Մաեստրո Տիգրան Մանսուրյանի նվերը՝ Գյումրիի նորաստեղծ «Մանսուրյան» աշակերտական կամերային նվագախմբին 

Երեկ Գյումրիի դրամատիկական թատրոնում մանսուրյանական երեկո  էր: Հայաստանի պետական սիմֆոնիկ նվագախմբի կատարմամբ հնչել են մաեստրոյի հայտնի կինոերաժշտությունները՝ նոր գործիքավորմամբ: Մեծանուն կոմպոզիտորը  երեկոյին ներկա չէր, իսկ Սերգեյ Սմբատյանի նվագախումբը ղեկավարել է Ազգային օպերայի և բալետի թատրոնի դիրիժոր Հարություն Արզումանյանը:

Մինչ համերգային երեկոն, Հայաստանի պետական սիմֆոնիկ նվագախումբը Գյումրիի 4-րդ երաժշտական դպրոցում մասնակցել է նորաստեղծ «Մանսուրյան» աշակերտական կամերային նվագախմբի առաջին համերգին։ Երաժիշտները նվագախմբին են փոխանցել  լարային  գործիքներ, որոնք մաեստրոյի նվերն են պատանի երաժիշտներին։

2019 թվականին մեծանուն կոմպոզիտորի՝ հայկական կինոերաժշտության անփոխարինելի վարպետ Տիգրան Մանսուրյանի ծննդյան 80-ամյակին նվիրված անցկացվեցին հոբելյանական համերգաշարեր, իսկ ամփոփիչ համերգը տեղի ունեցավ Գյումրիում:

Հենց այդ ժամանակ  հայտարարվեց, որ համերգի հասույթի մի մասը տրամադրվելու է Գյումրիի 4-րդ  երաժշտական դպրոցին։ 10 լարային նվագարանները դպրոցին փոխանցեցին Հայաստանի պետական սիմֆոնիկ նվագախմբի երաժիշտները։

«Անելու ենք ամեն ինչ, որպեսզի այս նվագախումբը ոչ թե դառնա ինքնանպատակ աշակերտական նվագախումբ, այլ իսկապես ծառայի Գյումրիի մշակութային կյանքի զարգացմանը, ինքը նոր որակ բերի և կարողանա այս ընդհանուր մշակութային համապատկերում առանձնանալ և դառնալ ճանաչելի նվագախումբ, մարդիկ խոսեն և իմանան, ճանաչեն Գյումրիի աշակերտական կամերային նվագախումբը»,-նշել է Գյումրիի քաղաքապետարանի մշակույթի և երիտասարդության հարցերի բաժնի պետ Լիլիթ Թովմասյանը։

«Պատանի երաժիշտների նվագելը այս նվագախմբում  շատ կարևոր է, ասեմ, որ ես մեծ հույս ունեմ, որ մենք շատ լավ համագործակցություն կունենանք։ Հայաստանի պետական սիմֆոնիկ նվագախումբն ու այս   աշակերտական  կամերային նվագախումբը համատեղ համերգային ծրագրեր կիրականացնեն։ Ունենք տարբեր նախագծեր, անպայման մենք ձեզ հրավիրելու ենք Երևան՝ համերգներով հանդես գալու»,- վստահեցրել է Հայաստանի պետական սիմֆոնիկ նվագախմբի տնօրեն Սարգիս Բալբարյանը։

Աշակերտական կամերային նվագախմբի պատանի երաժիշտների համար միասին հանդես գալու առաջին փորձն էր, պատասխանատվության մեծ զգացում էր նրանց համար նվագել համաշխարհային ճանաչում ունեցող մաեստրոյի ստեղծագործությունները։ Նորաստեղծ աշակերտական կամերային նվագախումբն առաջիկայում կհամալրվի նոր երաժիշտներով։

Տիգրան Մանսուրյանի կինոերաժշտության մեծ մասը նոտագրվել ու ծնունդ են առել «կինոյի քաղաք» Գյումրիում: Որքան ֆիլմի նկարահանումներն են եղել բարդ, այնքան էլ  ֆիլմին համահունչ երաժշտություն գրելը։ Մաեստրոն  կինոերաժշտությունները գրել է, երբ նա ծանոթացել է ֆիլմի գլխավոր դերակատարների հետ, իր համար կերպարները մուսա են եղել: Մաեստրոյի՝ Հայկական ֆիլմերի համար գրված երաժշտությունները հայկական մշակույթի մնայուն այցեքարտն են ։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։