Էրեբունի հնավայրն այսօր խայտառակ ավերակ վիճակում է. պատմաբան

«Էրեբունի-Երևան»-ի 2800-ամյակի տոնական միջոցառումների նախօրեին լույս է տեսել «Արարատ-Ուրարտու թագավորությունը» եռալեզու ալբոմը: Հեղինակը պատմաբան Արտակ Մովսիսյանն է: Հոկտեմբերի 18-ին լրագրողների հետ հանդիպմանը Մովսիսյանը նշեց, որ վաղուց կար մեզ և աշխարհին գիտահանրամատչելի կերպով ներկայացնելու Վանի թագավորությունը, որ մեր պատմության ամենակարևոր փուլերից մեկն է:

«Սա առաջին համահայկական պետությունն է, որը մեկ պետականության մեջ ուրվագծեց այն սահմանները, որ հետո եվրոպացի աշխարհագրագետները պետք է կոչեին Հայկական լեռնաշխարհ: Ցավոք սրտի, այն մեր կողմից պատշաճ չի գնահատվել, մենք այսօր ունենք այդ բացը լրացնելու անհրաժեշտություն: Էրեբունի-Երևանի 2800-ամյակը շատ լավ առիթ էր այս բացը լրացնելու համար»,- ասաց պատմաբանը:

Մովսիսյանը նշեց, որ ինքը` որպես Հայաստանի հին շրջանի մասնագետ, վաղուց ունեցել է այդ բացը լրացնելու մտադրություն. անցյալ տարի ներկայացրել են «Արարատ-Ուրարտու թագավորությունը» ֆիլմը` չորս լեզվով, որի հեղինակը ևս ինքն է, ֆիլմն ալբոմի մեջ ներդիր է, հեղինակային տեքստը ալբոմի հեղինակային տեքստի հետ համընկնում է: Պատմաբանն այնտեղ ներառել է իր հսկայական արխիվում կուտակված նյութը Վանի թագավորության շրջանի հուշարձանների վերաբերյալ, քանի որ կար նյութ, որը պետք էր համակարգված ներկայացնել` անվանումից քաղաքական պատմություն:

Պատմաբանը խոսեց նաև Էրեբունի հնավայրի այսօրվա վիճակի մասին, նշեց, որ այն այսօր խայտառակ ավերակ վիճակում է, բացի այն, որ պատերի վրա խզբզած ու ամեն տեսակի հիմարություն է գրված, ընդ որում մեծ մասը` հայերենով: Սա, ըստ Մովսիսյանի, նաև հասարակ քաղաքացիների շատ անգիտակից վերաբերմունքն է սեփական հուշարձանի նկատմամբ:

«Հուշարձանի, որմնանկարի վրա գնալ, խզբզել… Այն շատ վատ վիճակում է, տեղեր կան, որտեղ ուղղակի անվտանգ չէ քայլելը, գերաններով առաստաղները որ պատրաստել են, վրան ծղոտ է, վրայից բետոն է արվել: Երբ փլվել է, տեղեր կան, որ այդ բետոնն ուղղակի պոկված, կախված է, կարող է ընկնել այցելուի գլխին: Ֆրանկոֆոնիայի օրերին անընդհատ վախի մեջ էի, որ ասեին` եկեք, գնանք` այդ հուշարձանը տեսնելու, տանելու էին, ի՞նչ ցույց տային: Ազգովի գետինը պիտի մտնեինք:

Էրեբունի հուշարձանը գետինը մտնելու վիճակում է հիմա: «Էրեբունի-Երևան»-ի 2800-ամյակ ենք նշում, հիմա չգիտեմ` քանի պատվիրակություն է գալու, դա էլ դնենք մի կողմ, այսքան խոսում ենք տուրիզմի, երկրի ներկայացման մասին, տուրիզմով բյուջեն լցնելու, բայց ամեն տուրիստ որ այցելում է Էրեբունի, տեսնում վիճակը, դրանից ավելի խայտառակ հակագովազդ չի կարող լինել»,- ասաց նա: