Շիրակի մարզի Գոգհովիտ գյուղում կենդանիների բրուցելոզով վարակման դեպքեր են գրանցվել

Աշոցքի տարածաշրջանի Գոգհովիտ գյուղում արձանագրվել են  բրուցելոզ հիվանդությամբ կենդանիների վարակման  դեպքեր։ Փետրվար-մարտ ամիսներին կատարված արյան նմուշառումների փորձաքննությամբ 59 խոշոր եղջերավոր կենդանիների մոտ հաստատվել է հիվանդությունը, դրանք այժմ  ենթարկվում են հարկադիր մորթի։

Ըստ գյուղացիների՝ լաբորատորիայից ստացված նմուշառումների պատասխանները արժանահավատ չեն։ 4 ամիս առաջ նույն կենդանիներից վերցված արյան նմուշների փորձաքննությամբ հիվանդության որևէ ախտանշան չի հայտնաբերվել։

«Գոմս դատարկվել է, 15 անասուն էր, պատասխանը եկել է, որ 11 հատը բրուցելոզ է, հիմա մնացել է 2 հատը, դրանցից  արյուն չեն վերցրել, մեկը էսօր-էգուց կծնի, մեկն էլ դեռ երկու տարեկան չկա»,- Shantnews-ին  պատմել է գոգհովիտցի  Գևորգ  Մկրտչյանը։

Հարևանությամբ գտնվող  Արշակյանների  անասնագոմը  ևս մի քանի օրում դատարկվել է։ Դեռ անցած տարի աշնանը իրենց ու նաև համագյուղացիների անասնապահական տնտեսություններում հորթերի անկումներ էին եղել, գյուղի անասնաբույժին էին կանչել, արյան նմուշառում կատարել, որոնց պատասխանները ստացել էին ու պարզել, որ կովերը հիվանդ չեն։

«Անասնագոմումս եղել է 8 հատ կով, 5 հատը էս կողմն էր կապած, 3 հատը էս մյուս կողմը։ Հիմա մնացել է էս երկուսը, ըսոնք էլ են հիվանդ, բայց չեմ մորթել դեռ, մեկի հորթը դեռ 13 օրական է, մյուսն էլ դեռ չի ծնել, դրա համար եմ թողել»,- ասում է գոգհովիտցի Արամ Արշակյանը։

Գոգհովիտ գյուղի 885 գլուխ խոշոր եղջերավորներից մինչ օրս 400-ից է կատարվել  նմուշառում, որից 59-ի մոտ հաստատվել է բրուցելոզ։ Ըստ գյուղացիների՝ իրենք անելանելի վիճակում են հայտնվել լաբորատորիաներից ստացված նմուշառումների հակասական պատասխանների պատճառով, կասկած ունեն, որ նոյեմբերին նմուշառումները պատշաճ փորձաքննության չեն ենթարկվել։

Գյուղի անասնաբույժը դա բացառում է և նշում, որ լաբորատորիայում նմուշառումների պատասխանները շփոթել հնարավոր չէ, գյուղում հիվանդությունը տարածվել է աշնանը, երբ ամառանոցներից կենդանիները վերադարձել են գյուղ։ Նման դեպքերում նախկինում սահմանվում էր կարանտին, կենդանիների արյունը փորձաքննության էր ենթարկվում, բայց վերջին տարիներին այդպես չի արվում։

Այսօր Սննդի անվտանգության տեսչական մարմնի Շիրակի մարզային կենտրոնի ու մարզպետարանի գյուղվարչության բաժնի աշխատակիցները Գոգհովիտում հաշվառում էին հիվանդ կենդանիներին ու հետևում սանիտարական մորթի ընթացքին։

Տեսչական մարմնի պատասխանատուն վստահեցնում էր, որ հիվանդ կենդանու միսը հանձվում է սպանդանոցներին։

«Միսը գնում է հարակից մարզերի սպանդանոցներ՝ ընդհանուր վաճառքի։ Մորթի ժամանակ մենք ներկա ենք գտնվում, դրա համար համայնքը գյուղից դուրս հատուկ տարածք է հատկացրել։ Եթե մսի մեջ ախտաբանաանատոմիական փոփոխություններ չեն նկատվում, ապա միսը թույլատրվում է օգտագործման, իհարկե, միայն համապատասխան ջերմային մշակում անցնելուց հետո»,- պարզաբանել է ՍԱՏՄ Շիրակի մարզային կենտրոնի գլխավոր տեսուչ Անդրանիկ Վարդանյանը։

Հիվանդ անասնագլխաքանակի հարկադիր մորթից հետո վարակված անասնագոմերը պարտադիր ենթարկվելու են  ախտահանման։ Նոր դեպքերի հայտնաբերման համար արյան նմուշառումները գյուղում շարունակվում են։ Գյուղացիական տնտեսություններին տվյալ դեպքում վնասի փոխհատուցում չի տրվում։ Բրուցելոզ հիվանդությունը պետության կողմից փոխհատուցվող վարակների ցանկում ներառված չէ։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։