Ով կլինի Շիրակի մարզպետի պաշտոնակատարը

Շիրակի մարզպետ Կարեն Սարուխանյանն իր հետագա գործունեությունը կշարունակի օրենսդիրում և օրենքի պահանջով մարզպետի պաշտոնից շուտով հրաժարական կտա:

«Օրենքն է այդպես պահանջում, երբ մանդատը ստանում ես, պետք է պաշտոնից հրաժարվես, բայց ես մինչև երդման արարողությունը կլինեմ Շիրակի մարզպետ»,- պարզաբանել է Կարեն Սարուխանյանը:

Ըստ Կարեն Սարուխանյանի՝ ամենայն հավանականությամբ, մարզպետի ժամանակավոր պաշտոնակատար կլինի երկրորդ փոխմարզպետ Վարդան Գրիգորյանը:

«Ժամանակի առումով առաջինը փոխմարզպետ է նշանակվել Սոֆիա Հովսեփյանը, երկրորդը՝ Վարդան Գրիգորյանը, երրորդը՝ Արա Մելիքջանյանը: Սոֆիան էլ է մանդատը վերցնում և իրենից հետո, բնականաբար, պաշտոնակատար կլինի Վարդանը, որոշողը վարչապետն է, դրանից հետո, թե ով կլինի մարզպետ, կառավարության վերջնական  կազմի հստակեցումից հետո պարզ կդառնա: Հիմա հենց էդ քննարկումների մեջ ենք, տեսնենք, քաղաքական թիմի որոշմամբ հաստատ Շիրակի մարզպետի ընտրությունը լավը կլինի»,- ասել է Կարեն Սարուխանյանը:

Իսկ թե ինչու է ժամանակավոր պաշտոնակատար նշանակելու հարցում Կարեն Սարուխանյանը պաշտպանում փոխմարզպետ Վարդան Գրիգորյանի  թեկնածությունը, այսպես է մեկնաբանել:

«Այս կարճ ժամանակահատվածում, որ աշխատել ենք միասին, նա բարձր աշխատանքային ունակություններ է ցուցաբերել և, իմ կարծիքով, կկարողանա, համենայնդեպս էս պահին,  դեռ էդ քննարկումները չեն, թե ով կլինի մարզպետ, ուղղակի այժմ խոսքը գնում է պաշտոնակատարի մասին»,- մանրամասնել է Շիրակի մարզպետը:

Իսկ թե ով կլինի մարզպետ, այդ ժամանակ այլ քննարկումներ կլինեն, կուսակցության վարչություն գոյություն ունի, մեր քաղաքական թիմն է որոշում կայացնելու և միայն թիմի հետ է լինելու քննարկումը:

Հատկանշական է, որ Վարդան Գրիգորյանն այս ընթացքում աչքի չի ընկել ակտիվ գործունեությամբ, «Քաղաքացիական պայմանագիր» կուսակցության անդամ չէ, ու այս դեպքում ևս առաջարկվել է նրա թեկնածությունը:

«Վարդան Գրիգորյանը մեր քաղաքական թիմի քվոտայով է, նշանակում է մեր քաղաքական թիմից է, դա հեչ կապ չունի, որ նա կոնկրետ  կուսակցական չէ, մենք մարզում կոնկրետ 4-5 հոգի «Քաղաքացիական պայմանագիր» կուսակցության անդամներ ունենք, բայց համակիրները բավականին շատ են»,- ասել է Կարեն Սարուխանյանը:

Իսկ թե ովքեր կփոխարինեն մանդատներ ստացած փոխմարզպետ Սոֆիա Հովսեփյանին, խորհրդական Նազելի Բաղդասարյանին և ինչ նոր նշանակումներ են սպասվում  մարզպետարանում, Կարեն Սարուխանյանը փոխանցել է, որ դա կլինի միայն կառավարության վերջնական կազմի ձևավորումից հետո միայն:

«Օպտիմալացում է սպասվում ոչ միայն նախարարություններում, այլև մարզպետարաններում, էնտեղ հաստիքների կրճատումներ կլինեն, կառավարության կազմավորումից հետո միայն պարզ կլինի պատկերը, թե ինչ հաստիքներ են մնալու, շայդ ժամանակ կլինեն հավակնորդներ  ու նշանակումներ: Բնականաբար, հայեցողական պաշտոնները իշխանությունը չի կիսում այլ ուժի հետ այս պահին  և կլինեն միայն «Իմ քայլը» դաշինքի և «Քաղաքացիական պայմանագիր» կուսակցության քվոտայով, հնարավոր է մարզպետարանում աշխատակազմի փոքրացում»,- հստակեցրել է Կարեն Սարուխանյանը:

Հիշեցնենք, որ դեկտեմբերի 9-ին կայացած արտահերթ խորհրդարանական ընտրություններից հետո Շիրակի մարզից  պատգամավորի մանդատ ստացել են վեց  թեկնածուներ՝ երեքը «Իմ քայլը» դաշինքից, երկուսը՝ «Բարգավաճ Հայաստան»  և մեկը ՝ «Լուսավոր Հայաստան» կուսակցություններից: