Համաժողով՝ նվիրված Հայաստանի և Օվերն-Ռոն-Ալպ ռեգիոնի միջև տնտեսական համագործակցության հնարավորություններին

Նոյեմբերի 21-ին Լիոնում ընթացող «Օվերն-Ռոն – Ալպ – Հայաստան – Սյունիք բարեկամության օր» միջոցառումների շրջանակներում տեղի է ունեցել համաժողով՝ նվիրված Հայաստանի և ռեգիոնի միջև տնտեսական համագործակցության խորացման հեռանկարներին։

Օվերն-Ռոն-Ալպ ռեգիոնի առաջարկով ՕՌԱ-Հայաստան տնտեսական առաջին այս հանդիպումը նվիրված էր «Հայ-ֆրանսիական տնտեսական համագործակցության» ճանապարհային քարտեզի կարևորագույն ուղղություններից մեկին՝ Հայաստանի համար ռազմավարական նշանակություն ունեցող էներգետիկայի ոլորտին, մասնավորապես` վերականգնվող էներգիային։ Համաժողովին ներկա էր նաև Ֆրանսիայում ՀՀ դեսպան Արման Խաչատրյանը։

Համաժողովը մեկնարկել է ՕՌԱ ռեգիոնի փոխնախագահ Ֆիլիպ Մյունիեի ելույթով, ով, ողջունելով ՀՀ արտաքին գործերի նախարարի տեղակալ Պարույր Հովհաննիսյանի գլխավորությամբ միջոցառումներին մասնակցող հայկական պատվիրակությանը, վերահաստատել է ռեգիոնի հանձնառությունը՝ խորացնելու Հայաստանի հետ տնտեսական համագործակցությունը։

Բացման խոսքով հանդես  է եկել նաև ՀՀ էկոնոմիկայի նախարարի տեղակալ Արման Խոջոյանը, ով ընդգծել է Հայաստանի և Ֆրանսիայի միջև տնտեսական համագործակցության չիրացված ներուժը և այդ ուղղությամբ ջանքեր գործադրելու անհրաժեշտությունը։

Համաժողովի ընթացքում ֆրանսիական երկու ձեռնարկությունների՝ «Veolia» ընկերության ներկայացուցիչ Ֆրանսուա Լաֆորեն և «Nepsen» ընկերության ներկայացուցիչ Մանոն դ’Օտհյուիլը ներկայացրել են Հայաստանում տնտեսական գործունեություն ծավալելու իրենց փորձը։

Ներդրումների աջակցման կենտրոն հիմնադրամի՝ ներդրումների գծով տնօրեն Գոհար Գալյանը և ՕՌԱ ռեգիոնի ձեռնարկությունների տնօրենների խորհրդի նախագահ Ֆրանկ Կոլկոմբեն ներկայացրել են համապատասխանաբար Հայաստանի և ՕՌԱ ռեգիոնի ներդրումային հնարավորությունները։

Համաժողովը եզրափակվել է «Հայաստանում և Օվերն-Ռոն-Ալպ ռեգիոնում տնտեսական հնարավորությունները էներգետիկայի ոլորտում» թեմայով կլոր սեղանի անցկացմամբ, որին հայկական կողմից բանախոսել են ՀՀ Տարածքային կառավարման և ենթակառուցվածքների նախարարի տեղակալ Վաչե Տերտերյանը, Ներդրումների աջակցման կենտրոն հիմնադրամի գլխավոր տնօրեն Լևոն Օհանեսյանը, «AMBER CAPITAL» ընկերության տնօրեն Կարեն Արաբյանը, «R2E2» հիմնադրամի տնօրեն Կարեն Ասատրյանը, իսկ ֆրանսիական կողմից՝ ՕՌԱ ռեգիոնի` բնապահպանության և էկոլոգիայի հարցերով փոխնախագահ Թիերի Կովաքսը, ռեգիոնի էներգետիկ զարգացման մրցունակության կազմակերպության միջազգային զարգացման պատասխանատու Ինգրիդ Միլսենտը, «Bpi France-AURA» պետական հիմնադրամի միջազգային զարգացման պատասխանատու Մարեկ Վոդան և «Nuclear Valley» տնտեսական զարգացման տնօրեն Nuclear Valley-ի տնտեսական զարգացման տնօրեն Ժան-Ֆիլիպ Բալլան։

Համաժողովի ավարտին բանախոսները պատասխանել են ներկաների հարցերին։