Արցախի գույներն ու բնապատկերները լուսանկարներում․Սուրեն Սարումյանի ցուցահանդեսը Գյումրիում

Գյումրիում բացված  «Ֆոտո Արցախ» ցուցահանդեսի  լուսանկարների հեղինակը գնդապետ Սուրեն Սարումյանն է՝ Արցախի Պաշտպանության բանակի տեղեկատվության բաժնի պատասխանատուն։ Սուրեն Սարումյանը նաև արձակագիր է, մի քանի պատմվածքների հեղինակ: Լուսանկարներում մինչև 44 օրյա պատերազմի Արցախն է՝ իր  բնապատկերներով և իր մարդկանցով, որոնք խաղաղ էին մինչև սեպտեմբերի 27-ը ։

Արցախի մասին են պատմում   հարուստ ու բազմերանգ  բնապատկերներով, գյուղերի  կոլորիտային նեղլիկ  փողոցներով ու հողի հետ կռիվ տվող մարդկանցով պատկերները ։ Արցախի պաշտպանության բանակում ծառայությունը  Սուրեն Սարումյանը համատեղել է սիրելի զբաղմունքով՝  լուսանկարչական ապարատը միշտ նրա հետ է , հավերժացնում է  արցախյան սարերի ու դաշտերի   անկրկնելի տեսարանները:

«Իմ կենսակերպը, իմ հանգիստը հիմնականում կապված է բնության հետ: Երբ մարդ սիրում է արշավներ, երբ մարդ սիրում է լեռնագնացություն, բնականաբար ազատ ժամանակը հիմնականում լինում է բնության մեջ,երբ ֆոտոխցիկը հետդ է, պարզապետ պետք է հասցնել ու նկարել  կարևոր պահը»,- Shantnews.am-ի հետ զրույցում պատմել է  լուսանկարիչ Սուրեն Սարումյանը։

«Զարմանալի զուգադիպությամբ, երբ որ մենք ընտրում էինք ցուցահանդեսի լուսանկարները, թերթելով անգամ հասկացանք, որ, ցավոք, դրանցում պատկերված վայրերի 80 տոկոսից ավելին  այսօր մեր վերահսկողության տակ չեն։ Էդ տարածքները, մասնավորապես, Հադրութն է՝ Տողը, Շուշին, տարածքներ, որոնք հիմա մեզ մոտ չեն։ Կարելի է ասել, որ դիտավորյալ նաև ընտրեցինք այդ ֆոտոները, որպեսզի ցույց տանք, այնուամենայնիվ, որ մենք դեռ վերադառնալու ենք պարտադիր և լուսանկարների ընտրությունը կատարվեց ելնելով դրանց գեղարվեստական արժեքից»,- նշում է  «Արտ փիար» ընկերության հիմնադիր տնօրեն Գայանե Դավթյանը։

Պրոֆեսիոնալ լուսանկարչի  աչքով  աշխատանքների մասին կարծիք է հայտնում  հայտնի  լուսանկարիչ  Զավեն Խաչիկյանը, լուսանկարները դիտարկում է  կյանքի արտացոլանք ու վավերագրություն: Նա  90-ականներին  է  Արցախը նկարել՝ առաջին պատերազմի դրվագներ, առաջնագծում կռվող տղաների ապրումներ ու սխրանքներ:

«Ես էդ աչքով չեմ նայում Արցախին՝ երեկ ու էսօր, ես և՛ երեկն եմ, և՛ էսօրն եմ Արցախի։Ես ուրախ եմ,որ էսօր գունավոր է նկարվում Արցախը, մենք էն ժամանակ նույնիսկ ժապավեն չունեինք նկարելու համար։ Գիտեք, ես չեմ գնում ընդհանրապես միայն լուսանկարելու Արցախը կամ ինչ-որ մեկին, ես գնում եմ էդ մարդու հետ լինելու, էդ մարդու կողքը լինելու համար՝ դա լինի զինվոր,լ ինի Գյումրին, թե Մեղրին։ Էնտեղ դու ապրում ես ու մի պահ հանում ես նոթատետրդ ու մի բան ես գրում։ Լուսանկարը նաև էդպիսի բան է»,- Shantnews.am-ին պատմում է  հայտնի լուսանկարիչ Զավեն Խաչիկյանը։

Ցուցահանդեսին ներկայացվեց նաև հայկական  ամսագրի  հատուկ խորագիրը, որտեղ ներառված են արցախյան երկրորդ պատերազմում զոհված 1853 հայորդիների անուն-ազգանունները: Ամսագրի վաճառքի հասույթը փոխանցվելու է «Հայրենիքի պաշտպանի հիմնադրամին»:

Ֆոտո Արցախ ցուցադրությոնը Գյումրիում կմնա մինչև փետրվարի 28-ը,որից հետո լուսանկարները կներկայացվեն հայրենի տանը՝  Արցախում:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom  ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։