Բազմամասնագիտական խմբերը Շիրակի մարզում այցելել են պատերազմում վիրավորում ստացած և պրոթեզավորման կարիք ունեցող զինծառայողներին   

ՀՀ աշխատանքի և սոցիալական հարցերի նախարարության բազմամասնագիտական խմբերն այցելել են Շիրակի մարզ, կատարել պատերազմում վիրավորում ստացած և պրոթեզավորման կարիք ունեցող անձանց կարիքների գնահատում: Մասնագետները տեղում որոշում են վերին և ստորին վերջույթների անդամահատումից հետո զինվորականներին անհրաժեշտ պրոթեզի տեսակն ու ընտանիքին աջակցության տարբերակները:

Միհրան Մհերյանցը ծանր վիրավորում է ստացել Հադրութում, մի քանի վիրահատություն է տարել, ձախ ոտքը անդամահատվել է, բազմաբեկորային վնասվածքներ ունի նաև աջ ոտքը:

Միհրանը չի քայլում, աջ ոտքի ծնկի հատվածում բացված վերքերը դեռ չեն ապաքինվել, սուր ցավեր ունի։ Վնասվածքաբան-օրթոպեդը զննությամբ փորձեց պարզել անհանգստացնող ցավի պատճառը։ Մասնագետները որոշեցին՝ Միհրանին անհրաժեշտ է ֆունկցիոնալ պրոթեզ։

«Ես խորհուրդ կտայի էլեկտրոնային ծունկ դնենք, որը նախատեսված է ոչ ակտիվ հիվանդների համար, ունի առաջինից երկրորդ ակտիվության մակարդակ, շատ անվտանգ ծունկ է, ու որ մյուս ոտքն էլ չվտանգենք, չջարդվեն ոսկորները, որոնք նոր են կպել»,- ասում է Մոսկվայից Հայաստան ժամանած պրոթեզավորող Արմեն Սարգսյանը։

Մասնագիտական խմբի էրգոթերապիստն էլ այցի ընթացքում արձանագրում է տան պայմաններն ու այն  անհարմարությունները, որոնք պետք է շտկել ընտանիքում հաշմանդամություն ունեցող անձի ազատ ու հարմարավետ տեղաշարժը ապահովելու համար:

Տան անհարմարություններից բացի, բակից մինչև տուն հասնելու դժվարությունները ևս շատ են: Շենքի աստիճանահարթակի մոտ նաև կկառուցվի թեքահարթակ, իսկ անվասայլակի ազատ տեղաշարժի համար կփոխվեն շքամուտքի դռները:

Տեղաշարժման նույն անհարմարություններն են նաև Անի թաղամասի շենքերում։ Դրանցից մեկում է ապրում Հարություն Մկրտչյանը։ Հարությունը կամավորների հետ գնացել է պատերազմ, վիրավորվել է Քարին տակում, ձախ ոտքն անդամահատված է։ Հենակների օգնությամբ փորձում է հաղթահարել ժամանակավոր պրոթեզով քայլելու դժվարությունները:

Ուսումնամարզական պրոթեզը ֆունկցիոնալ չէ, նույնիսկ պատրաստված է 2 սմ կարճ: Պրոթեզավորող Սարգսյանը հենց տեղում ծնկահոդի դեր կատարող մեխանիկական սարքը փոխարինեց ֆունկցիոնալով։

«Էս ադապտերը պարզապես մեխանիկական է, առանց որևէ ավելորդ ֆունկցիայի է աշխատում, իսկ նոր ադապտերը կոչվում է ֆունկցիոնալ, նախատեսված է ծնկի հատվածից ոտքը տարբեր ուղղություններով թեքելու համար, ինչը կօգնի մեր տղաներին ինքնուրույն կոշիկ հագնել-հանել»,- նշում է պրոթեզավորող Սարգսյանը։

Բազմամասնագիտական խումբն արդեն գնահատել է 70 անդամահատված վերջույթներով անձանց կարիքները։ Վերջնական հաստատումից հետո նրանց կտրվի հավաստագիր, որի հիման վրա էլ կկազմակերպվի պրոթեզավորման գործընթացը։

«Պատերազմի հետևանքով անդամահատված քաղաքացիներին պրոթեզների տրամադրումը իրականացվում է պետական հավաստագրով, անձին տրամադրվում է սերտիֆիկատ, որն ունի հնարավորություն ծախսելու իքս քանակությամբ գումար, որի շրջանակներում անձին տրամադրում ենք նաև կազմակերպությունների ցանկ, որպեսզի անձը մոտենա  իրեն հարմար լավագույն մասնագետներ ունեցող  կազմակերպություն և հենց այդտեղ ստանա իր պրոթեզները կամ աջակցող միջոցները»,- պարզաբանել է ՀՀ աշխատանքի և սոցիալական հարցերի նախարարության ԿՍԱԳՀ խորհրդական Հայկ Մկրտչյանը։

Բոլոր պրոթեզները կպատրաստվեն Հայաստանում գործող 4 պրոթեզարաններում, իսկ մասնագետների կարողությունների բարձրացման և տեղում վերապատրաստելու համար մայիսին Հայաստան կայցելեն ամերիկացի պրոթեզավորողները:

Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։