Աշոցք խոշորացված համայնքի ղեկավարի արտահերթ ընտրությունը կկայանա փետրվարի 17-ին

Աշոցքի համայնքապետարանը տեղակայված է նախկին գործկոմի՝ 60-ականներին կառուցված եռահարկ շենքում: Վերանորոգված նախասրահից բացի, այստեղ այդ ժամանակներից ամեն ինչ նույնն է մնացել: Համայնքի ղեկավարի աշխատասենյակի ցուցանակն էլ Արթուր Ալոյանի հրաժարականից հետո հանվել է: Հրաժարականի մասին գյուղապետի անսպասելի որոշումը, պարզվում է,  հարկերի թերհավաքագրումից բացի, ունեցել է նաև այլ պատճառ:

«Հեղափոխությունից հետո հանրապետության վարչապետը կոչ արեց ու հորդորեց, որ նախկին կառավարության ժամանակ աշխատած համայնքների ղեկավարները հրաժարական տան, ես էլ լսելով վարչապետի հորդորը՝ հրաժարական եմ տվել»,-  պարզաբանել է նախկին գյուղապետ Արթուր Ալոյանը։

11 տարի Աշոցքի գյուղապետ ու 2 տարի  խոշորացված համայնքի ղեկավար աշխատած Ալոյանը կրկին առաջադրվելու որոշում  է կայացրել, ասում է՝ ժողովրդի պահանջով: Կուսակցական պատկանելությունը չի փոխել, հանրապետական է, կարծում է՝ դա չի խանգարելու ընտրապայքարում, 4 անգամ գյուղապետ է ընտրվել առանց կուսակցության աջակցության:

«Ենթադրենք ԱԺ ընտրություններում արգելքի շեմը չհաղթահարած կուսակցությունից թեկնածուն ՏԻՄ ընտրություններում հնարավոր է՝ ունենա բացարձակ առավելություն, այսինքն՝ համայնքներում կարևորում են անձի աշխատանքը, ունի՞ աշխատանքային փորձ, թե՞ ոչ»,- ասել է համայնքի ղեկավարի ժամանակավոր պաշտոնակատար Կարեն Մանուկյանը։

Աշոցքի համայնքապետի ժամանակավոր պաշտոնակատարն է Կարեն Մանուկյանը, ով առաջադրվողների շարքում է:Մինչ այդ Աշոցքում «Քաղաքացիական պայմանագիր» կուսակցության կոորդինատորն է եղել, ՏԻՄ ոլորտում աշխատանքային փորձ չի ունեցել: Կուսակցությունը ողջունել է թեկնածությունը, բայց նախընտրական գործընթացում, ասում է, չեզոք են լինելու:

Կորյուն Սումբուլյանը 6 տարի եղել է Բավրայի գյուղապետ: Հիմա հավակնում է դառնալ խոշորացված համայնքի ղեկավար: Արտահերթ ընտրություններին մասնակցելու համար արդեն նախընտրական ծրագիր էլ ունի: Հյուսիսային բնակավայրերի զարգացումն էլ տեսնում է միայն ունեցած ռեսուրսների ճիշտ օգտագործմամբ:

«Ես բոլոր իշխանությունների հետ էլ գործի պահանջից ելնելով եմ առաջնորդվել, եղել եմ անկուսակցական, հիմա էլ եմ անկուսակցական, ինձ ընդհանրապես չեն հետաքրքրել կուսակցությունները, որովհետև աշխատանքը չի հարցնում՝ կուսակցակա՞ն ես, թե՞ չէ»,- իր թեկնածությունն այսպես է մեկնաբանել Բավրայի նախկին գյուղապետ Կորյուն Սումբուլյանը։

Քարոզարշավի ընթացքում պատրաստվում է բոլոր թեկնածուներին բանավեճի հրավիրել, խոսել Աշոցքի տարածաշրջանի գյուղերի կենսամակարդակի բարելավման իր ծրագրերից: Աշոցք խոշորացված համայնքի բնակավայրերի ապրողների խնդիրներն ու պահանջները գրեթե նույնն են՝ ճանապարհների բարեկարգում, գազիֆիկացում, տրանսպորտ, գյուղատնտեսությունը զարգացնելու ուղղությամբ աջակցություն և այլն:

Աշոցք համայնքի ղեկավարի ընտրություններին առայժմ առաջադրված է 5 թեկնածու: Մինչև պաշտոնական գրանցումը չի բացառվում, որ թիվը կավելանա: Նախկին գյուղապետերից ու ժամանակավոր պաշտոնակատարից բացի, թեկնածուների շարքում նշվում է ևս երկու անուն ՝ Կարեն Մարտիրոսյան ու Գուրգեն Գալստյան: Նրանք  Աշոցքի բնակիչներ են, ՏԻՄ ոլորտում երբևէ չեն աշխատել: