Մշակույթի նախարարությունը 12 տարի քայքայել է էդ շենքը․ Գյումրիի «վառեմ-մարեմ»-ի շենքի վերականգնման նոր նախագիծը քննարկման է դրվել ավագանու նիստում

Այսօր Գյումրիի ավագանու հերթական նիստի օրակարգային հարցերից մեկը վերաբերում էր «Մեր մանկության տանգոն» ֆիլմից հայտնի պատմական շենքի պահպանությանը: Այն գտնվում է քաղաքի պատմական միջուկում, համարվում է «Կումայրի» արգելոց-թանգարանի հաշվեկշռում գտնվող կառույց, հայտնի  է դարձել որպես Հայ կինոյի «վառեմ-մարեմ»-ի պատշգամբով։ Շենքի պահպանության, հետո վերակառուցման ուղղությամբ տասնյակ տարիներով բազմաթիվ ծրագրեր են ներկայացվել, բայց ոչ մեկը չի  իրականացվել։

2017 թվականին մշակույթի նախարար էր Արմեն Ամիրյանը, որը հենց Գյումրիում  ներկայացրեց շենքի վերակառուցման վիրտուալ նախագիծը, ըստ որի՝ առաջին հարկում լինելու էին արհեստագործական սրահներ, մի հատվածում տեղակայվելու էր երկրագիտական թանգարանը, իսկ այն հատվածում, որտեղ գործել էր ցարական Ռուսաստանի փոստատունը, դառնալու էր փոստի թանգարան: Հավակնոտ ծրագիրը գնահատվել էր մեկ միլիոն դոլար:

Հետո պարզվել է, որ 2009 թվականից պատմամշակութային կառույցը հանձնվել է մշակույթի նախարարության  ենթակայության։

«12 տարի շարունակ էս շենքի տերը մշակույթի նախարարությունն է եղել, բայց մատը մատին չի խփել, ու 12 տարում էդ շենքը ահագին քայքայվել է, շենքը վերևից ներքև փլած-թափած է ու փորձանքի բուն է: Ըստ էության, մշակույթի նախարարությունը քայքայել է «Կումայրի» արգելոց-թանգարանի սեփական տան մաս կազմող շենքերը և հիմի որոշել է փոխել կարգավիճակը: Էն ժամանակ էլ են խոստումներ եղել, երդում են կերել, որ կնորոգենք մշակութային կենտրոն դարձնելու նպատակով․ երկրագիտական թանգարանը պիտի էդտեղ տեղավորվեր: Տրամաբանությունը էդ է հուշում, որ 2009 թվականից իրենցն է եղել, կարող էին 3-4 տարվա ընթացքում սարքեին, բայց չեն արել»,- նիստի ժամանակ հայտարարեց Գյումրիի ավագանու անդամ Լևոն Բարսեղյանը:

Քաղաքի այցեքարտերից մեկը համարվող շենքը նորից ուշադրության է արժանանում։ Ըստ նոր ներկայացված նախագծի, շենքի առաջին հարկը լինելու է թանգարան, իսկ մյուս հատվածները տեղեկատվական տեխնոլոգիաների կրթության կենտրոն։

«Հիմա ծրագրի փոփոխություն է կատարվել և որոշել են, որ շինությունը տրամադրեն Հայաստանի ազգային պոլիտեխնիկական համալսարանի հիմնադրամին, և խնդրել է մշակույթի նախարարությունը՝ փոխվարչապետի հանձնարարականով, որ մենք փոփոխություն կատարենք և փոխենք նշանակությունը, այսինքն՝ մշակութայինից փոխենք կրթականի»,- նոր նախագիծը ներկայացրեց Գյումրիի գլխավոր ճարտարապետ Հենրիկ  Գասպարյանը:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom  ցանցային օպերատորների կապուղիներո, ինչպես նաև  Shant Digital Tv հավելվածով՝ ամբողջ աշխարհում։