Ի՞նչ են քննարկել Փաշինյանն ու Բախտաձեն. Վերջինս հանդիպումն անվանել է «բարեկամական»

Այսօր Վրաստանում հարցուպատասխանի ռեժիմով կայացած հերթական հանդիպման ժամանակ լրագրողներից մեկը վարչապետ Մամուկա Բախտաձեից հետաքրքրվել է, թե ՀՀ վարչապետ Նիկոլ Փաշինյանի հետ ի՞նչ թեմաների շուրջ են զրուցել վերջերս Բոլնիսիում տեղի ունեցած հանդիպման ժամանակ:

Վերջին շրջանում հայկական մամուլում ակտիվորեն շրջանառվում է Լարսի այլընտրանքային ճանապարհով հայկական բեռների փոխադրման հարցը: Այլընտրանքային ճանապարհ ասելով՝ ենթադրվո՞ւմ է արդյոք հայկական բեռների փոխադրում Վրաստանի գրավյալ տարածքներով, ՌԴ-ի ու Վրաստանի միջև համաձայնությունը ենթադրո՞ւմ է նույնը՝ հարցրել է լրագրողը:

«Լարսի այլընտրանքային  ճանապարհով բեռնափոխադրումների համաձայնությունը ձեռք է բերվել 2011թ: Այն լրացումների, առանձին քննարկումների կարիք ունի, որոնց մասին հասարակությունը տեղյակ կպահվի: Ինչ վերաբերում է ՀՀ վարչապետ Նիկոլ Փաշինյանի հետ օրերս կայացած մեր հանդիպմանը, դա բարեկամական հանդիպում էր: Մենք բարեկամական հարաբերություններ ունենք Հայաստանի հետ: Մի քանի օր առաջ խորհրդարանը Փաշինյանին երկրորդ անգամ հաստատեց վարչապետի պաշտոնում: Դա բարեկամական հանդիպում էր, որի ընթացքում զրուցեցինք տարբեր հարցերի, այդ թվում՝ երկու երկրների միջև առևտրաշրջանառությունը մեծացնելու շուրջ: Հանդիպմանը ձեր նշված թեմային չենք անդրադարձել»,- հայտարարել է Վրաստանի վարչապետ Մամուկա Բախտաձեն:

Վերլուծաբան Զաալ Անջափարիձեի խոսքերով՝ Հայաստանը շատ է հետաքրքրված Վրաստանի և Ռուսաստանի միջև առևտրային միջանցքներով, որոնք պետք է գործեն շվեյցարական ընկերության միջնորդությամբ, երկու երկրների միջև 2011 թվականին կնքված համաձայնագրի համաձայն: Նրա խոսքով հենց այս հարցը կարող է լինել հունվարի 15-ին Բոլնիսում անցկացված ոչ ֆորմալ հանդիպման գլխավոր թեմաներից մեկը:

Վերլուծաբան Նիկա Չիտաձեն «Ալիք մեդիայի» հետ զրույցում նշել է, որ Հայաստանը և Վրաստանը ցանկացած իշխանության օրոք հետաքրքրված են երկկողմանի հարաբերությունների զարգացմամբ:

«Օրինակ՝ Հայաստանը հետաքրքրված է նրանով, որպեսզի իր արտաքին առևտրական գործողությունները կատարի հենց Վրաստանի տարածքով և, ինչպես գիտենք, Հայաստանի բեռնափոխադրումների 70 տոկոսից ավելին կատարվում է հենց Վրաստանի տարածքով: Իր հերթին Վրաստանը, իհարկե, հետաքրքրված է, որպեսզի Հայաստանը նպաստի Ջավախքում ապրող էթնիկ հայերի՝ վրացական հասարակության մեջ ինտեգրացիայի հարցում:

Ըստ վերլուծաբանի՝ թեև երկրների արտաքին քաղաքական կողմնորոշումը տարբերվում է իրարից, այնուամենայնիվ, շատ ընդհանուր բան ունեն:

Չիտաձեի կարծիքով՝ այս հանդիպման ընթացքում հիմնականում քննարկվել են տնտեսական հարցեր:

«Բացառված չէ նաև այն, որ Հայաստանի հեղափոխական տրամադրված կառավարությունը ցանկանա կիսել վրացական փորձը, օրինակ կոռուպցիայի դեմ պայքարում, ինչպես նաև հարկային և մաքսային օրենսդրության քննարկման հարցերում և այլն: Այնուամենայնիվ, գլխավոր հարցը տնտեսությունն է»,- ասում է Չիտաձեն:

Վերլուծաբանն առանձնացնում է համագործակցության ևս երկու կետ, որոնցից մեկը վերաբերում է Հայաստանի և Վրաստանի միջև ազատ առևտրի համաձայնագրի շրջանակներում առևտուր իրականացնելուն։ Մյուս կետը Արևելյան գործընկերության շրջանակներում նախատեսված 13 մլրդ եվրոն է։ Չիտաձեն չի բացառում, որ կարող է տեղի ունենալ Հայաստանի և Վրաստանի միջև ավտոճանապարհի վերանորոգում ԵՄ-ի կողմից ֆինանսավորվող ծրագրերի շրջանակներում: