Համաձայնագրով նախատեսվում է 50 մլն եվրոյի չափով վարկ տրամադրել Հայաստանին

Հայաստանի Հանրապետության եւ ՕՊԵԿ-ի միջազգային զարգացման հիմնադրամի միջեւ «Կանաչ, դիմակայուն եւ ներառական զարգացման ծրագիր» վարկային համաձայնագիրը ստորագրվել է 2023 թվականի հոկտեմբերի 3-ին եւ 23-ին:

Համաձայնագրով նախատեսվում է 50 մլն եվրոյի չափով վարկ տրամադրել Հայաստանի Հանրապետությանը:

«Գումարներն ուղղվելու են 2023 թվականի պետական բյուջեի պակասուրդի ֆինանսավորմանը կամ ծախսերի ֆինանսավորման կարիքի բավարարմանը, որի նպատակով մենք պետական բյուջեով 350 մլն դոլար կարիք էինք սահմանել»,- ասել է ՀՀ ֆինանսների նախարարի տեղակալ Էդուարդ Հակոբյանը՝ ԱԺ ֆինանսավարկային եւ բյուջետային հարցերի մշտական հանձնաժողովի՝ դեկտեմբերի 12-ի արտահերթ նիստում քննարկման ներկայացնելով «Հայաստանի Հանրապետության եւ ՕՊԵԿ-ի միջազգային զարգացման հիմնադրամի միջեւ «Կանաչ, դիմակայուն եւ ներառական զարգացման ծրագիր» վարկային համաձայնագիրը վավերացնելու մասին» օրենքի նախագիծը:

Փոխնախարարի խոսքով քանի որ մենք գործ ունենք 550 մլրդ կապիտալ ծախսերի պլանավորված մեծության եւ 290 մլրդ դրամ պակասուրդի հետ, ըստ էության, գումարներն ուղղվելու են կապիտալ ծախսերին: Դրանք այնպիսի ծրագրեր են, որոնք վերաբերում են դպրոցներին, մանկապարտեզներին, ճանապարհներին, պաշտպանական ենթակառուցվածքներին, որոնք իրենց հերթին բերում են տնտեսության ներուժի բարձրացում: Բացի այդ՝ բյուջետային միջոցների համար նախապայման են հանդիսացել Կառավարության ծրագրից բխող մի շարք առանցքային միջոցառումներ, որոնք արդեն իրականացվել են եւ մեկ անգամ արդեն Համաշխարհային բանկի հետ քննարկվել են:

Նշվել է նաեւ, որ բյուջետային աջակցության միջոցների ստացման համար նախապայման է հանդիսանում երկկողմ փոխհամաձայնեցված քաղաքականության գործողությունների աղյուսակով սահմանված՝ մի շարք ոլորտներում միջոցառումների եւ բարեփոխումների իրականացումը: Ծրագիրն իրականացվում է Համաշխարհային բանկի հետ համատեղ, եւ, հետեւաբար, բարեփոխումների շրջանակը եւս նույնական է վերջինիս հետ 2023 թվականի ապրիլի 4-ին ստորագրված վարկային համաձայնագրի քաղաքականության աղյուսակի հետ:

Ծրագրի բարեփոխումների շրջանակը ներառում է մի շարք միջոցառումներ: Ըստ այդմ՝ կլիմայի փոփոխության մեղմացման եւ հարմարվողականության խթանում, շրջակա միջավայրի կառավարման համար կարգավորող շրջանակի բարելավում, էներգաարդյունավետության խթանում, հանրային ներդրումների կառավարում, մթնոլորտային օդի պահպանություն, շրջակա միջավայրի վրա ազդեցության գնահատում, սոցիալական աջակցության համակարգի հասցեականության բարելավում եւ այլն:

Փոխնախարարի հավաստմամբ մայր գումարի մարումն իրականացվելու է սկսած 2028 թվականի հոկտեմբերի 15-ից մինչեւ 2042 թվականի հոկտեմբերի 15-ը՝ վարկի գումարի 3.33 տոկոսի չափով, իսկ 2043 թվականի ապրիլի 15-ին՝ վարկի գումարի 3.43 տոկոսի չափով, վարկի տարեկան տոկոսադրույքը՝ լողացող, 6-ամսյա EURIBOR + 1.61 տոկոս (31.10.2023 թվականի դրությամբ 4.092 տոկոս + 1.6 տոկոս), վարկի մարման ժամկետ` 20 տարի, որից արտոնյալը՝ 5 տարի:

ԱԺ ֆինանսավարկային եւ բյուջետային հարցերի մշտական հանձնաժողովի նախագահ Գեւորգ Պապոյանը, ներկայացնելով դիտարկումները, առաջարկել է կոնկրետ նշել, թե գումարներն ինչի համար եւ ինչ նպատակով են ծախսվելու, ինչը հնարավորություն կտա ապահովել ներառականությունը:

Քննարկման արդյունքում հանձնաժողովը դրական եզրակացություն է տվել օրենքի նախագծին: