Քննարկվել են ՀՀ վարչապետի և նախագահի աշխատակազմերի 2023 թ. պետական բյուջեի կատարման հաշվետվությունները

2023 թվականին ՀՀ վարչապետի աշխատակազմը շարունակել է բարելավել պետական ապարատի աշխատանքները` հնարավորինս կիրառելով թվային գործիքներ. ասել է ՀՀ վարչապետի աշխատակազմի ղեկավար Արայիկ Հարությունյանը:

Նրա տեղեկացմամբ 2023 թվականին վարչապետի աշխատակազմին 11 ծրագրի իրականացման համար հատկացվել է շուրջ 22,2 մլրդ դրամ, որից 2023 թվականի ծախսերը կազմել են 21.2 մլրդ դրամ կամ նախատեսվածի 95.3 տոկոսը: Ծրագրված ցուցանիշից շեղումը հիմնականում պայմանավորված է վարչապետի լիազորությունների իրականացման ապահովման, տեսչական վերահսկողության եւ արդյունահանող ճյուղերի զարգացման ծրագրերի կատարողականով:

Զեկուցողի խոսքով հաշվետու ժամանակահատվածում ՀՀ էկոնոմիկայի նախարարությունից ՀՀ վարչապետի աշխատակազմի տեսչական վերահսկողության ծրագրին է փոխանցվել 4 միջոցառում:

«Իմ գլխավորությամբ` որպես ազգային համակարգողի, շարունակել ենք մեր պարտավորությունների իրականացումը «Բաց կառավարման գործընկերություն» նախաձեռնության շրջանակում: Աշխատակազմի եւ անձամբ իմ համակարգմամբ Հայաստանում անցկացվել են մի շարք մեծ նախագծեր, որոնցից են Համահայկական խաղերի ու Ծանրամարտի Եվրոպայի առաջնության կազմակերպումը, Վերակառուցման եւ զարգացման եվրոպական բանկի տարեկան ժողովը»,- ընդգծել է Արայիկ Հարությունյանը եւ հավելել, որ վարչապետի որոշումներով գլխավորել է Արամ Խաչատրյանի, Սերգեյ Փարաջանովի եւ Շառլ Ազնավուրի հոբելյանական հանձնաժողովները:

ՀՀ նախագահի աշխատակազմի ղեկավարի տեղակալ Խաչատուր Պողոսյանն էլ ներկայացրել է նախագահի աշխատակազմի 2023 թվականի գործունեության վերաբերյալ հաշվետվությունը: Նրա խոսքով 2023 թվականին «Հանրապետության նախագահի լիազորությունների իրականացման ապահովում» ծրագրով տարեկան պլանը հաստատված էր 1 մլրդ 686,3 մլն դրամ: Տարվա ընթացքում կատարված փոփոխությունների արդյունքում ճշտված պլանը կազմել է 1 մլրդ 546 մլն 500 հազար դրամ, որից փաստացի ծախսվել է 1 մլրդ 466 մլն 562 հազար դրամ, ինչը կազմել է ճշտված բյուջեի 95 տոկոսը:

Ըստ զեկուցողի` վերոնշյալ ծրագրով իրականացված «Հանրապետության նախագահի գործունեություն եւ ներկայացուցչականության ապահովումե միջոցառման տարեկան պլանը եղել է 1 մլրդ 682,5 մլն դրամ: Խաչատուր Պողոսյանը հայտնել է, որ հետագայում Կառավարության որոշումներով պլանը նվազեցվել է 172 մլն դրամով: Ճշտված պլանը կազմել է 1 մլրդ 510,5 մլն դրամ, որից փաստացի ծախսվել է 1 մլրդ 431 մլն 100 հազար դրամ, ինչը կազմում է ճշտված բյուջեի 94,7 տոկոսը: Տնտեսվել է շուրջ 70 մլն դրամ:

Նշվել է, որ «Հանրապետության նախագահի աշխատակազմի տեխնիկական հագեցվածության բարելավում» միջոցառման տարեկան պլանը հաստատված է եղել 3 մլն 762 հազար դրամ, այնուհետեւ միջոցառման գումարն ավելացվել է 32 մլն դրամով: Ճշտված պլանը կազմել է 35,7 մլն դրամ, որից փաստացի ծախսվել է 35 մլն 233 հազար դրամ: Տնտեսվել է 529 հազար դրամ:

Խաչատուր Պողոսյանը ներկայացրել է նաեւ իրականացված մյուս միջոցառումներն ու աջակցության ծրագրերը եւ դրանց համար կատարված ծախսերը:

Զեկուցողը տեղեկացրել է, որ հաշվետու ժամանակահատվածում նախագահի կողմից ստորագրվել են խորհրդարանի ընդունած 426 օրենքներ: ՀՀ նախագահի կողմից նաեւ ընդունվել է քաղաքացիության վերաբերյալ 130 հրամանագիր, արդյունքում` քաղաքացիություն շնորհելու մասին նախագահի հրամանագրերով 2023 թվականին ՀՀ քաղաքացիություն է շնորհվել 20 հազար 855 անձի: Հաշվետու տարվա ընթացքում դադարեցվել է շուրջ 3 հազար 300 անձի քաղաքացիությունը:

Զեկուցողները պատասխանել են նաեւ պատգամավորների հարցերին:

Պետական-իրավական ու Ֆինանսավարկային եւ բյուջետային հարցերի մշտական հանձնաժողովների համատեղ նիստում հունիսի 3-ին շարունակվել է «ՀՀ 2023 թվականի պետական բյուջեի կատարման մասին» հաշվետվության քննարկումը: Նիստը վարել են հանձնաժողովների նախագահներ Վլադիմիր Վարդանյանն ու Ծովինար Վարդանյանը: