2020-ին սպասվում են ֆանտաստիկ տիեզերական շոուներ

2020-ը խոստանում է դիտարժան տիեզերական երևույթներ հրամցնել աստղագետներին ու բոլոր նրանց, ովքեր սիրում են հիանալ գիշերային երկնքին նայելով: Այս տարվա 12 ամսվա ընթացքում մեզ սպասվում է 13 լիալուսին, մի քանի սուպերլուսին, մեկ կապտագույն լուսին, մոլորակների համբույրներ, տպավորիչ աստղաթափեր և մեկ լիարժեք, ամբողջական արևի խավարում:

Այս ամենի մասին՝ հերթով:

1.Սուպերլուսին

Սուպերլուսինը երևույթ է, երբ լիալուսինը համընկնում է Լուսնի և Երկրի մաքսիմալ մոտեցման պահի  հետ: Լուսինն այդ ժամանակ ավելի խոշոր ու պայծառ է թվում, քան սովորաբար: Սուպերլուսին այս տարի կլինի փետրվարի 9-ին, մարտի 9-ին, ապրիլի 7-ին և մայիսի 7-ին: Հունվարի 10-ին ևս նկատվել է սուպերլուսին: 

2. Կապույտ լուսին

Հոկտեմբերի 31-ին մեզ սպասվում է ֆանտաստիկ տեսարան՝ կապույտ Լուսին: Ու խոսքն այս դեպքում ամենևին գույնի մասին չէ: Բանն այն է, որ այսպես աստղագետներն անվանում են նույն սեզոնում 4 լիալուսնից երրորդը: Համաձայնենք, աստղագետների գործերում ամեն ինչ չէ, որ մեզ համար պարզ է ու հասկանալի:

3.Պերսեիդ կամ աստղաթափ

Տարվա ամենագեղեցիկ երևույթներից մեկը լինելու է օգոստոսի 12 ին: Պերսեիդ կամ աստղաթափ. այդ երևույթը սովորաբար նկատվում է հուլիսի կեսերից մինչև օգոստոսի կեսերը՝ ամեն գիշեր:  Հատուկ սարքեր պետք չեն՝ ժամում 80 երկնային մարմնի անկումը դիտելու համար: Հատկապես պարզ եղանակին դա անհնար է չտեսնել: Օգոստոսի 12-ին ամենախիտ աստղաթափի օրն է լինելու: Այդ երևույթն աստղագետներն անվանել են Սուրբ Լորենցոյի արցունքներ:

4.Մանհեթթենհենջ

Մանհեթթենհենջ՝ Նյու Յորքի բնակիչներին այս երևույթը շատ լավ ծանոթ է: Տարին 4 անգամ՝ դեկտեմբերին, հունվարին, մայիսին և հուլիսին, ծագող և մայր մտնող արևը շողում է  Մանհեթթեն փողոցի երկայնքով՝ արևելքից արևմուտք: Այդ երևույթի անունը ստացվել է Մանհեթթենի և անգլիական Սթոունհենջի միավորումից:

5. Հեմենիդայի աստղաթափ

Հեմենիդայի աստղաթափ. Պերսեիդի հետ միաժամանակ այս աստղաթափը համարվում է ամենագեղեցիկ տիեզերական շոուներից մեկը, որը բնությունը շռայլորեն նվիրում է երկրաբնակներին: Դեկտեմբերի 14-ի լույս 15-ի գիշերը րոպեում 120 ընկնող աստղ կարելի է հաշվել: Նրանք ընկնելու են վայրկյանում 70 կմ արագությամբ, երկնքում թողնելու են պայծառ հետագիծ և այրվելու են մթնոլորտի վերին շերտերում: Հեմենիդայի աստղաթափը ոչ միայն ավելի պայծառ է, այլ նաև ավելի գունեղ. ընկնող աստղերից շատերը դեղին են, կանաչ, կարմիր և երկնագույն, ինչն, իհարկե, պայմանավորված է տարբեր մետաղների առկայությամբ:

6. Արևի ամբողջական խավարում

Որպեսզի դիտենք տիեզերական ամենաառեղծվածային ու գեղեցիկ երևույթներից մեկը՝ արևի ամբողջական խավարումը, պետք է սպասենք մինչև տարեվերջ: Դեկտեմբերի 14-ին Լուսինը կհայտնվի Երկրի և Արևի միջև: Երկրի վրա ստվեր կընկնի: Խավարումը ավելի տեսանելի կլինի հարավային կիսագնդի բնակիչներին, այնպես որ տարեվերջին արժե տոմս գնել դեպի Նոր Զելանդիա, Չիլի կամ Արգենտինա: Հարավային Բրազիլիան էլ վատ տարբերակ չէ. այնտեղ ևս արևի ամբողջական խավարումը պարզ տեսանելի կլինի:

7.Տիեզերական համբույր

2020-ի դեկտեմբերը խոստանում է մեզ անընդհատ զարմացնել տիեզերական երևույթներով: Ձմեռային գիշերահավասարի օրը՝ դեկտեմբերի 21-ին, կմոտենան Յուպիտերն ու Սատուրնը: Նրանք այնքան մոտ կլինեն, որ տիեզերական համբույրի տպավորություն կստեղծվի, թեև իրականում նրանք միլիոնավոր կիլոմետրեր հեռու կլինեն իրարից: