Հայաստանից ԵՄ-ի երկրներում ապաստան հայցելու դեպքերն էականորեն նվազել են

ՀՀ տարածքային կառավարման և զարգացման նախարարության Միգրացիոն ծառայությունը SHANTNEWS.am-ի հարցմանն ի պատասխան` տրամադրել է վիճակագրական ամփոփ տվյալներ 2018 թ. 9 ամիսների վերաբերյալ:

Ադրբեջանից բռնագաղթված փախստականներ

Բնակարանային խնդրի առաջնահերթ լուծման կարիք ունեն 895 ընտանիքներ (641-ը` Երևանում), որոնցից 78-ը բնակվում են ծայրահեղ վատ վիճակում գտնվող 11 կացարաններում։ 1.2 մլրդ դրամ է պահանջվում այս 11 կացարանները պատշաճ բնակարաններով փոխարինելու համար։

Տարբեր ծրագրեր են իրականացվել Ադրբեջանից բռնագաղթված և փախստականի կարգավիճակ ստացած անձանց համար: Կառավարությունը 2004 թվականին ընդունել է որոշում, որով պարտավորվել է տվյալ անձանց ապահովել բնակարանով: Նույնիսկ այն ժամանակ, երբ տվյալ անձինք ստացել են Հայաստանի քաղաքացիություն, նրանց հանդեպ պետության պարտավորությունը բնակապահովման մասով չի վերացել: Բնակապահովման ծրագիրն իրականացվել է մինչև 2009 թվականը, սակայն 2009 թվականից ի վեր տվյալ ծրագրի համար պետական բյուջեից հատկացումներ չեն եղել։

Ապաստանի վերաբերյալ հարցեր

Ընթացիկ տարվա 9 ամիսներին Միգրացիոն ծառայությունն ունեցել է ապաստանի 84 հայց, որը ներառել է 145 մարդ: Հայցերից 36-ը ստացել է դրական լուծում, 67 մարդ ստացել է փախստականի կարգավիճակ: Մերժվել է 18 դիմում:

Հիմնական դիմումները ստացվում են Սիրիայից, Իրաքից, Եմենից

Միգրացիոն քաղաքականության զարգացման միջազգային կենտրոնի (ICMPD) աջակցությամբ կազմվել է նախագիծ՝ ապաստան հայցողների համար նոր կացարան կառուցելու վերաբերյալ: ՀՀ կառավարությունը հողահատկացում է արել Աբովյան քաղաքում։ Շինարարական աշխատանքներն իրականացնելու համար 1.5 մլն դոլարի ներդրում է պահանջվում, որի զգալի մասն իրականացնելու են ամերիկյան գործընկերները:

Ռեադմիսիա

Ընթացիկ տարվա 9 ամիսներին ԵՄ-ից ստացված հայցերի թիվը եղել է 769, որը ներառում է 1529 մարդ: 382-ի դեպքում հաստատվել է, որ այդ անձինք Հայաստանի քաղաքացիներ են: Վերադարձված քաղաքացիների համար իրականացվում են վերաինտեգրման ծրագրեր:

Գործում է մեկ պատուհան ծառայությունն ամբողջական խորհրդատվություն տրամադրելու համար, որպեսզի հարկադիր վերադարձածերն իմանան իրենց առաջին քայլերը, իրականացվող տնտեսական ծրագրերը, որոնցում կարող են ներգրավվել:

ԵՄ անդամ և այլ պետություններից Հայաստան վերադարձող ՀՀ քաղաքացիները վերաինտեգրման նպատակով իրականացվող ծրագրերի, դրանք իրականացնող կազմակերպությունների, տրամադրվող աջակցության մասին անհրաժեշտ տեղեկություններ կարող են ստանալ այցելելով` ՀՀ ՏԿԶՆ միգրացիոն ծառայություն (հասցե՝ ք. Երևան, Կ. Ուլնեցի 31) յուրաքանչյուր աշխատանքային օր՝ ժամը 14:00-18:00 (սենյակ N 210) կամ կարող են զանգահարել 060-275-035 հեռախոսահամարով:

Միգրացիոն քաղաքականության միջազգային զարգացման կենտրոնի (ICMPD) աջակցությամբ նոյեմբերին մեկնարկելու է ERRIN ծրագիրը, որի շրջանակում երկու տարի շարունակ Միգրացիոն ծառայությունում երեք խորհրդատուներ ընդունելու են թիրախային խմբի ներկայացուցիչներին:

Միգրացիոն դինամիկա

Ընթացիկ տարվա առաջին կիսամյակում միգրացիոն սալտոն կազմել է -6 146: Այս ցուցանիշը սահմանահատումների ընդհանուր դեպքերի սալտոն է, այսինքն, երբ մեկ անձը մի քանի անգամ է սահմանը հատում, դա նույնպես այս ցուցանիշում ներառված է:

Ըստ նույնականացված տվյալների (երբ միևնույն անձի մի քանի սահմանահատումները 1-ով է հաշվված)՝  նույն ժամանակահատվածում սալտոն կազմում է -5 204: Եթե այս ցուցանիշը համեմատում ենք նախորդ տարիների ցուցանիշների հետ, ապա դրական միտումն ակնհայտ է: 2017 թվականի առաջին կիսամյակի տվյալներով միգրացիոն սալտոն կազմել է -30 853:

Ըստ «Եվրոստատ»-ի տվյալների՝ ԵՄ-ի երկրներում, գումարած` Իսլանդիայում, Լիխտենշտեյնում, Նորվեգիայում, Շվեյցարիայում, 2017 թվականի առաջին կիսամյակում եղել է Հայաստանից ապաստան հայցելու 3 270 դեպք, այս տարվա նույն ժամանակահատվածում այդ թիվը կազմում է 2 490: Այսինքն՝ էական նվազումն ակնհայտ է: