Ինչպե՞ս է Սերգեյ Լավրովը Տոկիոյում նշել ծննդյան տարեդարձը

Ճապոնիայի արտգործնախարար Տորո Կոնոն ֆուտբոլի գնդակի տեսք ունեցող տորթով շնորհավորել է ՌԴ արտգործնախարար Սերգեյ Լավրովի ծննդյան տարեդարձը: Այս մասին հայտնում է ՌԴ արտգործնախարարությունը:

«Տոկիո կատարած այցի ընթացքում նաև նշեցինք Սերգեյ Լավրովի ծննդյան տարեդարձը: Ճապոնացի նախարարը ջերմ շնորհավորեց իր ռուս գործընկերոջը՝ աշխատանքային ճաշն ավարտելով ֆուտբոլի գնդակի տեսքով տոնական տորթով: Լավրովն էլ իր հերթին նրան նվիրեց ֆուտբոլի աշխարհի խաղերի պաշտոնական գնդակներից մեկը»,- ասված է ՌԴ արտաքին գործերի նախարարության Twitter-ում:

????????????????Визит в Токио проходит в День рождения Сергея Лаврова. Японский министр тепло поздравил российского коллегу, завершив рабочий ланч праздничным тортом в виде футбольного мяча. Лавров в долгу не остался и подарил коллеге официальный мяч @fifaworldcup_ru pic.twitter.com/KnU0jPufzG

— МИД России ???????? (@MID_RF) 21 марта 2018 г.

Սերգեյ Լավրովն իր ծննդյան 67-ամյակը նշել է դիվանագիտական առաքելության ընթացքում, և սա նրա համար արդեն սովորական է դարձել: Նա 1972 թվականից սկսած աշխատում է ՌԴ արտաքին գործերի նախարարությունում, իսկ 2004-ից ՌԴ ԱԳՆ ղեկավարն է: Լավրովն իր պաշտոնավարման ընթացքում զանազան տեղական և միջազգային հարցումների արդյունքում համարվել է ՌԴ ամենաազդեցիկ նախարարներից մեկը:

Դիվանագիտական դաշտում Լավրովը շատ հաճախ աչքի է ընկնում սուր մեկնաբանություններով և պատասխաններով: 2008-ին Daily Telegraph-ում հրապարակել էին հոդված, որում անդրադարձել էին Սերգեյ Լավրովի և Մեծ Բրիտանիայի ԱԳՆ ղեկավար Դեյվիդ Միլիբենդի խոսակցությանը Հարավային Օսիայում ծագած կոնֆլիկտի մասին: Սերգեյ Լավրովը նրա հետ զրույցում ցենզուրայից դուրս արտահայտություններ է իրեն թույլ տվել՝ ասելով Who are you to fucking lecture me? (թարգ.- Ո՞վ ես դու, որ դասախոսություններ կարդաս):  Ճիշտ է, հետագայում BBC-ին տված հարցազրույցում բրիտանացի նախարարը հերքեց՝ ասելով, թե «ամեն ինչ այնքան էլ այդպես չի եղել», սակայն այս միջադեպի մասին հետագայում տարբեր հարթակներից շատերը խոսեցին և իրենց վարկածները ներկայացրին:

Նրան անվանում են «Երկաթյա դիվանագետ» և դա բացատրում են նրա բնավորությամբ, բանակցություններ վարելու ունակություններով, հաճախ նաև հումորային և սարկաստիկ մեկնաբանություններով:

Չնայած Լավրով ազգանվանը, հարկ է նշել նաև նրա հայկական արմատների մասին: Հայտնի է, որ Սերգել Լավրովի հայրը թիֆլիսահայ է եղել, և մի շարք աղբյուրներում նշվում է, որ նախկինում նրանց ընտանիքի անդամները կրել են Քալանթարով կամ Քալանթարյան ազգանունը: Չնայած այս տեղեկատվությանը՝ ՌԴ արտգործանախարարության կայքում դիվանագետի բնութագրի բաժնում նրա ազգության դիմաց նշված է, որ  ռուս է: