2-րդ կարևոր հատվածը վերաբերում է վերջին ժամանակներս շահարկման առարկա դարձած  խաղաղության պայմանագրին։

«Մենք հիշում ենք, որ ադրբեջանական կողմի առաջարկներին հայկական կողմը արել էր իր առաջարկները, բայց դրան որևէ կերպ պատասխան չէր ստացվել։ Այնուամենայնիվ, ադրբեջանական կողմը պարբերաբար հայտարարում էր, որ խաղաղության պայմանագրին Հայաստանը ընդառաջ չի գնում։ Հիմա Շառլ Միշելի տարածած հայտարարության մեջ մենք տեսնում ենք, որ կողմերը հայտարարության են եկել, որ մեկ ամսվա ընթացքում պետք է հանդիպեն արտգործնախարարները և բանակցեն խաղաղության պայմանագրի դրույթների շուրջ։ Կարևորն այստեղ այն է, որ սա պիտի տեղի ունենա երկկողմ մակարդակով, և այն, ինչը կարող է խաղաղության պայմանագրի համատեքստում տարբերություն դնել բրյուսելյան և մոսկովյան հարթակների վերաբերմունքում, սա հենց դա է, որ մոսկովյան հարթակը մշտապես ընդգծում է, որ խաղաղության պայմանագիրը բաղկացած է այն բոլոր օրակարգերից, որոնք Հայաստան-Ադրբեջան-Ռուսաստան եռակողմ, բարձր մակարդակով հայտարարությունների շրջանակում են, իսկ բրյուսելյան այս հարթակում տեղի ունեցած հանդիպման հաղորդագրության մեջ մենք տեսնում ենք, որ խոսքը մեկ ամսվա ընթացքում 2 երկրների արտաքին գործերի նախարարների մակարդակով հանդիպման մասին է, այսինքն՝ Բրյուսելը և առհասարակ մեր արևմտյան գործընկերները նորից շարունակում են գործընթացը մղել երկկողմ շփումների ուղղությամբ, սա թերևս ամենալուրջ ձեռքբերումը կարող ենք համարել այս հաղորդագրության»,- նշեց Արմինե Մարգարյանը։

Մանրամասները՝ ամբողջական հարցազրույցում։