Երևանը գազի գինը չի բարձրացնի, սակայն «Գազպրոմ»-ը կարող է նվազեցնել ներդրումները. «Կոմերսանտ»

«Գազպրոմ»-ը վերջին պահին կարողացել է Հայաստանի նոր իշխանությունների հետ համաձայնության գալ 2019-ից երկրի համար գազի գինը 10 տոկոսով` 1000 խմ-ի համար մինչև 165 դոլար բարձրացնելու հարցում: Համաձայնությունը, սակայն, թվում է, ձևական է. գինը բարձրացել է «Գազպրոմ Արմենիա» ՓԲԸ-ի համար, սակայն ներքին սպառման գազի գինը Երևանը պատրաստ չէ բարձրացնել, գրում է ռուսական «Կոմերսանտ» պարբերականը: Փորձագետների կարծիքով` «Գազպրոմ»-ը, փաստացի, կարող էր չեղարկել ներքին զեղչը, որի հաշվին իր դուստր ընկերությունը երկրի ենթակառուցվածքում ներդրումներ էր անում:

«Գազպրոմ»-ի ղեկավար Ալեքսեյ Միլլերը և Հայաստանի փոխվարչապետի պաշտոնակատար Մհեր Գրիգորյանը դեկտեմբերի 31-ին հանդիպել են, արձանագրվել է, որ ի հավելումն Հայաստան մատակարարվող գազի գնի վերաբերյալ «Գազպրոմ էքսպորտ»-ի և «Գազպրոմ Արմենիա»-ի միջև կնքված պայմանագրի՝ 2019թ. հունվարի 1-ից Վրաստանի և Հայաստանի սահմանին ռուսական գազի գինը կկազմի 165 դոլար՝ 1000 խմ-ի համար:

Հաղորդվել է, որ «Գազպրոմ Արմենիա»-ն կշարունակի աշխատել ՀՀ կառավարության համապատասխան մարմինների հետ գազի ներքին սակագների սահմանման հարցի շուրջ:

Նշվել է, որ տարեկան մինչև 2.5 մլրդ խմ ծավալով գազի մատակարարման պայմանագիրը «Գազպրոմ էքսպորտ»-ի և «Գազպրոմ Արմենիա»-ի միջև գործում է մինչ 2019թ. ավարտը: Պարբերականը հիշեցրել է, որ 2016թ. համաձայնագրով գազի գինը 1000 խմ-ի համար 165-ից դոլարից իջել էր 150 դոլարի:

«Գազպրոմ»-ը միակ գազամատակարար ընկերությունն է Հայաստանի սպառողների (Երևանը գազ է ստանում նաև Իրանից, բայց այն օգտագործում է միայն էլեկտրաէներգիայի արտադրության համար, որը մատակարարում է Թեհրանին) համար: «Գազպրոմ Արմենիա»-ի հետ 2013թ. պայմանագիր է կնքվել 2014-2018թթ. տարեկան մինչև 2․5 մլրդ խմ գազի մատակարարման համար: 2018թ. 9 ամիսների ընթացքում «Գազպրոմ»-ն արտահանել է 1․37 խմ գազ:

Լրացուցիչ համաձայնության գալու համար «Գազպրոմ»-ը ստիպված էր բանակցել արդեն Հայաստանի նոր իշխանությունների հետ. 2018-ի գարնանը Հայաստանում տեղի ունեցած հեղափոխության արդյունքում վարչապետ դարձավ ընդդիմադիր Նիկոլ Փաշինյանը: Դրանից հետո Երևանի հարաբերությունները ռուսական պետական կառույցների հետ դժվարացան: «Գազպրոմ»-ում բանակցությունների արդյունքները չեն մեկնաբանում: Հայաստանի սպառողների համար գազի գնի վերաբերյալ քննարկումները Կառավարությունը և «Գազպրոմ Արմենիա»-ն նախատեսում էին սկսել հունվարի 8-ից: Փոխվարչապետի պաշտոնակատար Մհեր Գրիգորյանն ասել է, որ քանի դեռ հստակ որոշում չկա, գազաբաշխող ընկերությունը չի դիմի Հանրային ծառայությունները կարգավորող հանձնաժողով` սակագների վերանայման պահանջով:

Պարբերականը հիշեցնում է վարչապետի պաշտոնակատար Նիկոլ Փաշինյանի հայտարարությունը, որ գազի գնի որոշման հարցում բանակցությունները շարունակելու են, ապա նշում, որ Հայաստանը շարունակում է Իրանից գազ ձեռք բերելու հարցում բանակցությունները: «Ռայֆֆայզենբանկ»-ից Անդրեյ Պոլիշչուկի կարծիքով` «Գազպրոմ»-ի և Հայաստանի իշխանությունների նոր պայմանավորվածությունները կարող են հանգեցնել «Գազպրոմ Արմենիա»-ի մարժայի կրճատմանը, սակայն կրիտիկական չեն դառնա:

«Ազգային էներգետիկ անվտանգության հիմնադրամ»-ից Ալեքսեյ Գրիվաչը կարծում է, որ մասամբ չեղարկվել է «Գազպրոմ»-ի կողմից «Գազպրոմ Արմենիա»-ին տրամադրվող զեղչը, որն ուղղված էր ՀՀ-ում ենթակառուցվածքային զարգացմանն ուղղված ներդրումների իրականացմանը: Փորձագետը նշում է` մի իրավիճակում, երբ նոր իշխանությունները կտրուկ քայլեր են ձեռնարկել «Գազպրոմ»-ի դուստր ընկերության դեմ, տարօրինակ կլիներ ակնկալել Հայաստանի ներսում ռեսուրսի պահպանում, սակայն դա կարող է դառնալ հետագա բանակցությունների առարկա: